Sapé Fà : I disegni < Nustrali >> di Francescu Zarzelli

I disegni « Nustrali » di Francescu Zarzelli

À 27 anni, issu ghjovanu di a Peraccia hà sceltu di sulcà u so chjassu in u disegnu d’arte, sperendu, da quì à pocu, di pudè fà ne u so mistieru…

Zarzelli, una casata monda cunnisciuta in Corsica, masimu in u duminiu di a lingua è di a cultura. U tintu Paulu, famosu insegnante, scrivanu è pueta, hà scrittu parechji anni nantu à u JDC. S’ell’ùn hà micca pigliatu u listessu versu, u so figliolu Francescu, hè statu ciuttatu, da zitellu, ind’un ambiu culturale è nustrale. « Sò statu allivatu i paesi di i Peri, spiega u ghjuvanottu, è di manera naturali, mi sò impegnatu à prò di a cultura è u patrimoniu... »

Francescu face parte di a cunfraternita San Larenzu di i Peri è, à tempu, di l’associu « Memoria Viva » chì travaglia, ghjust’appuntu nantu à a cultura. Li piace à cantà è participà, à a vita paisana...

U disegnu ? « Lighjiu assai à u culleghju, aghjusta u ghjuvanottu, i classichi di l’epica (Astérix, Schtroumps, i persunaghji di Disney), tuttu què m’hà datu a voglia di fà disegni. Ma l’influenza maiò hè ghjunta da u me ziu, Paulu Filippi. Aghju principiatu pian’pianinu, eppo aghju fattu a me strada... »

Una scelta prufessiunale

Cù issa passione, Francescu hà seguitatu un percorsu ver di u duminiu di l’arte. Cusì, si chjapperà una licenza d’arte appiegatu è un Master ingenieria, mediazione culturale è animazione (IMCA) liatu à la lingua corsa, à l’Università di Corsica.

« U disegnu, aghjusta l’artistu, era una passione ma n’aghju fattu una scelta prufessiunale. »

Benchè impegnatu in u duminiu di a cumunicazione, hà riesciutu à fà a leia trà u grafisimu è u so arte. Tandu, principia qualchì tempu fà, à creà i so primi disegni numerichi ma micca soli.

« Facciu disegni di persunaghji di tempi fà à partesi da ritratti o filmetti d’archivi di l’INA. Ci sò paisani, marinari o persunaghji di u principiu di u Xxu seculu. »

Da u numericu à l’acquarellu è l’inchjostru

Francescu travaglia u numericu ma dinò qualcosa di più « naturale » vale à dì inchjostru, mina, acquarellu.

« Possu passà da l’illustrazione d’un libru per indettu, à quellu d’un contu è per ciò chì tocca à a cumunicazione, affissi piuttostu chè logò. È facciu dinò pitturi. »

Una prima cullezzione, battizata « l’anziani » hè nata qualchì tempu fà. Ci si trova un marinaru, una paisana è un traculinu. A seguita ? « Mi piaceria à travaglià a pittura à l’oliu ma sempri arrimbatu nantu à u tradiziunali. L’imaginariu hè qualcosa chì mi piaci dinò assai... »

U disegnu, in tutti i casi, li permette di mantene un filu « nustrale », una manera di ripiglià, à modu soiu ciò chì hè statu tramandatu da u so babbu.

« A lingua corsa faci parta di mè, hè sculpita ma u destinu m’hà purtatu aldilà di l’insignamentu. Possu quantunqua ringrazià à tutti quiddi chì m’anu lasciatu qualcosa, i me prufessori, Ceccè Lanfranchi, Paulu Vincentu Mucchielli è di sicuru, babbu. »

Incaricatu di cumunicazione ind’un’impresa isulanu, Francescu Zarzelli cuntinueghja à cuncepisce i so disegni. Sunniendu sempre fà ne u so mistieru.

Ph.P.