Una « legenda » per pone a questione di u diventà di l’omu

Una « legenda » per pone a questione di u diventà di l’omu

L’artistu isulanu Pierre Gambini hà esciutu, pochi tempi fà, u so ultimu spettaculu. « A legenda », una fola chì si passa ind’un mondu imaginariu. Ma l’autore hà vulsutu andà ancu più luntanu cù u spettaculu di ceppu spirituale cuntatu è cantatu…

Pierre Gambini face a so strada in u mondu di u cantu dapoi dighjà più di vinti anni. Ma, u cunniscimu cù a so particularità di sprimesi, certu, in lingua nustrale, è cù una cuncipitura musicale chì face a so grinfia. È l’omu, chì t’hà sempre qualchì idea in capu, hà travagliatu qualchì tempu nantu à l’imaginariu. « Face parte di a nostra tradizione, spiega l’autore, hè qualcosa, ancu s’è u mondu mudernu piglia, à pocu à pocu a suprana, chì hè sculpitu ind’ a nostra memoria cullettiva. »

Una fola nantu à u cundiziunamentu di l’omu
Cusì, vintott’anni fà, Pierre Gambini avia scrittu un prughjettu di storia nantu à a legenda. Una creazione uriginale ch’ùn avia micca pussutu pruduce cù pochi mezi à l’epica. Chè u scopu era una spezia di fola cuntata è cantata cù adurnamenti, musicanti, attori, ecc... « Dui anni fà,aghjusta l’artistu, aghju ripigliatu tuttu u scenariu è l’aghju cuncepitu intornu à un persunaghju unicu (ellu stessu), chì ghjunghje nantu à a scena è conta a so storia. »
In Cillavita, una cità imaginaria, tuttu hè fattu per chè l’abitanti ùn manchinu di nulla ma sopratuttu chè tutti i bisogni sianu cumpletti. Ma, d’un altru cantu, devenu fà qualcosa chì li piace assai per ùn pensà à a so situazione. Tandu, si stalla una spezia di fiacchezza è a repetizione di l’atti cutidiani diventa una trappula. Un mondu senza emuzione... Cum’è in tante storie, ghjè l’amore d’una donna chì permette di sorte di stu mondu. « Ci hè una tombula per vince l’immurtalità, a ghjente sò pacati in sognu...U persunaghju rimette tandu tuttu in causa. »

Quattordeci canzone
Pierre Gambini ùn hà vulsutu, di sicuru, spiegà cumu finisce a storia. Ma un spettaculu cuntatu à mezu à quattordeci canzone chì seguitanu, d’une certa manera, i sintimi ch’ellu risente u persunaghju principale. Tandu si pò passà da u rock à u folk o una canzona più dolce...Altra particularità, a storia hè cuntata in francese è cantata in corsu. « Hè a lingua di a legenda... » Un spettaculu appena misticu chì pone qualchì questione nantu à u mondu d’oghje, l’IA-ch’ellu adopra l’autore- è chì ferma di a nostra umanità ? « Ùn hè a puesia ch’è no cunniscimu,Quessa hè liata à una dimensione spirituale. »
Per mette in vale u so prughjettu, l’artistu hà chjamatu qualchì amicu musicante è tecnichi : Jean Castelli (ghitarra bassa), Nico Torracinta (ghitarra), Dimitri Pinet (batteria), Vincent Grisoni (lumi), fiure, Anouar Benali (sonu)...Per sbuccà nantu à un spettaculu d’un ora è mezu ch’ùn esiste indocu. « Hè una spressione chì piglia e so radiche in u cantu populare, l’arte sonore mudernu. Parechje pratiche artistiche facenu ch’ellu hè qualcosa d’unicu. U tuttu cù u sustegnu di a Cullettività di Corsica. Sta fola dà un mecanisimu chì ci face ciuttà inde a memoria cullettiva è l’imaginariu. »
Esciuta di marzu scorsu, « A legenda » hè stata prisentata à l’Albore, in Bastia, Corti, Calvi è Purtivechju. A squadra serà u 28 di lugliu in Zonza è u 2 d’ottobre nantu à a scena di l’Empire in Aiacciu. « In stu prughjettu quì, ci hè parechji nivelli di lettura. A storia pò esse capita da tutti...E prime minute, a ghjente hè surprese. Ma ciò chì mi piace u più, hè di vede ch’à a fine, u publicu hà capitu l’essenza di u spettaculu... »
Dopu à tutte ste date, « a legenda » divaria piantà si quì. Ma Pierre Gambini hà l’idea di prinsità u so prughjettu una volta l’annu. Una manera di sveglià e cuscenze…

F.P.
Photo : Pierre Gambini