• Le doyen de la presse Européenne

13 u Festivale d'autornu di a ruralità: prumove l'estru paisanu

Evenimentu culturale ma dino suciale.....


13 u Festivale d’autornu di a ruralità : prumove l’estru paisanu

Evenimentu culturale ma dinò suciale è ecunomicu maiò dapoi qualchì annu, u festivale d’autornu di a ruralità, arrimbatu nantu à a Via San Martinu, si tene sin’à u principiu di dicembre. L’occasione, intornu parechje attività (musica, ballu, cantu, mostre, cunferenze, storia, di fà campà u mondu paisanu…

Prupone, in fine d’estatina è sin’à dicembre, attività altre chè u turisimu solu « suldarinu » nantu à u litturale, è, à tempu prumove l’estru corsu o fà campà i nostri paesi d’inguernu, eccu ciò chì fù u scopu di l’associu « A Cappella » quand’ellu mettò in piazza u primu festivale d’autornu di a ruralità in u…2007.
À u capu d’issa struttura, Cristianu Andreani, impegnatu à prò di a cultura, a storia è u patrimoniu corsu dapoi guasgi cinquanta anni. « Avemu principiatu cù ghjurnate culturale intornu à cuncerti, canti…spiega u respunsevule, u scopu hè sempre statu di mustrà, luntanu di ciò chì si campa nantu à u litturale, una Corsica rurale chì campa tutta l’annata cù l’impegnu è u dinamisimu di i so pruduttori, agricultori, artisgiani, paisani. L’occasione, à tempu, di mette in vale, u mondu assuciativu… »

A Via San Martinu

Cusì, u festivale hà apertu e so porte prima cù una settimana, eppo duie. Dedicatu à un publicu abbastanza largu, hè sempre statu un mumentu di spartera cù, à traversu l’attività pruposte, a pussibilità di scopre u patrimoniu materiale o immateriale di a Corsica. Hè per quessu, d’altronde, chè Cristianu Andreani, l’hà vulsutu arrembà nantu à a famosa via San Martinu. « San Martinu hè un legiunariu rumanu di quartu seculu in a guardia persunale di l’Imperatore. Eppo sparte u so mantellu cù un poveru. Hè una manera, à l’epica, d’inventà a spartera…Face miraculi. Travagliemu nantu à a so Via in Corsica induve ritruvemu monda ghjesge è cappelle chì portanu u so nome. »

Quest’annu, è malgratu a crisa sanitaria, a manifestazione hè prevista ma sottu à cundizione precise. « Di fattu, avariamu un prugramma appruntatu, ma ogni volta, semu custretti di dumandà l’autorisazione di a prifettura. Dunque, ùn si pò micca fà affissi nè parlà di manera precisa di l’urganisazione. Sapemu, quantuque, chè a manifestazione si teneria sin’à u primu di dicembre… »

L’occasione, forse s’è e cundizione sò adunite, di festighjà à San Martinu (patrone di u vignaghjoli), l’ondeci di nuvembre È, à tempu, u vinu novu…U festivale, ellu, cuntinueghja à fà a so strada, da Cismonte à Pumonte, sempre per fà campà a ruralità…
Partager :