• Le doyen de la presse Européenne

Sapè Fa : Noëlle Casabianca, l'arte pitturale "spirituale"

L'arte pitturale " spirituale " di Noëlle Casbianca
l’arte pitturale « spirituale » di Noëlle Casabianca

Passiunata da zitella, da tuttu ciò chì tocca à u patrimoniu, Noëlle Casabianca cuncepisce tele è canavacci cù un certu aspettu religiosu. L’occasione, per l’artista, di sprime a so dimensione spirituale…


Difficiule, cù radiche cristiane in Corsica è in Sardegna, una zia sore, di piglià un altru versu chè quellu di a religione. Grafista, sicretaria, assistante cummerciale, assistante in bibbiuteca, vinderola...Noëlle Casabianca hà fattu parechji mistieri. Ùn si contanu micca, d’altronde, e so passione : cucina, arti marziali (kung fu, whu shu), caritativu, hè sempre pronta à dà una manu...Ma l’attività chì li piace u più saria u duminiu artisticu. À u sensu u più nobile di sicuru. « L’arte ci face entre ind’una dimensione spirituale, spiega a donna, ci hè una sensibilità particulare. Hè què chì m’hà purtatu ver di issa strada quì. »

Una strada sulcata da e so radiche, Carghjese in Corsica cù l’aspettu catolicu è ortodossu è in Sardegna da u cantu di a so minnana. Arrimbata nantu à usi tramandati da i soi (un ziu scultore), u so talente s’hè sviluppatu da zitella cù aquarelli di culori vivi ma dinò a tecnica di u canavacciu chì dumanda assai cunniscenza è di più precisione. « Aghju principiatu cù Edmond Rocchiccioli, pittore di Carghjese, aghjusta l’artista, Hè ellu chì m’hà furmatu. Oghje, aghju appoghji diversi, adopru dinò tutte e tecniche o tradizione pitturale »


Un estru creativu particulare

Passiunata da a so terra è di u patrimoniu corsu, Noëlle Casabianca hà fattu assai travagli nantu à l’aspettu spirituale. Ciò chì l’hà permessu di fà valè u so talente in parechji cuncorsi è mostre: cuncorsu di BD di l’Assemblea di Corsica (1987), mostra d’aquarelli in Carghjese (1994 è 1998), cuncorsu di a Cullettività di Corsica (1996)...Dapoi qualchì anni s’hè arrimbata nantu à e so radiche, a so sensibilità è a spiritualità per sprime, à modu soiu, u so rapportu à a religione è a fede. Tandu, nascerà una pittura di u San Patrone di a cunfraternita Sant Antone di Carghjese o una tela in canavacciu dedicata à u San Patrone di a cunfraternità San Spiridon, torna in Carghjese. À tempu, hà fattu l’annu scorsu, illustrazione ind’una chjama à prughjettu « Una nascita-Un libru » urganizatu da a Cullettività di Corsica...Quand’ella sprime u so arte, Noëlle Casabianca ùn cerca micca à fà si valè. Solu à mette in vale, u so sensu artitistu arrimbatu nantu à u diminiu spirituale chì, co vole à dilla, hà sulcatu a so vita sana. Ma hè capace di travaglià nantu à d’alre tematiche (cuncepisce logò, face pitture di zitelli o opere più muderne…)

U so arte saria u testimoniu prufundu d’un’emuzione chì và aldilà di a cuscenza umana. Cusì sò nate, l’annu scorsu trè opere, duie nantu à i Santi Patroni di Carghjese (San Antone cù a pittura à l’oliu, San Spiridon à u canavacciu) è a Vergine in canavacciu. Fora di què, l’artista travaglia nantu à una seria di pitture à l’aquarelli dedicate à e ghjesge di Corsica. « N’aghju fattu quattru per avà : a catedrale d’Aiacciu, u battisteriu San Ghjuvà, a ghjesgia di Bastelica è a ghjegia latina di Carghjese. Una manera per mè di lascià un testimoniu di u patrimoniu religiosu isulanu è, à tempu, di a so architettura. Issu patrimoniu hè unu di i più belli arnesi per prumove a Corsica aldilà di a so sola dimensione religiosa. Aghju vulsutu, à modu meiu, valurizà issu patrimoniu. »

A tecnica aduprata hè quella di l’aquarelli è di u canavacciu cù detagli precisi o pochi chjari, un mischiu d’elementi chì portanu à l’inseme un effettu particulare. « Una manera dinò di mantene l’intensità di i culori è a precisione di i detagli... »

Un travagliu intimu chì ci porta ver di un genaru d’iniziazione…
Partager :