Usterie << A Piazza >> , << In Casa >> dit Sophie
In i so dui stabilimenti, à u Vazziu è in centru d'Aiacciu, .......
Usterie « A Piazza », « in casa » di Sophie
In i so dui stabilimenti, à u Vazziu è in centru d’Aiacciu, Sophie Piazza sviluppa una gestione casana. U sonniu zitellina d’issa ghjovana…
Dui lochi, unu dedicatu piuttostu à a ghjente chì travaglianu, un altru à i ghjovani cum’è l’anziani, semu à « A piazza », dui stabilimenti aperti da Sophie Piazza. Apre un’usteria, un sonniu zitellinu per Sophie. « Da zitella, spiega a donna, a sapiu ciò ch’eu vuliu fà. Ma, i me parenti, ùn eranu tantu d’accordu. Mi vedianu fà studii. »
Cù un babbu, specialistu di l’evenimenti (serate, balli, matrimonii), Sophie hè stata subbitu ciutatta in issu bagnu quì, induve u cuntattu hè assai impurtante. Ma per ciò chì tuccava à u cummerciu è quellu « sonniu », ci vulia à aspettà appena.
« M’hè sempre piaciutu u cuntattu cù a ghjente, aghjusta Sophie, ma per forza, aghju travagliatu in l’amministrazione. Dopu avè passatu a prima annata di a scola d’infirmiera.U tuttu era per fà piacè à i me parenti. »
Da u « bar à beach » à A Piazza
L’affare scambia monda dopu à a sparizione di u so babbu, in u 2012. Cinque anni dopu, Sophie s’impegna à u « Bar à Beach », in Purtichju. « Facciu tuttu da i planning à u serviziu, passendu per e cumande di materiale. Comu sò una « pila », mi piace l’attività. Ùn possu micca stà in piazza. »
In u 2021, Sophie cumencia à riflette à l’apertura di u so cummerciu. Masimu ch’ella t’hà sempre in capu, a so idea d’usteria. « In casa, pudiu fà à manghjà per ùn sò quantu persone, mi piace à cucinà per a famiglia è l’amichi. Strada facendu, certi m’anu dettu : « perchè ùn apri micca un ‘usteria ? »
A piazza hè in marchja. Qualchì tempu dopu, Sophie trova un lucale in u quartieru di u Vazziu. « Quallà, ghjè un veru paese ! » U 14 di marzu di u 2022, « A piazza », in umaggiu à u so babbu, apre e so porte. « Vogliu accoglie a ghjente cum’è in casa meia. Avemu fattu qualchì travagiu per imbellisce u locu è avemu principiatu l’attività. »
Aiutata da Johan è Andrea, Sophie prupone sosule freche liate à a stagione : pesci, tianu di vitelli, paste, insalate, poke bowls, panacotte, cumpote, tiramisù, ecc… Un mese fà, hà avutu l’occasione d’apre, un annu solu dopu à u primu, un secondu stabilimentu « A Piazza», vicinu à u Spaziu Diamante. « Aiacciu, hè a me cità, u locu mi piacia monda... » dopu à qualchì adurnamentu (nantu à i muri, un bancu vestutu di piante, un manganiolu à l’entrata, è una terrazza assulanata chì dà nantu à u mare), A Piazza 2 hè statu apertu 28 di marzu scorsu. « Facciu u passu è vene da unu à l’altri è purtermu, cù un camiò specializatu, e sosule da u primu induve sò fatte, à u secondu induve ùn avemu cucina. Ma da riscaldà i piatti. »
Aiutata da Stella, Sophie prupone dunque li stesse sosule ch’à u vazziu. « Quallà, sò in cucina à 7.00, compiu u serviziu à 15.00 è falgu subbitu à l’altra usteria aperta sin’à 22.00 cù a pussibiltà di manghjç à tutte l’ore o di piglià un bichjeru, una vultata, un ghjacciu l’aperitivu a sera. Hè quant’una pagliotta in cità ! » Sophie ùn conta l’ora è passa u so tempu da un usteria à l’altre. Apreni una terza ? « Aghju pussutu spartemi in dui, in trè ùn la sò... »
FP
