<< Incantesimu >>, a canzona per prumove l'arte musicale corsu
Creatu qualchi annu fà è ricunnisciutu à l'occasione di l'emissione << The Voice >>
« Incantesimu », a canzona per prumove l’arte musicale corsu
Creatu qualchì annu fà è ricunnisciutu à l’occasione di l’emissione « The Voice », issu gruppu cumpostu Ghjaseppu Antò Pastinelli, Florian Guidicelli è Yvan Hébert, face a so strada in l’universu di u cantu corsu. Cù, ci vole à ricunnoscelu, una certa qualità…
À l’iniziu, ci era una passione per u cantu. Semu in u 2016. Ghjaseppu Antò Pastinelli riceve un colpu di filu d’una persona chì li prupone di participà à l’audizione di l’emissione « The Voice ». « Prima, ùn ci crediu micca, spiega u ghjuvanottu, ma dopu, quandu aghju vistu chè l’affar era vera, aghju datu u me accunsentu ma cù l’altri membri di u gruppu « Incantesimu » ch’aviamu fattu dui anni nanzu. »
Da « The Voice » à e prime cumpusizione
Cantadore è musicante, Ghjaseppu Antò adunisce i so dui cumpagniFlorian Guidicelli (chì sona di ghitarra) è Yvan Hebert (Pianò) è u gruppu principia un bellu percorsu. A stampa di u gruppu hè di ripiglià canzone corse o altre è fà le à modu soiu. Vale à dì aghjustà sunurità chì li piacenu. « Pò esse u rock, u jazz, u pop. »
Cusì, i trè cumpagni anu cumenciatu cù una ripresa bulichendu u corsu è l’inglese, di a famosa canzona « Zombie ». Nantu à a scena di « The Voice » anu cantatu Springsteen è d’altri musicanti famosi. È strada facendu, anu decisu d’impegnà si di più à prò di a musica, sempre nantu à so filu artisticu. Dopu à a sperienza « The Voice », u gruppu hà fattu u so nome. Cusì, nascerà subbitu un primu « filmettu » « Même si » in francese induve si sente l’inflenza folk di l’inseme. In a seguita, i trè cumpagni anu cumenciatu à scrive, cumpone in corsu, in inglese è in francese è cullà nantu à e scene isulane. Nasceranu qualchì canzona cum’è « Di li to passi », « Mare pienghje », « Disegni », « Un mondu à sparte ». Ma ghjè a canzona « Fate » chì ferà, di ghjugnu scorsu, a riesciuta di u gruppu. Dopu à « Même si » è « Di li to passi », stu terzu « single » hè particulare. « Dopu à tanti mancanze di core è accidenti induve 50000 persone morenu tutti l’anni in Francia, l’idea era di fà valè l’impurtanza di massà a ghjente chì t’anu una mancanza, ma arrimbà si nantu à un certu ritimu (120 pulsazione à a minuta…).
« Fate », per prumove i primi ghjesti di sicorsu
À u principiu di l’annu, l’uspidale di Bastia chjama l’aiutu di u gruppu. « Avemu avutu l’idea di creà una canzona arrimbata, ghjust’à puntu, nantu à e pulsazione di u core. U scopu era di sensibilizà a ghjente nantu à a necessità di i primi ghjesti di sicorsu chì ponu salvà à qualchissia. »
U prughjettu hè statu messu in piazza cù u sustegnu di a Cullettività di Corsica, di l’ARS è di i spinghjifochi di u Cismonte. Dopu à una perioda assai difficiule per via di a crisa sanitaria, ciò ch’ùn hà micca impeditu u gruppu di travaglià, « Incantesimu » hà urganizatu unepochi di cuncerti cum’è quellu di l’Albore à a fine di u 2021. U gruppu, custituitu, avà di Ghjaseppu Antò è Yvan, hà appruntatu u so giru 2022 passendu per Santa Reparata di Balagna, Saone, Eccica è Suarella, u spaziu culturale « La Ruche » in Aiacciu, hà cantatu in leia cù u ghjovanu Paulu Vintimilla è participatu à u famosu festivale di a canzona corsa, à u principiu di a settimana nantu à scena di u Casone in Aiacciu. Ci seranu, di sicuru, d’altre date. Una strada principiata cù « The Voice » in u 2017 è chì puderia sbuccà nantu à un primu dischettu...Niente chè per incantà u so publicu…
Ph.P.
