• Le doyen de la presse Européenne

Sapè Fà : << La Corsica >> , tutti i savori di i suchji d'agrumu corsi

L'attellu corsu << Frutti è ligumi >> creatu da Jean Do Valentini in Aleria
« La Corsica », tutti i savori di i suchji d’agrumu corsi

L’attellu corsu « Frutti è Ligumi » creatu da Jean-Do Valentini in Aleria, permette di tastà prudutti di qualità maiò (suchji, cuncentrati, cunfitti, sprechji, ghjacci...) à partesi d’agrumi naturali…


Creà una marca nentru à l’attellu corsu « Frutti è Ligumi » in Aleria per mette in vale, cù prudutti accunciati di manera diferente, frutti spiccati da a trafila agrumicola, eccu u scopu di Jean-Do Valentini quand’ellu decide di creà « La Corsica », qualchì tempu fà. « Nanzu, spiega u pruduttore di clementine, i frutti ch’ùn eranu micca aduprati in a trafila, a maiò parte per via di a so taglia è micca da a qualità, eranu ghjittati. Avemu cercatu dunque à cuncretizà una idea per aduprà li quì d’un ‘altra manera. » Creatu in u 2018, u prughjettu hè finalizatu dui anni dopu.

Una prova chì face, subbitu, tombola postu chè a distribuzione maiò, e butteghe specializate o i mercati cercanu issu gennaru di pruduttu. A sucetà travaglia, oghje, nantu à una basa d’agrumi (limò, arance, clementine, limunone…). « Avemu strutturatu l’offerta in trè parte, aghjusta u capimachja di l’impresa, una dedicata à l’aceti in partenariatu cù Valsarte, un acetaiu famosu, una altra gamma di biscuttini cù savori di limò corsi, è una terza parte, liquida quessa quì è spiccata in suchji 100 % frutti, è un pruduttu maiò « Ma divine Clémentine ».


2000 tonne di frutti à l’annu

S’agisce, tandu, d’un suchju acitosu chì face a leia trà u suchju di clementina è un’infusione di nepita. «Una nepita prudutta ind’a casa Orsi in Capicoru. Una volta seccata, femu l’infusione da per noi. Dopu, bulichemu l’inseme è mettimu tuttu in butteglia accunciatu cù un’acqua acitosa cù bucciche fine. U carratteru specificu d’issa bivenda s’arremba nantu à a nostra identità. »

Cusì, l’impresa pruduce à pocu pressu 2000 tonne di frutti à l’annu. Di fattu, l’attellu hè spiccatu in duie parte. Una decdicata à a distribuzione maiò (industralisazione in fusti è sechje) è una in prudutti finiti. Un prughjettu intornu à centu è quattru pruduttori assuciati cù un’usina ch`hà da spuntà da quì à pocu (forse à a fine di l’annu) nantu à a cumuna di Linguizzetta. « Speremu, cù issu sviluppu è issa dinamica, passà à 4000 tonne l’annnu prussimu. » Per ciò chì tocca à a trasfurmazione, da ottu à dodeci (scopu à cortu andà) ci travaglianu. Un attellu stallatu in a Drôme è induve si face a trasfurmazione serà purtatu sin’à Aleria da quì à a fine di l’annu. « U scopu di sulcà issu valore nantu à u territoriu corsu, rinfurzà u tissutu industriale è sviluppà è duie attività à longu andà cù un’offerta di qualità. »

Un prughjettu virtuosu à un nivellu di l’ambiente postu chè frutti chì eranu ghjettati (troppu chjuchi o maiò secondu à l’IGP) sò aduprati d’una altra manera, ma dinò d’un puntu di vistu ecunomicu per l’impresa.

L’attellu « La Corsica » è u cuncettu « Ma divine Clémentine » anu cunnisciutu un successu maiò à l’occasione d’Arte Gustu à a fine d’aprile in Bunifaziu…

Ph.P.



Attellu corsu « Frutti è Ligumi »
50 avenue St Alexandre Sauli
20270 Aleria

bonjour@ateliercorse.fr
Cuntattu : 04-95-33-81-52
Partager :