Umaggiu à Roccu Mambrini
su pueta è impruvisatore, Roccu Mambrini, dettu « U Rusignolu di Zilia » s’hè spentu in casa soia a settimana scorsa à l’età di novanta quattru anni. A Corsica sana pienghje unu di i soii chì si ne và cù un usu nustrale…
Una perdita maiò per a nostra cultura.
Dapoi una settimana, l’umaggi ùn piantanu micca in a stampa regiunale o e rete suciale. Roccu Mambrini, u famosu pueta cugnumatu dapoi a so zitellina « U Rusignolu di Zilia », s’hè spentu à mezu à i soii, famiglia, amichi, pueti…
Tutti ricunnoscenu, oghje, un omu di gran talente chì fù, forse, ancu s’è ne fermanu d’altri, unu di l’ultimi pueti ind u filu di i « Minellu d’Ascu », « Pampasgiolu », « U Barbutu di Chera » o « U Furcatu ». Ellu era, di sicuru più ghjovanu ma u so estru si scrivia nantu à stu filu quì. Per prove, sò assai, e personne ch’anu intesu parlà di u Rusignolu di Zilia. Cunnisciutu in a Corsica sana per a so voce linda, u so talente di pueta è sopra tuttu liatu à u famosu « Chjami è Rispondi », un usu, ch’ellu hà cutribuitu à fà campà, ghjovanu, in Balagna sicura, ma tutta a so vita è ultimamentu cù i so amichi di l’associu, Ghjuvan Petru Ristori, Francescu Luciani, Paulu Calzarellu, Francescu Simeoni, Ghjaseppu Micaelli senza sminticà i più ghjovani, Tittò Limongi, Brandon Andreani, Stefanu Conca…
Primi canti à…trè anni
Roccu, un omu di bè ma sopratuttu unu di l’ultimi testimonii di a Corsica « di nanzu », antica, arradicata à a so terra, un esse, una manera di campà.
Natu in Zilia, à u pede di u Monte Grossu, Roccu avia principiatu u cantu à l’età di…trè anni ! À mezu à e pecure, ch’ellu fù pastore nanzu di fà a so vita, sempre in u circondu di a Balagna. Era à l’occasione di i so novanta trè anni, ch’ellu falò à u Locu Teatrale cù a so nipote l’annu scorsu (di ghjugnu) per ciò chì fù, forse, a so ultima serata di u « Chjami è Rispondi » à mezu à i so cumpagni.
Maestru d’iss’arte quì, Roccu Mambrini fù cunnisciutu aldilà di a Corsica. In u 1983, fù fattu Cavalieru di l’arte è di e lettere, da Jack Lang, tandu ministru di a cultura. Una ricunniscenza maiò, quella d’un talente ma à tempu, d’un omu…
S’hè spentu u primu di lugliu à mezu à i soii è a meludia di u « lamentu di Ghjesù ». Un cantu chì hà ribumbatu in a ghjesgia di Zilia induve ci era a cunfraternita di Calenzana è tutti i so cumpagni. Una perdita maiò per i soii ma aldilà per a Corsica è tutti quelli chì cercanu à mantene a leia trà eri, oghje è dumane…
Dapoi una settimana, l’umaggi ùn piantanu micca in a stampa regiunale o e rete suciale. Roccu Mambrini, u famosu pueta cugnumatu dapoi a so zitellina « U Rusignolu di Zilia », s’hè spentu à mezu à i soii, famiglia, amichi, pueti…
Tutti ricunnoscenu, oghje, un omu di gran talente chì fù, forse, ancu s’è ne fermanu d’altri, unu di l’ultimi pueti ind u filu di i « Minellu d’Ascu », « Pampasgiolu », « U Barbutu di Chera » o « U Furcatu ». Ellu era, di sicuru più ghjovanu ma u so estru si scrivia nantu à stu filu quì. Per prove, sò assai, e personne ch’anu intesu parlà di u Rusignolu di Zilia. Cunnisciutu in a Corsica sana per a so voce linda, u so talente di pueta è sopra tuttu liatu à u famosu « Chjami è Rispondi », un usu, ch’ellu hà cutribuitu à fà campà, ghjovanu, in Balagna sicura, ma tutta a so vita è ultimamentu cù i so amichi di l’associu, Ghjuvan Petru Ristori, Francescu Luciani, Paulu Calzarellu, Francescu Simeoni, Ghjaseppu Micaelli senza sminticà i più ghjovani, Tittò Limongi, Brandon Andreani, Stefanu Conca…
Primi canti à…trè anni
Roccu, un omu di bè ma sopratuttu unu di l’ultimi testimonii di a Corsica « di nanzu », antica, arradicata à a so terra, un esse, una manera di campà.
Natu in Zilia, à u pede di u Monte Grossu, Roccu avia principiatu u cantu à l’età di…trè anni ! À mezu à e pecure, ch’ellu fù pastore nanzu di fà a so vita, sempre in u circondu di a Balagna. Era à l’occasione di i so novanta trè anni, ch’ellu falò à u Locu Teatrale cù a so nipote l’annu scorsu (di ghjugnu) per ciò chì fù, forse, a so ultima serata di u « Chjami è Rispondi » à mezu à i so cumpagni.
Maestru d’iss’arte quì, Roccu Mambrini fù cunnisciutu aldilà di a Corsica. In u 1983, fù fattu Cavalieru di l’arte è di e lettere, da Jack Lang, tandu ministru di a cultura. Una ricunniscenza maiò, quella d’un talente ma à tempu, d’un omu…
S’hè spentu u primu di lugliu à mezu à i soii è a meludia di u « lamentu di Ghjesù ». Un cantu chì hà ribumbatu in a ghjesgia di Zilia induve ci era a cunfraternita di Calenzana è tutti i so cumpagni. Una perdita maiò per i soii ma aldilà per a Corsica è tutti quelli chì cercanu à mantene a leia trà eri, oghje è dumane…
