Halloween o Sant'Andria ?
E feste di i Santi s’approntanu da quì à una settimana. Una celebrazione assai impurtante in Corsica.
Halloween o Sant’Andria ?
E feste di i Santi s’approntanu da quì à una settimana. Una celebrazione assai impurtante in Corsica. Per i zitelli, issa festa curresponde à Halloween. Vanu à pichjà ind’è a ghjente per dumandà bombò. Una festa chì s’assumiglia à a Sant’Andria. À chì ne semu da veru ? Inchiesta.
Sò avà parechji anni chè i zitelli corsi festighjeghjanu à Halloween ogni trentunu d’ottobre. Sò mascherati di schenetri, streghe è vanu à pichjà ind’è a ghjente per dumandà bombò. À dilla franca, è sò parechji à fà u parangone cù a Sant’Andria (zitelli mascherati chì vanu à pichjà dinò ind’è a ghjente per dumandà robba da manghjà…), issa festa hè ghjunta tardi ind’è noi…
Origine d’Halloween
Di fattu, Halloween hè una festa celtica. « All Hallow Even » in vechju inghlese. Issa festa, chjamata Samain hè celebrata dapoi 2500 anni. Ghjunghjeria da a Scozzia è l’Irlanda nanzu di spartesi in Inghliterra. Dopu à a guerra d’indipendenza di l’America, funu assai numarosi Irlandesi è Scuzzesi à parte quallà. Purtendu e so tradizione è masimu quella d’Halloween. À pocu à pocu, hè diventata una festa più cummerciale. Ma chì hè ghjunta abbastanza tardi in Francia (l’anni settanta-ottanta). È ci hè vulsutu à aspettà l’anni novanta per vede issa tradizione sbarcà in Corsica, ma priva d’a so essenza spirituale. I Celtichi dicianu, d’un cantu, chè issu passaghju marcava u capu d’annu ma sopratuttu a notte induve i morti vultavanu è ci vulia sempre à lascià li un qualcusellu à manghjà. S’ellu si tratta di parangone, oghje, seria cù a religione postu chè sta notte d’Halloween hè a festa di i Santi ind’è noi. Dui ghjorni dopu, ci hè a festa di i morti. A tradizione ci face nettà è fiurisce e tombe di i nostri. Ma, in certi lochi (i Dui Sorru insù), a tradizione di e bastelle (ch’eranu cotte tempi fà solu a sera di u 31d’ottobre, in i forni di i quartieri di i paesi), ci face pinsà à a festa d’Halloween chè, quì dinò, ci vulia, certe volte, à lascià una bastella per i morti. A tradizione di e bastelle s’hè, à pocu à pocu, allargata à tutta a settimana. Oghje, si manghjanu bastelle tutta l’annata. Ma u parangone cù a festa celtica, ci pare stranu quantunque. Cum’è a leia cù e feste religiose.
Sant’Andria : un mumentu di spartera
A Sant’Andria, ella, hè festighjata ogni 30 di nuvembre. Un mese dopu à i Santi. Quì, marca un mumentu induve l’omu era arrimbatu à i ciculi di a natura. L’11 di nuvembre, a San Martinu-festa di i vignaghjoli- è a Sant’Andria, marcanu l’intrata inde l’inguernu. I ghjorni sò più corti è ci vole à fà e pruviste ch’ùn si pò più piantà. Ci seranu tempi di bughjura sin’à una seconda festa, u Carnavale, ch’à da marcà u vultà di a lumera (i ghjorni sò allungati) è a pussibilità di piantà...Tandu, a Sant’Andria hè diferente d’Halloween. Tempi fà, a ghjente povera andava à pichjà ind’è a ghjente per avè robba da manghjà : frutti secchi è passi, biscuttini, canistrelli, ecc...Ma ci vulia, prima, à dì una pricantula. Oghje, issa tradizione, sparita forse trà e duie guerre (1914-1918 è 1939-1945) cum’è tanti usi è tradizione, hè vultata trenta anni fà ind’è noi. Una festa cumuna à parechji paesi di u Mediterraneu. Eppo, ci sò paesi, induve ùn era festighjata o l’anziani scuntrati, ùn si ne ramentanu più. Ma una tradizione assai viva in Corsica, masimu cù u travagliu fattu in e scole. Vistuti di panni frusti è mascherati di carbò, i zitelli facenu u giru di i paesi (in cità dinì, in certi quartieri). Dicenu a pricantula-pò scambià secondu à i lochi di Corsica-è a ghjente li dà robba da manghjà. In qualchì lochi, i zitelli spartenu tuttu trà elli in d’una piazza o a corti di recreazione. In d’altri, tenenu qualcosa per i più povari. Iss’usu, sviluppatu ind’è noi, t’hà dinò-cum’è abbastanza credenze pacane- una leia cù a religione. Postu chè Andria era unu di l’apostuli in più impurtanti di Ghjesù. A pricantula conta u so periplu... « Hà fattu un longu viaghju è t’hà i pedi cunghjilati... »
Da u pacanisimu à u Cristianisimu
D’altronde, pacanisimu è Cristianisimu viaghjanu manu in manu in Corsica. Un paradossu ch’è noi pudemu misurà dinò cù l’ochju...Chì scelglie trà Halloween è Sant’Andria ? I dui, di sicuru, spieghendu à i zitelli perchè sò mascherati è sopratuttu à chì currespondenu isse duie tradizione ch’ùn ci vole micca à paragunà.
F.P
photo : F.P