• Le doyen de la presse Européenne

André Paldacci : a passione di a musica

Stallatu dapoi vintitrè anni in a stretta Fesch in Aiacciu, André Paldacci, mercantu di dischi, campa è face campà a so passione per a musica.
Pocu impreme u generu, cunsiglia, aiuta, prupone in a so buttega induve omu puderà truvà sempre ciò ch’ellu cerca…

Vende dischi, Cd, scagnini, ùn hè tantu qualcosa di faciule dapoi qualchì annu. Masimu chì l’evoluzione musicale cù, ci vole à dilla, una certa puvertà di tantu in tantu, cerca sempre un soffiu novu. In Aiacciu, cù l’apertura di i centri cumerciali in u circondu, lochi sputichi cum’è a stretta Fesch o, di manera generale, u centru di a cità, tene una buttega à longu andà hè un miraculu. André Paldacci, ellu, hè sempre quì dapoi vintitrè anni in u so magazenu « Vibrations », stallatu à u 48 stretta Fesch. Vintitrè anni è dodeci di più s’è noi aghjustemu i so primi passi è una certa sperienza nantu à u Corsu Napuliò à L’Tub, un’insegna famosa à l’epica. « Di fattu, spiega u mercantu di dischi, ùn sò mai statu musicante ma aghju sempre avutu un’arechja musicale, pocu impreme i generi. Ma mi sò sempre piaciute u Rock, u Hard è u Blues… »

Evoluzione, revoluzione è regressione

« Vibrations », un magazenu di discu monda cunnisciutu. « Je viens toujours chez vous quand je suis en vacances, lamperà un turistu abituatu, on trouve toujours ce que l’on recherche. »

A buttega saria cum’è una spezia di sapara dedicata à a musica. Milai di CD, è dapoi qualchì anni, centenai di dischi. « Ghjè à tempu un’evoluzione ma dinò un passu in daretu. Semu passati da u Vinyl à l’iniziu, à i scagnini è dopu i CD. Oghje, hè l’epica di i MP3 è di telecaricà. È vultemu à u Vinyl. Ma i ghjovani, ùn l’anu micca cunnisciutu 30 anni fà. In stu sensu quì, rinculemu… »

Quandu si tratta di stituzione parlendu di « Vibrations », André, ellu, vole stà umile. « Hè una parolla assai forte. Ùn ci hè micca generazione di persone, sò solu dapoi anni è anni. Ma hè vera ch’eu t’aghju una passione tamanta per a musica ! Ùn possu micca imaginà fà altr’affare. L’evoluzione di a prufessione ? Ci vole à adattà si chì e vendite calanu à pocu à pocu. Tandu, mi mettu à aghjustà d’altri prudutti (figurette, corde di ghitarra, qualchì libru, porta chjave…»

Per tene vintitrè anni, Dédé (per l’amichi), t’hà a so « sosula » : ascultà sempre musiche…Tutti i genari. Hè ciò face a so qualità principale aghjustata à so facilità à dà cunsigli, à discorre cù la ghjente è a parlà di musica. Ma cunnosce quantunque a tematica dapoi tanti anni. « L’evoluzione ? Ci hè sempre una certa qualità artistica, ma diciaraghju à 40%...Per u restu, ghjè robba riscaldata senza savore. Una fabricazione d’artisti intornu à una moda…Hè listessu d’altronde per a musica corsa. Ùn hè micca male ma manca quantunque un soffiu novu. Ritruvemu à spessu, listesse armunie, note, voce. Perchè micca pruvà u Rock, Pop, Hard è ancu u Rap cù qualità di scrittura ch’è noi t’avemu in Corsica. Per ciò chì tocca à e vendite, Benjamin Biolay marchja bè cum’è Thomas Dutronc o i cantadori à a « moda » cum’è Kenji Girac. Per i Corsi, Cuscenza, A Pasqualina, Attalà è Celente si sbroglianu bè. Aspettu u primu discu di Contraversu è Fervent (hard-rock)… »

A passione di u cantu hà purtatu Dédé à puntà a porta di Frequenza Nostra un annu è mezu fà. Cusì, ogni luni è ghjovi, da 20.00 à 22.00 è a dumenica (18.00 à 19.00 dedicata à u Hard Rock), face l’animazione cù una squadra rinumata : Xavier Affre, Marcel Petriccioli, Emmanuel Torre Grossa, Karine Bertocchini, Sabine Susini, Didier De Giordano è Dumenica Ciabrini. U mercantu di dischi si dà scopi maiò : assicurà un’emissione di vintiquattru ore. « L’aghju dighjà fattu, basta à gestisce u tempu è ùn dorme. U scopu serà, avà di fà un’emissione ogni scambiamentu di stagione… »

Da l’emissione à « Vibrations », ghjè, per ellu, una manera di mantene un filu principiatu in a so zitellina…
Partager :