• Le doyen de la presse Européenne

<< Acqua Lenghju >> : l'arte di Thierry Calia

Thierry Calia cuncepisce mobuli in legnu gallighjatu di qualità
Sapè fà  : « Acqua Lenghju » : l’arte di Thierry Calia
Stallatu in Purtichju, Thierry Calia cuncepisce mobuli in legnu gallighjatu di qualità. Una passione nata tardi per un omu chì era piuttostu dedicatu à i sciffri…



Passà da a cuntabilità è d’un versu piuttostu scientificu- cù negoziu in biadi è carne-, à un travagliu manuale nantu à u legnu, eccu u percorsu di Thierry Calia. Di ceppu Sicilianu da u cantu di u so babbu è Greccu da a so mamma, l’omu hè cascatu, cum’è tanti altri, inamuratu di a Corsica. « Sò statu sin’à vinticinqui anni in Parrighji, spiega l’artisgianu, ma hè vera ch’aghju trovu quì, in l’isula, appena di i me radiche. »

Anzianu ghjucadore è educatore di rugby (n’hè passiunatu dapoi i so cinqui anni), Thierry Calia, chì hè piuttostu di ceppu intelletuale, scambia d’attività un ghjornu chè u so zitellu era cascatu d’una carrega in PVC. « Si zigulava nantu à a so carrega fora davanti à a casa, aghjusta u so babbu, è d’un colpu, i pedi di a carrega si piegonu ed ellu cascò di capu in terra.Tandu, ci vulia à fà qualcosa. »


Una revelazione


L’artisgianu decide di scambià tuttu u so salonu di fora chì era in PVC. È li vene l’idea d’andà à circà legnu gallighjatu nantu à a rena, vicinu à u mare. « Di fattu, m’hè sempre piaciutu à spassighjà in a natura, ci parla. Basta à ascultà la. Viaghjendu, aghju pensatu à piglià rame di legnu per travaglià le. Cusì, aghju principiatu, à pocu à pocu, un’attività nova. »

Prima, Thierry Calia, riflette à fà piccule carreghe eppo, dopu à cunsigli d’un amicu, s’hè messu à travaglià nantu à issa tematica quì. «Ùn hè statu tantu faciule à l’iniziu ch’ùn sò tantu manuale. Ma possu dì chì hè statu una vera revelazione. »

Cusì, hè nata l’impresa « Acqua Lenghju ». In u so attellu, in Purtichju, Thierry Concepisce parechji genari di mobuli (tavule, carreghe, tavulini, scagni…) travagliati ore è ore. « À un mumentu datu, quand’è voi sete nantu à un ugettu, a passione è a voglia d’esse u più precisu pussibile, piglianu a suprana nantu à a sola nuzione di fà un mobulu.Tandu, ùn contu l’ore. »


Trè mobuli à mese


L’artisgianu passa monda tempu à sceglie e so materie nantu à a rena. L’occasione, à tempu, di spassighjà è di riflette à e so creazione secondu à e rame. Caricheghja tuttu u so fangottu in a so vittura è rientre in casa. Dopu, vene u mumentu di trattà. « Di regula, cù u sale è u ventu, u legnu hè trattatu ma, certe volte, ci hè sempre qualchì mignoculu. Ci vole à fà casu. Sensa sughju, hè ciò chì li dà issu culore particulare.»

Dopu, in u so attellu, Thierry Calia deve liscià, tavunà è certe volte, pinghje e so rame nanzu di fà le siccà. « Possu dinò aduprà legnu più nobile cum’è a leccia à u castagnu. In tuttu, possu fà à pocu pressu, trè mobuli à mese. »

Ogni pezza, hè fatta sopra misura. Nantu à issu puntu quì, l’artistu si lascia purtà da a s imaginazione quandu ellu « scontra » una rama. Nascenu animali, visi. Qualcosa di vivu. Nanzu di vende una pezza, l’artisgianu vole scuntrà è sapè ne di più nantu à quellu chì compra. « Hè quantu à dà qualcosa di vivu. Quellu chì compra ne deve piglià cuscenza. »

In e so spassighjate, Thierry Calia rende dinò umagiu à « Gaïa », a natura. « Ci dà un pocu d’ella è ci tocca à rendeli un qualcusellu. Tandu, possu lascià rame cù scritti à nantu eppo cacciu frazi. »

Da l’arte à a preversazione di l’ambiente….


Ph.P.

Acqua Lenghu, Route du Rotolo
20166, Purtichju
Cuntattu : 06-10-31-55-67
www.acqualenghju-boisflotte.co... : acqualenghju2a@gmail.com
Partager :