VOCE VENTU : trenta anni di passione canterina
Un spiritu mantenutu
Voce ventu : trenta anni di passione canterina
Dopu à una pausa di dui anni, a famosa squadra di Voce Ventu hà decisu di ripiglià scena è strumenti per festighjà i so trenta anni.
Dapoi trenta anni, u gruppu Voce Ventu, natu di a passione d’amichi à a scola di cantu in tempi di u riacquistu, hà fattu a so strada. Parechji dischetti sò esciuti : « Rughju di vita » (2005), « Di culori è di sonnii » (2010), « Tessi Tessi » (2010, cù l’artista giappunese Mieko Miyazaki) è « À u ritimu di sperenze » (2021) senza cuntà tanti cuncerti in Corsica è altrò. U gruppu chì hà, ci vole à dilla, acquistatu una certa nuturietà è dinò maturità, passendu da una prima squadra di cinque membri (Federicu Sini, Andria Fazi, Ericcu Ressouche, Federicu Poggi è Saveriu Tavera) in u primu dischettu à 12 in l’ultimu (vede più sottu).
Un spiritu mantenutu
« Una squadra allargata, spiega Ghjuvan Filippu Martini, i nuvelli sò quì dapoi più di deci anni...U spiritu di u gruppu hè statu sempri u listessu. Cantà, hè un piacè ma hè dinò un attu militanti... »
A squadra ci avia abituati à aspettà appena trà un dischettu è l’altru ma quì, ghjè a vulintà di fà una pausa chì s’hè imposta qualchì tempu dopu à « À u ritimu di sperenze ». « Ci hè statu a necessità di rinfiatà un pocu pà tuttu u mondu, aghjusta u cantadore, una pausa chì ci hà fattu prò. Ma u cantu, ùn hè mai statu tantu luuntanu. »
Una girata di sette cuncerti
Pian, pianinu, l’idea di ripiglià hè nata, masimu chè u gruppu festighjeghja i so trenta anni. « Ci vulia à marcà iss’anniversariu. Ci semi posti tutti a questioni è ritruvati cù piacè. U cantu ci mancaia. Tandu, avemi travaddatu nantu à l’urganisazioni di parechji cuncerti da u issu 27 di sittembri sin’à u mesi di frivaghju pà ciò chì tocca à u nosciu publicu « fora di staghjoni ». Nanzu di pinsà à una girata d’istati... »
Tandu, i membri anu travagliatu intornu à una crunulugia, partendu da e prime canzone sin’à l’ultime, aghjustendu qualchì nuvità. A girata principia issu 27 di settembre à a sala di l’Empire (cumpletta) è d’altri cuncerti anu da seguità : Purti Vechju (u 10 d’ottobre), l’Albore di Bastia (23 è 24), Corti (spaziu Natale Luciani u 13 di nuvembre), Calvi (u 22). È per compie, dui cuncerti in Carghjese (u 10 di ghjennaghju à u spaziu Natale Rocchiccioli) è in Prupià (u 21di ferraghju). « Ci sarani qualchì surpresa ma ùn ne pudemi dì di più pà avali. U publicu scuprarà. »
Ver di un dischettu novu ?
In trenta anni, a squadra di Voce Ventu hà sulcatu a so grinfia in u paisaghju musicale corsu cù canzone assai cunnisciute cum’è « Rughju di vita » « Da u sperà », « Corsica meia » o « O Generale ». « Semi in a cuntinuità di a noscia andatura, ripiglia Ghjuvan Filippu Martini, semi attenti à ciò chì noi risentimu ma dinò à i nosci valori da cuncipiscia canzoni novi. Ma, à tempu andemi dinò aldilà di a Corsica inde i nosci creazioni. Lampemi un ochju altrò. Hè statu dighjà u casu cù qualchì creazioni. »
U gruppu marca u so anniversariu ma issu ritornu hè dinò l’occasione di fà valè u so parè nantu à u cantu corsu d’oghje è a necessità di fà campà a lingua. Di creazione, si ne tratterà à l’occasione d’issa girata cù qualchì nuvità. « trè o quattru canti sò dighjà pronti è sarani prisentati in i cuncerti. Dopu, ùn si sà. Forsa, travaddaremi nantu à un dischettu novu. Ma ùn hè l’attualità pà avali. »
L’attualità hè ghjust’à puntu una girata in Corsica chì principia stu sabbatu à l’Empire.
F.P.
Voce Ventu
Cantu : Federicu Poggi, Ericcu Ressouche, Saveriu Tavera, Ghjuvan Filippu Martini, Liunelu Giacomoni, Dumenicu Casalonga.
Ghitarra : Micheli Tomei, Ghjaseppu Mambrini.
Mandulina : Ghjaseppu Mambrini.
Viulinu : Celia Picciocchi.
Urganettu : Tony Fallone.
