L'Avvinta : l'estru novu di a canzona corsa

L’avvinta : l’estru novu di a canzona corsa

Natu inu 2019, issu gruppu isulanu chì piglia e so radiche in Aiacciu è u so circondu, face, à pocu à pocu a so strada. Un primu dischettu puderia esce da quì à pocu. Eppo a squadra hà avutu a furtuna di participà, cù Kendji Girack à « Corsu Mezu mezu 2 »…


Sò cinque cum’è i diti di a manu, uniti cum’è quessi è anu fattu a scelta di creà trè anni fà, un gruppu : l’avvinta. À l’iniziu d’issu prughettu, dui amichi : Antoine Parodin, chì face a so strada in l’universu di u cantu corsu, è Laurent Matteaccioli. « Ci cunniscemu dapoi u culleghju, spiega u primu, avemu sempre circatu à scrive, cumpone è cantà. »


Ver di un primu dischettu ?

Di fattu, i dui capimachja di u gruppu anu dighjà un percorsu tremende à un nivellu classicu : dece anni di cunservatoriu (ghitarra) in Aiacciu per Antoine, listessu ma per a voce è in Nizza per ciò chì tocca à Laurent. Tandu, si vede subbitu, ascultenduli, chè l’affare tene più chè a strada. È cum’elli sò capaci tutti i dui di scrive è cumpone, l’idea di creà un gruppu spunta trè anni fà. Laurent chjama à qualchì amicu (Lisandru Bonini, Don Louis Castola-Luccioni è François Muraccioli). È l’avvinta face i so primi passi nantu à a scena di u Spaziu Diamante. « Avemu circatu sopratuttu à fà ci piacè, aghjusta Antoine Parodin, di fattu, avemu pigliatu subbitu a nostra andatura. »

Appena frenata in pienu vole, da a crisa sanitaria, u gruppu novu hà aspettatu a so ora per vultà. Frà tempu, ne hà prufitatu per scrive è cumpone. « In trè anni,avemu dighjà una decina di canzone chì sò pronte. E tematiche sò intornu à a sucetà d’oghje ch’è noi pudemu trattà secondu à a nostra sensibilità. »


« Catena » cù Kendji Girac

Cusì, sò nate qualchì canzona cum’è « I campu », « Scopre », « Stende l’ale »...Antoine Parodin, Laurent Matteaccioli ma dinù persone rinumate cum’è Ghjacumu Fusina, scrivenu i testi. Sò Laurent è Antoine à cumpone a maiò parte di e musiche cù, ci vole à dilla, una certa qualità. Hè d’altronde, issa qualità chì hà permessu à u gruppu di fà una passu tamantu nantu à u so percorsu. Di maghju scorsu, Antoine riceve un colpu di filu. « Aghju pensatu prima, à una macagna chè a persona dumandava s’è noi vuliamu participà à u prughjettu « Corsu mezu mezu 2 ». Eppo avemu vistu chè l’affare era seriu. Tandu, avemu participatu à issu bellu prughjettu. »

A squadra hè andata à u studiò « La Source » in Carbuccia per registrà « Catena ». À tempu, Kendji Girac hà registratu a so parte da u so cantu. « Semu stati ricivuti da Patrick Fiori è Ghjuvan Carlu Papi chì sò stati bravissimi cùn noi. Fù dighjà una bella sperienza. »

Eppo ultima bella surpresa, un filmettu fattu vicinu à a Castagna, cù u cantadore. « Avemu registratu a canzona cun ellu. Ci sò state parechje prese. Ma frà tempu avemu scambiatu cun ellu. Hè una persona strasordinaria, aghjusta Antoine, e culture sò vicine. Cunniscia qualchì canzona di Tino Rossi...È ancu u famosu « Valsu aiaccinu ».

Dopu à issa sperienza tamanta, a squadra di « l’avvinta » hà ripigliatu a so strada. U gruppu travaglia sempre intornu à i so prughjetti è appronta un dischettu chì pudaria esce à u principiu di u 2023. Frà tempu, ci serà manera di stà à sente isse voce linde…

Ph.P.