• Le doyen de la presse Européenne

Sapè Fà : Romain Sarti, purcaghju... è cantadore

Stallatu in a Penta Acquatella, Romain Sarti campa di e so passione. Purcaghju, tramandatu da i so vechji, è cantadore cù u so fratellu…
Sapà fà : Romain Sarti, purcaghju...è cantadore


Stallatu in a Penta Acquatella, Romain Sarti campa di e so passione. Purcaghju, tramandatu da i so vechji, è cantadore cù u so fratellu…


Semu in a Penta Acquatella, nantu à a pieve di Casacconi, in core di a Castagniccia. Hè quì chè Romain Sarti hà sceltu a vita paisana tramandatu da i so anziani. « Sò cresciutu in u paese d’Ortiporiu, induve aghju e mo radiche spiega u purcaghju, ci aghju fattu a mo scularità nanzu di sceglie issu modu di vita chì mi curresponde. »

Di fattu, Romain hà ripigliatu, dopu à i so studii, l’attività di u so babbu nove anni fà. « In a famiglia, aghjusta u ghjovanu, ci hè trè generazione di purcaghji. A robba purcina, sò statu allevatu nentru... »


Un travagliu à l’usu anticu

Campà in paese è di a so attività, una scelta ch’ùn hè tantu statu faciule à fà per Romain. « Ùn mi sò mai postu a questione. Per mè, ùn era pussibile di campà altrò ch’ind’è mè. »

Aiutatu da u so babbu, chì dà sempre un colpu di manu, à di a so moglia, Romain rispetta e cundizione imposte da e norme auropee ma travaglia à l’usu anticu secondu u sapè fà di i so vechji. « I porchi stanu ind’una certa libertà nantu à a prupietà, in muntagna. Dopu à a tumbera in u scannatoghju, ci portanu a robba. Ci tocca à spulpà a carne. In fine, femu tuttu da l’iniziu à a fine. »


« Issi mistieri liati à un modu di vita campagnolu sò sopratuttu vucazione. »

Una volta seccata in l’attelli chì li sò dedicati, a robba affumicata secondu à u tempu privistu, hè pronta per a vendita. « Femu tuttu da per noi, conta Romain, vindimu piuttostu à i particulari. A ghjente ghjunghje dinò sopra piazza, li piace à vede l’animali, à tastà a robba purcina è à discorre. Ci hè un ambiu particulare. »

A robba Purcina di Romain si pò dinò truvà in qualchì buttega in paese è u circondu. « Ùn hè tantu facivule di campà in paese, masimu senza nunda à l’iniziu. Aghju avutu a furtuna di ripiglià l’attività di babbu. Per un ghjovanu chì principia, pò esse più cumplicatu ma issi mistieri liati à un modu di vita campagnolu sò sopratuttu vucazione. »


U cantu : un’altra vucazione

Una vucazione chè Romain sparte cù...a musica. Un’attività principiata, quessa quì dinò, da zitellu à mezu à i più maiò chì cantavanu in caffè o in qualchì fiera. Hè quì chè u ghjovanu hà amparatu à cantà è à sunà di ghitarra. In corsu, di sicuru ma dinò in francese, inghlese, talianu...Repertorii d’eri è d’oghje. « Cù a famiglia è qualchì amicu di u paese, aviamu fattu un picculu gruppu. Avia 18 anni, avemu principiatu eppo ùn aghju mai lentatu issa passione. Cantendu ancu solu » D’issa passione, hè natu un gruppu « Les frères Sarti », chì giranduleghja da per tuttu in Corsica è ancu in qualchì cità di u Cuntinente. Ciò chì dumanda à Romain di bulicà duie attività à tempu. «Ùn hè tantu difficivule, spiega u purcaghju, a robba purcina hè piuttostu dedicata à l’invernu da a tumbera à a fabricazione. Ciò chì ci lascia di più tempu d’estate per cantà. »

Campà in paese, un usu sculpitu in u so core chì permette à Romain di mantene a so attività prufessiunale è a so passione.

Ph.P.
Partager :