Ghitarra bassa : Julien Le Bail.
Dopu à una pausa di dui anni, a famosa squadra di Voce Ventu hà decisu di ripiglià scena è strumenti per festighjà i so trenta anni.
Dapoi trenta anni, u gruppu Voce Ventu, natu di a passione d’amichi à a scola di cantu in tempi di u riacquistu, hà fattu a so strada. Parechji dischetti sò esciuti : « Rughju di vita » (2005), « Di culori è di sonnii » (2010), « Tessi Tessi » (2010, cù l’artista giappunese Mieko Miyazaki) è « À u ritimu di sperenze » (2021) senza cuntà tanti cuncerti in Corsica è altrò. U gruppu chì hà, ci vole à dilla, acquistatu una certa nuturietà è dinò maturità, passendu da una prima squadra di cinque membri (Federicu Sini, Andria Fazi, Ericcu Ressouche, Federicu Poggi è Saveriu Tavera) in u primu dischettu à 12 in l’ultimu (vede più sottu).
Un spiritu mantenutu
« Una squadra allargata, spiega Ghjuvan Filippu Martini, i nuvelli sò quì dapoi più di deci anni...U spiritu di u gruppu hè statu sempri u listessu. Cantà, hè un piacè ma hè dinò un attu militanti... »
A squadra ci avia abituati à aspettà appena trà un dischettu è l’altru ma quì, ghjè a vulintà di fà una pausa chì s’hè imposta qualchì tempu dopu à « À u ritimu di sperenze ». « Ci hè statu a necessità di rinfiatà un pocu pà tuttu u mondu, aghjusta u cantadore, una pausa chì ci hà fattu prò. Ma u cantu, ùn hè mai statu tantu luuntanu. »
Una girata di sette cuncerti
Pian, pianinu, l’idea di ripiglià hè nata, masimu chè u gruppu festighjeghja i so trenta anni. « Ci vulia à marcà iss’anniversariu. Ci semi posti tutti a questioni è ritruvati cù piacè. U cantu ci mancaia. Tandu, avemi travaddatu nantu à l’urganisazioni di parechji cuncerti da u issu 27 di sittembri sin’à u mesi di frivaghju pà ciò chì tocca à u nosciu publicu « fora di staghjoni ». Nanzu di pinsà à una girata d’istati... »
Tandu, i membri anu travagliatu intornu à una crunulugia, partendu da e prime canzone sin’à l’ultime, aghjustendu qualchì nuvità. A girata principia issu 27 di settembre à a sala di l’Empire (cumpletta) è d’altri cuncerti anu da seguità : Purti Vechju (u 10 d’ottobre), l’Albore di Bastia (23 è 24), Corti (spaziu Natale Luciani u 13 di nuvembre), Calvi (u 22). È per compie, dui cuncerti in Carghjese (u 10 di ghjennaghju à u spaziu Natale Rocchiccioli) è in Prupià (u 21di ferraghju). « Ci sarani qualchì surpresa ma ùn ne pudemi dì di più pà avali. U publicu scuprarà. »
Ver di un dischettu novu ?
In trenta anni, a squadra di Voce Ventu hà sulcatu a so grinfia in u paisaghju musicale corsu cù canzone assai cunnisciute cum’è « Rughju di vita » « Da u sperà », « Corsica meia » o « O Generale ». « Semi in a cuntinuità di a noscia andatura, ripiglia Ghjuvan Filippu Martini, semi attenti à ciò chì noi risentimu ma dinò à i nosci valori da cuncipiscia canzoni novi. Ma, à tempu andemi dinò aldilà di a Corsica inde i nosci creazioni. Lampemi un ochju altrò. Hè statu dighjà u casu cù qualchì creazioni. »
U gruppu marca u so anniversariu ma issu ritornu hè dinò l’occasione di fà valè u so parè nantu à u cantu corsu d’oghje è a necessità di fà campà a lingua. Di creazione, si ne tratterà à l’occasione d’issa girata cù qualchì nuvità. « trè o quattru canti sò dighjà pronti è sarani prisentati in i cuncerti. Dopu, ùn si sà. Forsa, travaddaremi nantu à un dischettu novu. Ma ùn hè l’attualità pà avali. »
L’attualità hè ghjust’à puntu una girata in Corsica chì principia stu sabbatu à l’Empire.
F.P.
Voce Ventu
Cantu : Federicu Poggi, Ericcu Ressouche, Saveriu Tavera, Ghjuvan Filippu Martini, Liunelu Giacomoni, Dumenicu Casalonga.
Ghitarra : Micheli Tomei, Ghjaseppu Mambrini.
Mandulina : Ghjaseppu Mambrini.
Viulinu : Celia Picciocchi.
Urganettu : Tony Fallone.
Ghitarra bassa : Julien Le Bail.