• Le doyen de la presse Européenne

Sapè Fà : L'universu artisticu d'Isabelle Carbuccia

Stallata dapoi sette anni in Biguglia.....
Sapè fà  : L’universu artisticu d’Isabelle Carbuccia


Stallata dapoi sette anni in Biguglia, issa creatrice chì hà travagliatu parechji anni in a moda, hà fattu a scelta di l’arte. Cuncepisce tele è burchji chì si vendenu in u mondu sanu…


Ùn hè tantu faciule d’ùn piglià a strada di l’arte quand’è voi sete statu ciutattu, zitellu, in iss’universu quì. Di ceppu bastiacciu ma cù radiche in a Gravona (da u cantu di u so arci missiavu), Isabelle Carbuccia hè cresciuta in u mondu di l’arte. « A me mamma facia a pittura, spiega a creatrice, eppo ind’è noi, ci era di tuttu : musicanti, cusgitura, fotografia...Di fattu, l’arte s’hè impostu di manera naturale per mè... »

Zitella è ghjovana, l’artista cuncepisce dighjà picculi mudelli, tagliati è aghjunti. Seguita, di sicuru, un percorsu scularu in stu filu quì. Nanzu d’esse scritta ind’una famosa scola di moda in Parrighji. Finalmente, face un’altra scelta, forse ùn era pronta, è ripiglia qualchì annu dopu. Frà tempu, hè diventata mamma. « Mi sò cuncentrata nantu à issa vita quì chì ci piglia monda tempu. »

Isabelle face a so strada è cuncepisce una ligna di panni monda rinumata chì si sparghe aldilà di a Corsica. À tempu, face a pittura, ma solu per u so piacè persunale... « Di fattu, aghju sempre avutu un rapportu particulare cù iss’arte quì. Forse qualcosa chì piglia e so radiche in u me imaginariu. Sei anni fà, un amicu mi dumanda di cumprà una tela. Ùn hè micca u rapportu à i soldi, ma hè statu una spezia di ricunniscenza di a me strada. Aghju piantatu tuttu per mettemi à pinghje. »


Da a tela à a ceramica

Stallata in Biguglia, l’artista hà accunciatu u so appartementu spiccatu in dui cù una parte scambiata in galleria. Isabelle Carbuccia pò aduprà tutte e tecniche da l’acrilicu à u pastellu. I stuvigliu dinò ponu scambià : cultellu, pinnellu, mina. Ogni volta, mette a so grinfia cù foglie d’oru, rasgina, petre nobile. « Mettu assai tecniche sfarente, hè un attu di libertà. »

U so stilu hè particulare. Pò passà d’un ochju culuritu o micca nantu à un fondu grisgiu à visi di donne appena astratti, culori più vivi, fiori, qualchì animale dinò... « Mi piace monda à ghjucà cù i culori, e tecniche. Hè l’emuzione chì guida i me passi...A tecnica pò vene da l’esteticu di l’anni 50 è d’un arte più mudernu, ughjincu. »

Subbitu, l’arte d’Isabelle Carbuccia hè ricunnisciutu. In Corsica ma sopratuttu aldilà. E pitture si vendu in Parrighji, in Suizzera, Ingliterra, Dakar, è ancu sin’à in Stati Uniti !

À tempu è dapoi cinque anni l’artista decide di creà una gamma di burchji, creati in Pruvenzia (terracotta, purzellana…) ch’ella pinghje da per ella arrimbatu nantu à e so credenze. « U burchju, ghjè a tela chì giranduleghja. U cuncettu ùn scambia micca. Facciu, prima u disegnu di a forma ch’eu vogliu. Una volta fattu, scegliu culori o tematiche. Ci ponu esse Madonne, paternostri…Ci hè una leia cù a me minnana chì facia l’ochju... »

A creatrice produce à pocu pressu 50 pitture è 300 burchji à l’annu. « A ghjente difendenu a ma marca. Hè impurtante di fà parlà di noi aldilà di l’Isula. »

In Biguglia, induve ella stà, l’artista cuntinueghja a so strada. Chì ne serà di a seguita ? A sapemu chè un mondu di l’imaginariu ùn hà limite…

Ph.P.


Isabelle Carbuccia
www.isabelle-carbuccia.fr
Partager :