• Le doyen de la presse Européenne

U percorsu "nutrale" d'Arthur Solinas

À 18 anni issu ghjuvanottu di ceppu canalincu è aiaccinu caratterizeghja a generazione nova di corsi chì s'impegnanu à u nivellu militante è culturale...
U percorsu « nutrale »d’Arthur Solinas
À 18 anni issu ghjuvanottu di ceppu canalincu è aiaccinu caratterizeghja a generazione nova di corsi chì s’impegnanu à u nivellu militante è culturale…


S’ell’ùn hè micca statu elettu di ghjugnu scorsu cum’è u so amicu Don Jo Luccioni, Arthur Solinas cunnosce abbastanza bè l’emiciculu di l’Assemblea di Corsica per esse presidente di u gruppu « Ghjuventù Paulina » à l’Assemblea di a Ghjuventù. « Ùn sò micca un puliticu, si difende u ghjuvanottu, solu un militanti... »

Parolle dighjà ghjuste per u zitellu ch’ùn hà chè diciottu anni. Ma, à dilla franca, sà induve vole andà. U so impegnu à prò di u muvimentu « Core in Fronte », seria, d’una certa manera, a cuntinuità logica d’un percorsu ind’un bagnu linguisticu è culturale dapoi ch’ellu zitellu. Un percorsu da Aiacciu à...Aiacciu passendu per Santa Maria Sicchè è Pila Canale induve ellu t’hà e so radiche da u cantu di u so babbu (Aiacciu da u cantu di a mamma). « Sò crisciutu à mezu à a lingua corsa. Ziteddu, missiavu, minnani, tuttu u mondu parlaia corsu. Aghju amparatu di manera naturali. S’eru ind’una scola materna bislingua, ùn aghju ripigliatu chè in quarta. Ciò ch’ùn m’hà mai impeditu di parlà a me lingua. Un impegnu naturali diciaraghju, è chì m’hà purtatu versu a cultura è u spiritu militanti. U fattu di crescia in paesi è in cità m’hà fattu piddà cuscenza chè dui mondi esistiani. È sopratuttu di ciò ch’eddu riprisentaia u mondu rurali. Ancu s’è oghji, a sfarenza hè poca, ci hè un estru particulari chì si mantena sempri... »


Da u Cullettivu di i Liceani Corsi à « Core in Fronte »

In u 2019, Arthur decide d’impegnà si à u nivellu militante. Cù qualchì amicu (Julien Romagnesi, Marc’Andria Murati, Petru Lisandru Beretti è Jean-Christophe Habran), participeghja à a nascità di u « Cullettivu di i Liceani Corsi », spezia di cuntinuità di l’Associu di i Liceani Corsi ch’esistava nanzu. « Ci hè statu una preza di cuscenza. Oghji, a ghjuventù ùn hè più cuncernata da ciò chì si passa. Ci vulia à fà qualcosa... »

Ancu s’ellu ricusa issa terminulugia, s’impegna, subbitu dopu à u nivellu puliticu fendu campagna à prò di Jean-Marc Lanfranchi à l’occasione di l’elezzione municipale di u 2020 in Aiacciu. A seguita hè, torna una volta, logica. Elezzione à l’Assemblea di u Ghjuventù d’aprile scorsu induve ellu riprisenta a Ghjuventù Paulina. « Hè stata dura cù a crisa sanitaria. Avemu da forsa ripiddà u mesi chì veni. » À tempu, participeghja à reunione cù Core in Fronte. « Spartu a so vista pulitica pà una sucetà induva i valori suciali ani un’impurtanza maiò. A ghjuventù hè a spiranza di u populu. U discorsu di Core in Fronte permetta di fà valè i nosci idei senza rumpitura trà eletti è u populu. »

U ghjuvanottu ùn face parte di l’eletti novi à l’Assemblea di Corsica ma, à 18 anni era dighjà nantu à la lista purtata da Paul Félix Benedetti di ghjugnu.

Strada facendu, cuntinueghja i so studii per esse, da quì à pocu, prufessore di corsu. Un percorsu chì, aldilà di u militantisimu, u porta dinò, ver di a cultura è più particularmente u cantu. « Un altra passioni induva sò statu ciuttatu da ziteddu cù u gruppu « Dopu Cena ». Aghju fattu guasgi tutti i cuncerti. Più tardi, mi sò scrittu à a Scola di Cantu, mi piaci à cantà, hè dinò un attu militanti... »

Cantà sì, ma per ciò chì tocca à u viulinu, hè altr’ affare. « L’aghju sempri intesu. Quandu ne vecu unu, scappu ! »

Milititantisimu, canti, tradizione è ancu u ghjocu à ballò, eccu u filu « nustrale » ch’ellu cercu à mantene. Un filu chì li toccherà, ellu dinò à tramandà un ghjornu…

Ph.P
Partager :