• Le doyen de la presse Européenne

Autunumia : u Cullettivu Parlemu Corsu vole participà à e discussione

U Cullettivu purtatu da Micheli Leccia s'hè mubilizatu a settimana scorsa à l'occasione di a visita di u Ministru di l'Internu.
Autunumia : u Cullettivu Parlemu Corsu vole participà à e discussione


U Cullettivu purtatu da Micheli Leccia s’hè mubilizatu a settimana scorsa à l’occasione di a visita di u Ministru di l’Internu. Cù un scopu precisu : participà à e neguziazione è mette a lingua corsa à u centru di e rivindicazione…


Daretu à a bandera ch’è noi li cunniscemu dapoi tanti anni, « Cuufficialità », i respunsevuli di u Cullettivu « Parlemu Corsu » eranu prisenti, a settimana scorsa davanti à l’Assemblea di Corsica. « Vuliami fà d’issu ghjornu, un ghjornu impurtanti, spiega Micheli Leccia, capimachja di u Cullettivu, nanzi à tuttu, semi sulidarii di a famidda Colonna, aspittemu ghjustizia è verità. In tantu, aspittaiami da u Statu ch’eddu vinissi micca quì à fà neci è intrappulà tuttu u mondu. »

Dopu à una visita di qualchì ghjornu da u Ministru di l’Internu, l’avisi sò diversi, in u mondu puliticu è, aldilà, da per tuttu in a sucetà civile. « Di primu abordu, aghjusta u capimachja di u Cullettivu, ci saria, da veru, a vulintà di sbuccà nantu à una suluzioni pulitica. À dilla franca, ùn avemu micca i garantii chì s’hà da fà ma più u Statu faci l’annuci ch’eddu voli andà in isu sensu quì, più sarà difficiuli par eddu, di vultà in daretu. No, cuntinaremu à metta a pressioni. »


« A lingua corsa ci pari issinciali in u prugettu di sucetà »

U ghjornu stessu di e reunione trà Gérald Darmanin, l’eletti di Corsica è d’altri di a sucetà civile, i membri di u Culletivu « Parlemu Corsu » avianu chjamatu à un’adunita, ghjust’à puntu per fà valè e rivindicazione ch’elli portanu dapoi anni è anni. Cù, in core, l’avvene di a lingua corsa è a cuufficialità cum’è scopu per mantenela. « Ci hè una vulintà d’apri i discursati à i forzi vivi è allargà a cuncertazioni. Ci pari dunqua nurmali chì u cullittivu « Parlemu Corsu » ci fussi sopratuttu pà purtà a rivindicazioni di a lingua chì hè issinciali in u prugettu di sucità. A lingua corsa devi essa à u cori d’issu prugettu. A lingua, hè l’anima di u populu corsu... »

Di fattu, e cundizione, ci vole à dilla, storiche, chì portanu, forse, a Corsica ver di un’altru destinu anu permessu u nove di marzu scorsu, a creazione d’un cullettivu chì adunisce i pulitichi ma micca solu. « Ci hè, forsa, a pussibilità d’avanzà ma par avà, ùn semu micca stati invitati à issi neguziazioni. L’eletti anu una certa legitimità pà purtà li ma quandu si parla di cuncertazioni di a sucità civili, « Parlemu Corsu », chì hè riprisentativu di a sperienza di u tarrenu, ci tocca à participà, ancu à nò, à issa mossa storica, ùn ci pudemu micca cuntintà di misuri ancu s’eddi sò simbolichi forti... »

Si tratta, di sicuru, di a cufficiliatà di a lingua corsa à parità cù u francese. « Ma, privene Micheli Leccia, l’impurtanti hè u cuntinutu par avè u corsu da per tuttu in a sucità è, à tempu, dà un sensu à issu prugettu. »

L’ultime parolle di u Presidente di a Republica per ciò chì toccaria à l’evoluzione stituziunale di a Corsa « La langue de la République, c’est le français », ci mostra chè a strada ver di l’autunumia è un veru statutu per a lingua corsa, hè sempre longa…

Ph.P.
Partager :