• Le doyen de la presse Européenne

A currinlingua

A currinlingua 2022 : una altra dimensione 8
A currinlingua 2022 : una altra dimensione !


Guasgi duicentu participanti anu corsu per a seconda Currilingua messa in piazza da u Cullettivu « Parlemu corsu », dumenica scorsu da Aleria sin’à Bunifaziu. Dighjà una riesciuta maiò per l’urganizatori…


Eranu centutrenta à participà l’annu scorsu à a prima edizione di a Currilingua da Cervioni à a Sulinzara. Una prima edizione è dighjà un impegnu impurtante da tutti i participanti, associ, culturali, eletti, urganzatori senza sminticà un benefiziu di 14000 e dedicatu, scopu di u Cullettivu « Parlemu corsu » à iniziativi à prò di a lingua corsa.

Dopu à seconda edizione, dumenica scorsu, si pò dighjà parlà d’una riesciuta maiò. « Aviamu cuntattu nantu à 150 parsoni, in fini, ci n’era 194, spiega Micheli Leccia, capifila di u Cullettivu, frà eddi, guasgi settanta ani dighjà pacatu a so scrizzioni. Ma aldilà, s’hè sintitu un impegnu impurtanti è una participazioni intergeneraziunali. Ghjovani, anziani, ziteddi...Hè segnu chì a manifestazioni hà tuccatu abbastanza mondu. Più chì l’annu scorsu. »


194 participanti

Eppuru, cù u caldu chì facia, ci vulia à esse mutivatu per corre sottu à più di trenta gradii. Senza alcuna paura, è primurosi ghjust’à puntu di prumove a lingua corsa, a squadra 2022 hè pertuta dumenica scorsu versu sette ore è mezu di mane cù u testimoniu à passà à ogni chilometru, cuncettu di a corsa. Ma ci era dighjà un caldu tamantu. « L’ori privisti sò stati rispettati, aghjusta Micheli Leccia, semi ghjunti à novi ora di sera in Bunifaziu nanzi una seratina fistiva. »

Associ, particulari, famiglie, amichi, eletti (qualchì merre è ancu eletti di u cunsigliu esecutivu di a Culletività di Corsica), culturali, eranu guasgi duicentu à participà ma, in tuttu quattrucentu impegnati è à pocu pressu quaranta à u nivellu di l’urganisazione. Da issu cantu quì, si pò dinò parlà di riesciuta cù i spinghjifochi d’Aleria è a Sulinzara, u moto-club di Bunifaziu per apre a strada, è a vittura nera di u « Cullettivu » cù u scrittu « corsa à peda ». L’occasione di marcà u territoriu, di fà qualchì ritrattu è ancu per Micheli Leccia d’accumpagnà, ellu stessu, di tantu in tantu, i participanti.


Dighjà 20000 e di benefiziu

Una riesciuta à u nivellu di l’urganisazione masimu per ciò chì tocca à a securità (una strada periculosa quantunque) è da chì, dà, dighjà idee nove à u capifila di u Cullettivu. « Ne semu dighjà guasgi à 20000 e di benefiziu, hè segnu ch’avemu piddatu un’altra dimensioni in puchissimi tempi. Ci dà, di sicura, qualchì idea per l’annu chì vena. Avemu da aspettà, prima i sciffri di quistu annu è veda, à tempu, di chì manera avemu da pudè investiscia issi solda à prò di a lingua corsa cum’è l’avemu fattu annu. Dopu, ci serà tempa à rifletta à l’annu 2023. Aghju da rifletta à a manera di fà crescia a manifestazioni, forsa cù qualchì chilometru in più passendu à 130 o 140. »

L’eidzione 2022 hè sempre ind’e e mente chè a squadra riflette dighjà à una seguita. Un’iniziativa, quantunque, chì mette in vale, l’impegnu d’una piccula squadra c’ùn aspetta à nimu per circà à prumove a lingua corsa. Purtata, forse, d’una stella chì mantene un filu à un mumentu induve a nostra lingua n’hà u più bisognu…

Ph.P.
Partager :