Sapé Fà : Cunserveria "Anatra" : a ricerca di l'eccelenza

Cunserveria « Anatra » : a ricerca di l’eccelenza

Stallatu in Furiani cù Aurélie Orsini, a so cumpagna, Christophe Guegen-Marcantoni, prupone una gamma di preparazione artisgianale per cunfitture chì si ponu accuncià à modu gastrunomicu : Anatra…


A sapemu chè a ricerca di l’eccelenza, d’un sapè fà è d’una qualità maiò di prudutti, face parte oghje di e priurità di quelli artisgiani è pruduttori primurosi di stallà si è di principià un’attività. À spessu, è l’avemu pussutu misurà in questa rubrica, lentanu tuttu per cummencià un percorsu novu…

Christophe Guegen-Marcantoni hè di quessi. Cucinaru di mistieru è patronu d’un’usteria in Bastia, decide, in u 2012, di francà u passu. « A me cumpagna passava un master 2 di scenze è di l’arte in Ecchisi, spiega u respunsevule, avia, per contu meiu, clienti chì pigliavanu u tempu di manghjà sopra piazza è d’altri (duttori, dintisti, amministrativi…) ch’eranu pressati. Mi tuccava dunque à fà sosule da purtà, ciò chì mi pigliava monda tempu.Avemu riflettutu cù a me cumpagna eppo avemu decisu di scambià d’attività. »

L’idea d’una cunserveria face a so strada. Anatra hè in marchja. « Un nome sceltu per rapportu à i fecati grassi ch’eu faccia à l’usteria. L’avemu dinò tenutu per a ghjente chì t’hà difficultà à parlà in corsu. Hè una parolla abbastanza faciule da prununcià. Eppo, l’anatra, hè un acellu chì li piace à viaghjà...Simu pertuti nantu à què è masimu issa nuzione di viaghju... »


Agrumi, frutti, licumi è cundimenti...

Cù, solu per avà, l’agremente vegetale, u coppiu dedide di tene u listessu nome per principià a so attività nova. « Pudiamu fà cunfitture, salse à a pumata, suppe, u tuttu in giru à frutti è licumi ma micca elementi animali. Ghjunghjerà da quì à u vaghjime prussimu. »

Christophe è Aurélie principianu u so travagliu ind’una rimessa adattata in attellu cù e norme auropee necessarie da sottu à a so casa. Ma subbitu, u coppiu t’hà sempre l’eccelenza in capu ! Titulariu d’un Brivettu di respunsevule di splutazione agricula, Christophe cummencia à travaglià à a preparazione artisgianale cù una basa di frutti è di licumi, di cunfitture cù pocu zuccaru. « In tutte e nostre preparazione, avemu da 60 à 70 % di frutti è circhemu di sicuru a qualità. Ci sò dinò i « chtunley », spezie di preparazione in giru à un pruduttu (civolla, mele, fruttu, licumu). Avemu vulsutu subbitu seguità u ritimu di e stagione è cercà prudutti corsi. »

Tandu, u coppiu principia cù agrumi (alimea, mandarine, limò, arancie…), una diversità chì li permette, à pocu à pocu, d’esse di più in più creativu è di bulicà i so frutti -mai macinati- cù d’altri prudutti sempre nustrali (mele di castagnettu di François Xavier Ciccoli, civolle di Siscu...)


Sosule in cunserve

Di fattu, un cuncettu « Anatra », ch’impiega solu 4 persone piglia subbitu u so volu. Per prova, i prudutti sò rinumati è entrenu in qualchì stabilimente parrighjinu « Galeries Lafayette », « La Grande épicerie de Paris »...i chjuchi dinò è in Corsica « Da la punta à la Giraglia sin’à Capu Pertusatu » in e spezierie fine. Oghje, dopu à un’attività d’una decina d’anni, i prudutti si vendenu à i Stati Uniti, u Giappone, l’Inghliterra...Cù d’altri prudutti chì sò ghjunti à allargà a gamma (cundimenti, salse à a pumata, una gamma di suppe, salse impiverunate cuncepite cù piveroni piantati da u coppiu in Venzulasca, citrolli…). U tuttu per 120 punti di vendita in Corsicà.

L’avvene ? « Forse sosule in cunserve. L’idea hè di stà ind’a nostra demarchja di qualità è avanzà cusì, à pocu à pocu sempre cù agricultori chì t’anu a listessa andatura chè noi...Cù issa ghjente quì, pudemu cuntinuà à fà cose tamante... »

Un percorsu ch’ùn face chè principià per un’impresa dighjà rinumata.


Ph.P.

Anatra, cunserveria muderna
20600 Furiani
situ : www.anatracorse.com