Gruppu « Spera » : stintu corsu è trasmissione

Gruppu « Spera » : stintu corsu è trasmissione

Natu durante l’estate 2023, issu gruppu cumpostu solu di dui membri, Laurent Caviglioli à u cantu è Régis Mannarini à a ghitarra, vole prumove l’usi è a cultura corsi aldilà di l’isula. Una prima canzona « raghju d’amore », hè esciuta issu dui di nuvembre nantu à e piattaforme dedicate...

U gruppu « Spera » hè, nanzu à tuttu, a storia d’un’amicizia. Quella chì adunisce dapoi dui anni, Laurent Caviglioli, di ceppu guagnese, è Régis Mannarini, Rucchisgianu. Tutti dui, campanu in Cuntinente ma stanu arradicati à a so isula. Passiunati di cantu, d’una manera generale, è più particularmente di cantu corsu, si sò ritruvati di lugliu u 2023, à l’occasione d’una serata corsa, ind’un’usteria. « Campemu tutti i dui in u Var, spiega Laurent Caviglioli, è ci semi scuntrati in Fréjus. Una sera, à l’occasione d’una serata corsa ind’un’usteria tenuta da un coppiu bastiacciu, avemu cantatu. Hè piaciuta à tutti. Dopu, avemu decisu di cuntinuà. »

Fà campà a lingua è a cultura
Cantadore cù qualchì amicu in Marseglia, Laurent Cavaglioli hà liatu dunque u so talente cù Régis Mannarini, musicante è nipote di u famosu ghitarristu Aurèle Mannarini. Inseme, anu decisu qualchì tempu dopu, d’ufficializà una struttura : Spera. « Ci vulia à truvà un nome chì ci currispundia, aghjusta u cantadore, ma à tempu, chì parlava à tuttu u mondu. U sperà, hè una manera di mustrà ch’è noi semu quì per tramandà a nostra cultura è dinò di fà la campà luntanu d’ind’è noi. In Cuntinente ci hè assai amicale di Corsi chì campanu è cercanu à sviluppà si...Si trattà, à tempu, di i nostri valori è di l’amore chè tutti i Corsi portanu à a so isula...Semu nati è avemu campatu a nostra ghjuventù in Corsica. Oghje, vulemu tramandà e nostre radiche. Ci hè parsu chè u cantu era a più bella manera... »

Canzone d’eri è d’oghje
I dui cumpagni principianu cù serate d’animazione in usteria ma dinò per associ o amicale corse, cù un repertoriu cunnisciutu. « Canzone di u riacquistu (Cantu, i Chjami…), ripiglia u cantadore, ma dinò certe ancu più anziane (Carlu Rocchi, i fratelli Vincenti, è canzone d’oghje (Voce Ventu, Chjar’di luna... Cantemu dinò in ghjesgia... »
Strada facendu, Laurent è Régis volenu mette a so grinfia, sempre intornu à a spartera di l’amore per a so terra. Hè ghjè cusì chè, di manera naturale, hè ghjunta l’idea di travaglià qualchì scrittu è di metteli in musica. « Arrimbati nantu à a nostra sperienza, e nostre storie, avemu vulsutu cumencià à scrive. Hè cusì, ch’ella hè nata a canzona « Raghju d’amore. »
Laurent è Régis ghjunghjenu d’universu musicale diferente. Anu messu u so talente in cumunu per fà nasce issa prima canzona. « Si tratta d’un mumentu suspesu in u tempu, spiega torna u cantadore, un’emuzione universale... »

Una canzona à mese è...un dischettu iss’estatina
« Raghju d’amore » hè cum’è una spassighjata musicale induve u viulinu porta qualcosa in più. « Di tantu in tantu, aghjustemu un’altru strumentu.Ci hè una leia trà tutti i musicanti. Ognunu porta a so petra. »
Issa canzona marca una prima tapa per i dui cumpagni ch’ùn volenu micca arrestà si quì. Dopu à l’esciuta di « raghju d’amore », dui di nuvembre è una seconda canzona, « Vicinu à tè », chì tratta d’una persona sradicata di i so valori è di a so terra, « Spera » cercherà à esce una canzona ogni mese sin’à l’estina induve un dischettu hè privistu. Frà tempu, Laurent è Régis anu da cercà, sta volta, à prumove e so canzone in Corsica. « Avemu avutu assai serate in Cuntinente in regione PACA è prupunimu e nostre cumpusizione...Avà, ci tocca, pian, pianinu, à cantà ind’è noi... »
Un travagliu chì dumanda assai impegnu. S’è Régis Mannarini hè intermittente di u spettaculu dapoi parechji anni, Laurent Caviglioli travaglia sempre ma trovanu, tutti i dui, u tempu di mette a so passione in cumunu per fà avanzà issa nova struttura. E canzone di u dischettu sò dighjà scritte è cumposte, arrimbate nantu à n filu musicale diversu. Fermanu solu l’accunciamenti, qualchì strumentu in più (pianò, viulinu…) è entre in studiò per fà sente à publicu issu primu dischettu. Frà tempu, « raghju di sole » è « vicinu à tè », metteranu in vale u talente di i dui cumpagni…

F.P.
photo: Spera