Da a Corisca à Compostella : u percorsu spirituale di cinque aiaccini !
Una sfida spirituale
Da a Corisca à Compostella : u percorsu spirituale di cinque aiaccini !
Si chjamanu Jean-Marc, François, Julien, Jean-Paul è José. Tutti amichi di zitellina, sò stati tocchi da a visita di u Papa Francescu di dicembre u 2024. Cunsequenza, anu sceltu di parte, a settimana scorsa, sin’à Compostella per una sfida spirituale…
« E vie di u Signore sò impenetrabile » dicia San Paulu in l’epistola à i Rumani…Ghjè un fattu spirituale chì hà purtatu cinque aiaccini à fà i 750 sin’à Compostella durante più d’un mese. À l’iniziu d’issa demarchja, a visita, in Aiacciu, u 15 di dicembre di u 2024, di u Papa Francescu cù millai è millai di Corsi da San Ghjuvà sin’à u Casone…Frà elli, Jean-Marc Franceschini, Julien Calendini, Jean-Paul Fideli, François Andreucci è José Lozau. « Eramich stati tocchi, à dilla franca di a presenza di u Papa ind’è noi, spiega u primu, aviamu vulsutu essa à u Casone partendu à pedi da Boddiccione a mani di u 15 di dicembri. Eppo, ci voli à ricunnoscia ch’ellu si passò qualcosa di stranu. A so saviezza, a manera di parlà, a so dulcezza. Ci semi dettu ch’ùn pudiami micca stà cusì. Hè François Andreucci chì hà avutu l’idea di parta sin’à Compostella… »
A squadra avia, à l’epica, un annu è mezu per appruntà sta fida. Ma una demarchja pocu cumuna dedicata, di regula, à ghjente chì t’anu una fede tamanta. « Avemu a fedi, aghjusta Jean-Marc Franceschini, ma pratichemi pocu benchè ciuttati, da zitelli, ind’un bagnu appena religiosu. Eppo, ci voli à dì, torna una volta, chì ghjenti cum’è i preti Boccheciampe è Bastelica ani fattu morri pà a fedi è a spiritualità. Ci hè dinò u Cardinali chì t’hà assai carismu. »
Sei mesi d’appruntera
I cinque amichi piglianu a decizione d’andà in Compostella è di travaglià, nanzu, per esse appruntati. Ma anu messu una stonda. « Tuttu u mondu a i so attività, ci hè vulsutu à tena contu di què è adattà si à i spartitempi d’ognunu. Un hè chè, à partesi da l’estatina scorsa, ch’avemi messu tuttu in ordini. Avemi da cinquanta à più di sessanta anni. Compostella, ghjè 20 à 25 chilometri à ghjornu durante più d’un mesi, ci vulia à accuncià tuttu di manera à più precisa. »
Una sfida spirituale
Cusì, i cinque aiaccini si sò appruntati durante sei mesi, fendu 15 chilometri trè volte a settimana, fighjulendu a robba à manghjà, u sonnu…Jean-Marc Franceschini hà ancu arrestatu di fumà. Dopu à sei mesi d’appruntera, l’amichi si sò ritruvati marti u 14 d’aprile per a partenza. In squadra, ognunu hà un rolu precisu : Jean-Marc hè incaricatu di a preparazione spurtiva, in tantu chè spinghjifocu prufessiunale, Julien ferà casu à a salute o e ferite, Jean-Paul a logistica (u manghjà, l’alberghi), François hà da purtà a so sperienza è José, d’origine spagnola, puderà assicurà e traduzzione. Pertuti d’Aiacciu dopu à benedizzione di u prete Ange-Marie Bastelica, i cinque amichi sò ghjunti in Marseglia. Da quì, anu principiatu u percorsu sin’à Compostella. In tuttu, 750 chilometri à pedi per ritruvà o mantene a fede. « L’avemu un pocu persa cù a vita ch’è no t’avemi. A visita di u Papa Francesco accindì una piccula fiara in mè. Stu parcorsu hè una sfida spurtiva ma sopratuttu spirituale. Semi partuti à cinqui. Vultaremi à cinqui. »
L’amichi divarianu esse in Corsica versu u vinti di maghju…
Ph.P.
PHOTOS : Jean Marc Franceschini