L'estru canterinu d'Anghjula Potentini
Un spettaculu " Passu à passu "
l’estru canterinu d’Anghjula Potentini
L’artista isulana festighjeghja, in u 2024, in so vinti anni di cantu. Per marcà l’evenimentu, un spettaculu « Passu à passu » hè privistu. L’occasione di sfuglià un percorsu di passione…
Ùn si contanu più, oghje, i gruppi è cantadori isulani cù, ci vole à dillà, una certa qualità. Seranu più di duicentu. Ma l’omi ùn sò soli à campà issa passione quì. E donne dinò cantanu dapoi avà più di quaranta anni per certe. U tempu ùn hè cusì longu per ciò chì tocca à Anghjula Potentini chì festighjeghja in u 2024, i so vinti anni di cantu. U cantu, qualcosa di naturale per una donna chì t’hà e so radiche in Poghju d’Oletta, in u Nebbiu. « Sò stata allevata à mezu à u cantu, spiega l’artista, u mo babbu cantava ma micca solu ellu. Face chì l’arechja s’hè furmata in munudia ma dinò in pulifunia ch’ùn hè più, oghje, un cantu solu maschile. »
Anghjula face a so strada è principia u so percorsu canterinu cù u gruppu feminile, e donne di l’esiliu, à mezu à cantatrice più o menu rinumate di l’epica : Jacky Micaelli, Béatrice Habrard-Malaspina, Elisabeth Bottalico è Izia Bartoli-Dau chì escerà un dischettu solu di pulifunia à l’iniziu di l’anni 2000.
Trè dischetti in nove anni
Cinque anni dopu, Anghjula decide di travaglià intornu u so primu dischettu ma sola sta volta. Hè a nascita di « Lettera d’amore » chì addunisce creazione cum’è u titulu eponimu di u dischettu o u tempu chì passa ma sopratuttu canti tradiziunali (Minicola, Francesca Maria, Diu vi Salvi Regina è u famosu Beata Funtanella), accumpagnati da strumenti più o menu muderni. « Issu primu dischettu intornu à u tradiziunale s’impunia, aghjusta l’artista, per mè era un umaggiu à tutti quelli chì anu sulcatu a mo zitellina. » Trè anni dopu, serà « Fiara », tredeci creazione in umaggiu à a vita paisana cù scritti è cumpusizione fatte per l’artista. In fine, « Ora Serena », esciutu in u 2015, tratta di a natura, l’amore, a sperenza o a passione. Quì l’artista cumpone. Cusì, è strada facendu, cummencia à esse rinumata. « Aghju cantatu dapertuttu in Corsica è ancu altrò, àu stranieru ch’eru intermittente di u spettaculu. »
Animatrice per a Frequenza mora
Un statutu chì li permette d’avè parechje barrette (face cantà i zitelli in e scole dapoi vinti anni…). À tempu, cummencia un percorsu d’animatrice per a Frequenza Mora (una croneca nantu à i pruverbii…). Un percorsu di vinti anni è cullaburazione cù Caramusa è Petru Guelfucci... « Un omu strasordinariu... »
Per festighjà i so vinti anni, l’artista hà vulsutu marcà l’evenimentu. Un spettaculu battizatu « Passu à passu » cù Cristofanu Mac Daniel à l’accunciamenti è Marc’Andria Castellani à a ghitarra, hè privistu per girà. « Ci seranu creazione uriginale è ripresi di canzone corse o d’altrò (Italia, Catalogna) è, di sicuru, un umaggiu resu à Petru Guelfucci. »
Anghjula Potentini serà u 15 di marzu à l’Albore è u 27 d’aprile à l’Aghja in Aiacciu. Frà tempu, travaglia, deci anni dopu à « Ora Serena », nantu à u so quartu dischettu. « Dec’anni, hè l’età di u mo figliolu. Aghju pigliatu u tempu chì ci vulia. »
Un dischettu dighjà bè avanzatu chì puderia esce à a fine di l’annu.
