• Le doyen de la presse Européenne

Sapé Fà : Testa maura, i prufumi << nustrali >> di Saveriu Torre

Prufumi chi si vendemu, oghje , in u mondu sanu......

Sapè Fà  : Testa maura, i prufumi « nustrali » di Saveriu Torre



Stallatu in Carticasi, induve ellu hà e so radiche, Saveriu Torre cuncepisce, dapoi u 2008 prufumi di qualità maiò cù a so marca « Testa Maura ». Prufumi chì si vendenu, oghje, in u mondu sanu...



Ùn si pò dì, di a storia di Saveriu Torre, ch’ella hè qualcosa di cumunu. Specializatu inde l’arte puetanu, issu omu chì t’hà e so radiche quassù in Carticasi à mezu à u Boziu, hà viaghjatu in u mondu sanu. Hè in tutte isse sperienze ch’ellu hà sempre tenutu in core à ellu, una spezia di nustalgia. L’odore, u prufumu di a natura corsa. Hè cusì ch’ellu face a scelta, in u 2008, di creà « Testa Maura », una marca di prufumi cuncipiti à partesi di pianti, fiori è frutti di l’isula. Ma l’omu hà subbitu l’idea di fà qualcosa di maiò. Un arte ch’ellu mette à u serviziu di u so sapè fà. « Aghju seguitatu una furmazione artistica, spiega l’artisgianu, ma pensu chè tuttu hè liatu. A musica, a pittura, a scultura, i prufumi, tuttu hè spressione artistica. Ma u prufumu seria u più vicinu di a memoria. Aghjustu vulsutu creà issa marca quì per cuntà a Corsica, à modu meiu. »


Lià a natura corsa è u lussu

In u 2008, tandu, Saveriu Torre mette in piazza u so attellu in...Carticasi è principia a so attività. Si vole scartà da ciò chì si face in u mondu di a prufumeria. « U scopu fù, subbitu di lià a natura corsa è u lussu. I dui ponu andà inseme. »

L’artisgianu cummencia à cuncepisce i so prufumi cù l’odori isulani. Cusì, travaglia a murella, u listincu, l’agrumi, a nepita, a clementina. Una spezia d’alchimia postu chè li tocca à coglie, distillà, per chjappà, à mezu à tanti prudutti, l’odore chì li cunvene. Un arte...Ma l’omu ùn vole sparte i so sicretu. « In u prufumu, ci sò tante materie, prudutti. Ci hè un rapportu particulare à a memoria, vestesi, mustrà si, prutegge si. Hè qualcosa d’intimu. Nantu à a pele, certi odori spariscenu, fermanu quelli ch’anu da stà. Eccu, d’una certa manera, u « sicretu ». Ma u me sapè fà, fruttu di tante è tante prove è sperienze, un tengu per mè. »


Auropa, Stati Uniti, China...

Saveriu Torre s’arremba dunque nantu à l’odore di a natura corsa circhendu sempre una qualità maiò. Ma cerca dinò pruduttori di qualità per ciò chì tocca, per indettu, à l’oliu essenziale (i frattelli Caux, Petru Alessandri)...Bulicheghja assai materie per dà nascita à i so prufumi. In fine, tuttu parte da Carticasi. L’omu hè ricunnisciutu, oghje in tantu chè maestru artisgianu, ciò chì li dà, una nuturietà tamanta à mezu à i creatori in più grandi. Sparghje i so prudutti in u mondu sanu : Auropa, China, Giappone, Stati Uniti... « Aghju 20 o 30 prufumi di basa è mi possu adattà secondu à i paesi.Ci hè sempre un modu di spressione liatu à a memoria. »

L’artisgianu hà fattu, dinò, a scelta di dà à i so prufumi, nomi di paesi di Corsica. Una manera di lià u so arte à a Corsica. : Aleria, Casta, Loriani, Carticasi...À tempu, ci sò d’altri prudutti cum’è l’oliu Capo di Feno è d’altre cullezzione dedicate à u corpu (Bucolica, Corsica Colonia…). I prudutti si vendenu in ligna o in qualchì butteghe specializate. Issu travagliu olfattivu è u so sapè fà, facenu, oghje, di Saveriu Torre, u primu creaore 100 % bio di l’alta prufumeria. Un rinnovu di l’arte di a prufumeria artistica. È una manerà di mustrà tutta a qualità di i nostri artisgiani.


Ph.P.

Xavier Torre, 20244 Carticasi
Tel : 06-10-61-30-40
www.testamaura.com
Partager :