Sapè Fa : Oltremonti, l'eccelenza di l'oleicultura corsa !
Stallata in Bravone dapoi dodeci anni cù u so maritu, Emilie Boret cuncepisce un oliu di qualità maiò ricunnisciuta, oghje, à u nivellu naziunale è internaziunale.
Sapè fà : Oltremonti, l’eccelenza di l’oleicultura corsa !
Stallata in Bravone dapoi dodeci anni cù u so maritu, Emilie Borel Berta cuncepisce un oliu di qualità maiò ricunnisciuta, oghje, à u nivellu naziunale è internaziunale
A storia di l’oliu Oltremonti, saria d’una certa manera, una bella fola...Una fola chì hè realità. A storia, hè quella d’Emilie Berta, di Bravone è chì vole, un ghjornu di u 2008, travaglià l’oleicultura. Di fattu, pianta mille pedi d’alivi ma ne vole sapè di più nantu à l’attività è cerca qualchissia per custruì un fragnu nantu à u so terrenu. Dopu à consigli da amiche, chjama un certu Ivo Berta, chì esce d’una famiglia d’oleicultori dapoi trè generazione, specializatu, à tempu, nantu à a custruzzione di i fragni. N’hà fattu in Francia, Italia, Uruguai, Maroccu... « L’aghju chjamatu, spiega Emilie, hè ghjuntu...è ne mai più pertutu. »
U coppiu -frà tempu, si sò maritati-si stalla in Bravona è principia a so attività.
2011 : prima racolta
L’alivetu hè di ceppu tradiziunale, vale à dì ch’ellu ci hè un spaziu di sei metri trà ogni pede. Ma a manera di travaglià hè muderna. In u 2013, Ivo face cù e so mani è petra à petra, un fragnu di 450m2. L’arburi cummencianu à dà frutti dopu à trè anni.
« Hè un sapè fà, aghjusta Emilie Borel-Berta, ci vole un alivetu di qualità maiò. Tuttu hè fattu da noi cù arnesi muderni ma sempre cù a ricerca di a qualità è un impegnu impurtante.Ùn ci vole micca à cuntà l’ore.Tagliemu l’arburi tutti l’anni, nittemu l’alivetu è circhemu ad avè alive e più sane pussibile. Adupremu, per què, ingrassi naturali. »
A prima racolta, fatta in u 2011, dà dighjà è dui anni nanzu a custruzzione di u fragnu, resultati. Prestu, ci hè 5 ettari dopu à l’allarghera di u spaziu. Ci sò parechje varietà : a ghjermana di Casinca à di Santa Lucia di Tallà, a sabina balanina è d’altre ghjunte da l’Italia. Ma dopu à stallazzione di u fragnu chì risponde à l’esisgenze aurupee, tuttu hè fattu sopra piazza da l’iniziu sin’à a messa in butteglia. U tuttu cù u rispettu di l’ambiente. D’ottobre, principianu e racolte. Une vintena di persone aiuta u coppiu. Ivo stà in u fragnu è face l’oliu. « A racolta di u ghjornu deve esse trasfurmata subbitu. Osinnò l’oliu hè ussidatu. »
L’alive sò scasciate, lavate, sfracillate è macinate. « Dopu, ci vole à staccà l’oliu da u restu. A messa in butteglia si face di ferraghju. »
Da 15000 à 18000 litri à l’annu
Ivo, ellu, stà guasgi dui mesi in u so fragnu. Ma, una volta messa in butteglia, u resultatu hè d’una qualità tamanta. Per prova, Oltremonti hè statu l’oliu francese numaru unu è u più premiatu in u 2021. À cantu à què, hà ottenutu a seconda piazza à u cuncorsu internaziunale d’Ovibeja (Purtugallu), a quarta piazza in Greccia (Athènes), medaglia d’oru in New-York è medaglia d’argente in Sial (Canadà). « In certi cuncorsi, ci sò persone chì t’anu pruprietà di 150 ettari è chì travaglianu dapoi trè generazione. È li passemu davanti. Hè u segnu di a qualità di u nostru pruduttu. »
L’oliu Oltremonti avia un bancu à l’occasione di l’edizione 2022 d’Arte è Gustu, duie settimane fà in Bunifaziu. Per Ivo è Emilie, chì pruducenu da 15000 à 18000 litri à l’anni è chì sò passati da 5 à 15 ettari, u scopu hè di cuntinuà l’attività ma cercà, à tempu à tramandà. À issu nivellu quì, Théa (12 anni) a figliola, cummencia dighjà à cunnosce u mistieru. « L’alivu hè immurtale. Hè a nostra memoria. Ci vole à tramandà, finisce Emilie. Un oliu è una pruprietà da scopre…
Ph.P.
Oliu Oltremonti
Tristani
20230 Linguizzeta
www.oltremonti.com
mail : emilieborel@oltremonti.com
Cuntattu : 06-29-54-02-65