F.P.
L’artista isulana festighjeghja, in u 2024, in so vinti anni di cantu. Per marcà l’evenimentu, un spettaculu « Passu à passu » hè privistu. L’occasione di sfuglià un percorsu di passione…
Ùn si contanu più, oghje, i gruppi è cantadori isulani cù, ci vole à dillà, una certa qualità. Seranu più di duicentu. Ma l’omi ùn sò soli à campà issa passione quì. E donne dinò cantanu dapoi avà più di quaranta anni per certe. U tempu ùn hè cusì longu per ciò chì tocca à Anghjula Potentini chì festighjeghja in u 2024, i so vinti anni di cantu. U cantu, qualcosa di naturale per una donna chì t’hà e so radiche in Poghju d’Oletta, in u Nebbiu. « Sò stata allevata à mezu à u cantu, spiega l’artista, u mo babbu cantava ma micca solu ellu. Face chì l’arechja s’hè furmata in munudia ma dinò in pulifunia ch’ùn hè più, oghje, un cantu solu maschile. »
Anghjula face a so strada è principia u so percorsu canterinu cù u gruppu feminile, e donne di l’esiliu, à mezu à cantatrice più o menu rinumate di l’epica : Jacky Micaelli, Béatrice Habrard-Malaspina, Elisabeth Bottalico è Izia Bartoli-Dau chì escerà un dischettu solu di pulifunia à l’iniziu di l’anni 2000.
Trè dischetti in nove anni
Cinque anni dopu, Anghjula decide di travaglià intornu u so primu dischettu ma sola sta volta. Hè a nascita di « Lettera d’amore » chì addunisce creazione cum’è u titulu eponimu di u dischettu o u tempu chì passa ma sopratuttu canti tradiziunali (Minicola, Francesca Maria, Diu vi Salvi Regina è u famosu Beata Funtanella), accumpagnati da strumenti più o menu muderni. « Issu primu dischettu intornu à u tradiziunale s’impunia, aghjusta l’artista, per mè era un umaggiu à tutti quelli chì anu sulcatu a mo zitellina. » Trè anni dopu, serà « Fiara », tredeci creazione in umaggiu à a vita paisana cù scritti è cumpusizione fatte per l’artista. In fine, « Ora Serena », esciutu in u 2015, tratta di a natura, l’amore, a sperenza o a passione. Quì l’artista cumpone. Cusì, è strada facendu, cummencia à esse rinumata. « Aghju cantatu dapertuttu in Corsica è ancu altrò, àu stranieru ch’eru intermittente di u spettaculu. »
Animatrice per a Frequenza mora
Un statutu chì li permette d’avè parechje barrette (face cantà i zitelli in e scole dapoi vinti anni…). À tempu, cummencia un percorsu d’animatrice per a Frequenza Mora (una croneca nantu à i pruverbii…). Un percorsu di vinti anni è cullaburazione cù Caramusa è Petru Guelfucci... « Un omu strasordinariu... »
Per festighjà i so vinti anni, l’artista hà vulsutu marcà l’evenimentu. Un spettaculu battizatu « Passu à passu » cù Cristofanu Mac Daniel à l’accunciamenti è Marc’Andria Castellani à a ghitarra, hè privistu per girà. « Ci seranu creazione uriginale è ripresi di canzone corse o d’altrò (Italia, Catalogna) è, di sicuru, un umaggiu resu à Petru Guelfucci. »
Anghjula Potentini serà u 15 di marzu à l’Albore è u 27 d’aprile à l’Aghja in Aiacciu. Frà tempu, travaglia, deci anni dopu à « Ora Serena », nantu à u so quartu dischettu. « Dec’anni, hè l’età di u mo figliolu. Aghju pigliatu u tempu chì ci vulia. »
Un dischettu dighjà bè avanzatu chì puderia esce à a fine di l’annu.
F.P.
