• Le doyen de la presse Européenne

Sapé Fà : Cédric Boa l'artisgianu à l'artisturi

L'arte di l'incartadore
Cédric Boari : da l’artisgianu à l’artistu


Stallatu in u quartieru di a Citadella in Bastia, Cédric Boari rinvivisce una tradizione chì spa-risce in Corsica è in u mondu mudernu : l’arte di l’incartadore…


U mistieru d’artisgianu dumanda, nanzu à tuttu, d’esse passiunatu da ciò chì si face. Ma, à spessu, omu pò truvà una leia famigliale. Per ciò chì tocca à Cédric Boari, di ceppu bastiacciu, oghje incartadore, hè statu ciuttatu, da zitelli, in stu bagnu quì. « U mo babbu facia stu mistieru, spiega l’artisgianu, avia travagliatu à quattordeci anni in Marseglia. Ghjuntu in Bastia, in l’anni settanta, s’era stallatu quì, vicinu à a citadella, ind’un lucale di u mo arci babbone da u cantu di mamma, per fà u so mistieru è ripiglià u ceppu di u so babbu. »


Un rapportu strettu cù l’arte

Di fattu, Cédric ùn hà mai vulsutu piglià stu versu quì. Hà fattu i so studii è principiatu un’attività nantu à l’alberghi. Eppo, travagliendu cù u so babbu, l’hè ghjunta, à pocu à pocu, a voglia di fà stu mistieru. Cù, ci vole à dilla, tutte e qualità dumandate per iss’attività quì. « Hè qualcosa chì hè ghjuntu d’un colpu. Ma dinò una passione fighjulendu travaglià u mo babbu è un rapportu particulare cù i so mobuli. Sempre prontu à rinuvà li. Ci hè qualcosa chì s’assumiglia à l’arte. Un ghjornu ch’ellu mi dumandò di compie unu di i so travagli, hè quì ch’aghju avutu a revelazione. A ghju principiatu à travaglià stu mobule eppo ùn aghju mai più piantatu iss’attività. Face più di vinti anni... »

Stallatu ind’u listessu lucale, una manera di fà una leia cù i so anziani, l’incartadore di quarantadui anni, hà trova a so strada. Oghje, dopu à parechji anni di sperienze, una furmazione è, di sicuru, u sapè fà di u terrenu chè nulla ùn pò rimpiazzà, Cédric Boari hè rinumatu. D’una sola uchjata, hè capace di vede ciò chì ci vole à fà nantu à un mobulu, un futtogliu. Ci hè dinò, un rapportu cù a storia, a tecnica... « Ogni mobule curresponde à una perioda : Napuliò, Voltaire, Louis XIV. Ma possu, di sicuru, travaglià ancu nantu à mobuli muderni in coghju o altra materia per indettu. »


Adattà si à ogni mobule

S’ella ci hè una tecnica di travagliu, a manera di praticà dipende di l’ugettu. « Ùn ci hè mai dui mobuli listessi. Ci vole dunque à adattà u so sapè fà, a so tecnica à u mobule. Quellu, vi conta sempre a so storia. » Quand’ellu face a resturazione d’un ugettu, l’incartadore sfoglia qualchì pagina di a so storia. Un mistieru chì, appena sparitu ch’ell’ùn currespundia più à a vita d’oghje, masimu cù mobuli, ugetti à « bon prezzu » ma senza qualità. Un rapportu particulare cù a vita.

Sò dinò è aldilà di sapè fà, manere d’esse chì si ne vanu…

Rinvivitu à pocu à pocu, u mistieru s’hè adattatu à a vita ughjinca. In tutti in casi, Cédric, ellu, riesce à mette a so grinfia nantu à ciò ch’ellu face, a so manera di travaglià u legnu, u coghju. Riesce à fà una leia trà eri è oghje cù mobuli anziani è classichi, rinuvati di manera muderna senza ch’elli perdenu u so estru anticu. Ciò chì dà, per indettu, Futtogli Voltaire rinuvati cù assai culori vivi. Eccu a stampa d’un incartadore chì diventa un artistu. « Ci hè una misura da truvà trà a cunniscenza, u rispettu di l’ugettu è a manera di travaglià lu. Ùn si pò fà n’importa chè ! Quandu qualchissia vi porta un futtogliu di a so mammona, un vole ritruvà cù i listessu spiritu...Per indettu, ùn toccu mai i picculi colpi nantu à u legnu. Hè un pezzu di a storia di u mobule. »

Cù dui aghi, bicullu è stoffe, è aghjustendu

U so amore di stu mistieru, Cédric Rinvivisce i mobuli. È què, si chjama l’arte.



Ph.P.



Cédric Boari, incartadore
Corsu Favalle
20200 Bastia
Tel : 04-95-32-39-92
Partager :