• Le doyen de la presse Européenne

Francescu Alessandrini , trà passione è usu anticu

A storia di Francescu Alessandrini
Francescu Alessandrini, trà passione è usu anticu

A storia di Francescu Alessandrini, liata, di sicuru, à u sapè fà di i nostri anziani, hè quella d’una passione. D’issu solcu chì vi face, à un mumentu di a vostra vita, francà e muntagne. Cusì, è deci anni fà, Francescu decide di ripiglià qualchì terrenu di u so babbu sopratuttu per salvà li per piantà alivi nantu à a cumunu d’Antisanti induve ellu t’hà e so radiche. A storia di l’oliu d’alivi Alessandrini hè in marchja. Particularità, Francescu si mette à l’alivettu fora di a so attività, vale à dì in dumenicate o in vacanze. « Aghju piantatu quattrucentu arbuti, spiega u pruduttore, è pianu pianinu, avemu sviluppatu a nostra attività. Prima di tuttu, ci era a vulintà d’ùn lascià more a terra, di travaglià la per fà campà l’usi di i nostri anziani. Ùn avia mai fattu què.»

Aiutatu di a so famiglia è di qualchì amicu in tempi di cugliera, Francescu travaglia cù e so mani. « Piazzemu e rete è sbicinemu tuttu cù e mani, aghjusta l’omu, ci piglia di più tempu ma vulemu travaglià à l’usu anticu. Dopu si porta tuttu à u torchju di u fragnu di Mr Rioli in Pruneta. Ellu face a trasfurmazione.»


1500 litri à l’annu

L’oliu aspetta qualchì tempu, l’occasione, nanzu a messa in butteglia, di fà analisi diversi. U resultatu dà un oliu di qualità maiò chì si vende nantu à i mercati (settimanale) o inde butteghe specializate in in prudutti fini. Una pruduzzione di 1500 litri à l’annu. Un oliu assai gustosu fattu cù una varità specifica, a germanda. Dumanda un travagliu impurtante nanzu per nittà un terrenu di dui ettari, taglià l’arburi, coglie (à partesi d’ottobre), è purtà tuttu à u fragnu. Di fattu, Francescu hà scupertu un’attività ch’ell’ùn cunniscia mancu appena. « U scopu era di salvà u terrenu, ci vulia à face qualcosa, aghju avutu l’idea di l’alivettu. Aghju amparatu à pocu à pocu strada facendu... »

È postu ch’ellu travaglia fora d’issa attività quì, averà messu di più tempu per ottene resultati. Masimu chè, fora di a cugliera è di qualchì aiutu, face tuttu da per ellu. Ciò ch’ùn l’impedisce micca d’ottene l’AOP « Avemu aspettatu trè anni nanzu d’avè a prima cugliera, s’hè passata bè. Oghje, cuntinuemu l’attività postu ch’aghju pussutu piantà d’altri arburi. A crisa di a Xylelia ùn ci hà micca troppu toccu,a pruduzzione ùn hà micca suffertu... »


Allargà a struttura

Oghje, è malgratu e difficultà maiò liate à tuttu ciò chì tocca à l’agricultura, Francescu Alessandrini ùn vole micca cunsacrà si solu à l’alivettu. « Hè una scelta, pensu chè issu mistieru hè abbastanza duru, masimu per mè ch’eu passu tutte e mo vacanze è dumenicate à travaglià nantu à u terrenu è ci hè sempre qualcosa à fà cum’è, in in tempi d’oghje, prive a sicchina…Fà solu què, innò, sò solu è dumanderà troppu impegnu ma forse allargà a struttura. Hè per quessu ch’aghju piantatu d’altri arburi chì puderanu dà oliu da quì à trè anni. »

Dece anni dopu avè piantatu i so primi arburi, Francesc Alessandrini hè intraccia di riesce a so scumessa. Per prova, hè statu ritenutu, frà d’altri pruduttori, per participà à a manifestazione « Arte Gustu » u primu di maghju scorsu in Bunifaziu…


Ph.P.

Francescu Alessandrini
Pruduzzione d’oliu d’alivu AOP
Lieu dit Mori
20270 Antisanti
Partager :