• Le doyen de la presse Européenne

Ferraghju di u 1967 : a Lezziò di a Selezzione corsa à a squadra di Francia

U 27 di ferraghju scorsu marcò un anniversariu particulare, quelle di a famosa partita trà Francia è Corsica, a sola di a storia di u ghjocu à ballò naziunale.
Ferraghju di u 1967 : a Lezziò di a Selezzione corsa à a squadra di Francia


U 27 di ferraghju scorsu marcò un anniversariu particulare, quellu di a famosa partita trà Francia è Corsica, a sola di a storia di u ghjocu à ballò naziunale. Quarantacinque anni dopu, nimu si ne scurdatu in Corsica…


Semu à l’iniziu di u 1967. À s’epica quì, ùn si tratta, in Francia, nè di vince a cuppa di u mondu nè di supranà u ghjocu à ballò in Auropa. À dilla franca, sò tempi di bughjura per a Francia cacciata da l’eliminazione à l’Euro dapoi u 1960, è à primu giru di a cuppa di u mondu di u 1966 un annu nanzu. Semu belli luntanu da i percorsi d’oghje.

Di fattu, Just Fontaine, anzianu internaziunale, hè stallatu à u capu di a selezzione per scambià l’usi è dà un’altra dinamica à una squadra chì hè di capu ind’a conca. Hè cusì chè, per appruntà un macciu di fronte à a Rumania u 26 di marzu, ch’ellu principia in u so rolu novu cù una partita contru à una squadra corsa.


A terza squadra corsa di a storia

Quattru anni nanzi, un primu macciu (Corsica-OGC Nice 1-0) nasce per a selezzione di a Testa Mora in sustegnu à u drama di u Renosu. È un altru 18 mesi dopu (Corsica-Reims 1-1) in u quadru di e festività di a Federazione di i Corsi di Pruvencia. Cù l’aiutu di dui tercani internaziunali, Dumè Colonna è Antone Bonifaci. Ma, senza alcunu cuntestu puliticu, masimu à l’epica, ghjucà contru à a Francia hè qualcosa in issi tempi quì, di strasordinariu. À l’iniziu d’issu prughjettu, Victor Sinet, ghjurnalistu di prima trinca (L’Equipe, France Football), è chì t’hà entrate da per tuttu in u mondu di u ghjocu à ballò. Fontaine dà u so accunsentu per un macciu in Marseglia prugramatu u 27 di ferraghju. U primu di i quattru ch’ellu gestiscerà ind’una carriera abbastanza corta.

À u capu di a squadra corsa, Paulu Sinibaldi anzianu purtieru di Reims. Una selezzione cumposta di ghjucadori dighjà famosi. À maiò parte stanu in Corsica. Sette ghjocanu à u SECB (Orsatti, Vincenti, Cornu, Sansonetti, Gandolfi, Vescovali, Camadini). Quattru à l’ACA (Marcialis, Pietri, Peretti, Vannucci) è dui à u GFCA (Pariggi, Alfonsi). L’altri sò à Nizza (Marchetti, Serra), Bordeaux (Leonetti, Peri), Stade de Paris (Rustichelli), è Aix (Rossi). U scopu hè d’oppone un ghjocu di qualità à a squadra di Francia purtata da Gondet, Simon, Blanchet, Loubet, Dogliani, Carnus…


« Lasciateli marcà »...

In u so edituriale di « L’Equipe » di u 27 di ferraghju, à l’occasione di a presentazione di u macciu, Victor Sinet scriverà u titulu in lingua nustrale : « Forti saremu si uniti semu ». Un pruverbiu corsu chè i ghjucadori anu da mette in appiegazione da a prima à l’ultima seconda di u macciu. Just Fontaine dumanderà à Paulu Sinibaldi d’aduprà li stessa tattica chè i Rumani cù Marcialis incaricatu di a recuperazione (N6). Quellu spiegava quindeci anni fà «Chè tanti Fontaine ! Dopu à 10 minute di ghjocu, aghju ghjucatu cume d’abitudine »

Un macciu particulare per tutti è masimu quelli chì fermanu oghje. « Quand’è no semu entruti nantu à u terrenu, spiega Paulu Orsatti, ci hè statu un sintimu di fiertà, qualcosa ch’ùn si pò capisce. Durante l’innu, 15000 persone eranu arrite. Per noi, pudia esse u Brasiliu, ùn pudiamu perde issa partita. »

Sansonetti è Serra, i dui ghjucadori ch’anu marcatu sò sculpiti ind’a storia cum’è i soli à avè fattu tremà e rete d’Eon è Carnus. « Lasciateli marcà, lasciateli marcà », lampavanu a ghjente...Oghje, quaranta cinque anni sò passati. È s’ella viaghja a storia cù a rinascita in u 2009 d’una nova squadra corsa, quella di u 1967 induve parlavanu tutti corsu trà elli nantu à u terrenu è in a vita, hè per sempre inde e memorie isulane. Niente chè per avè battutu a Francia. D’altronde, a selezzione naziunale ùn hà mai più ghjucatu contru à una squadra corsa…

Ph.P.
Partager :