Restituzione « in paghjella » per l’attelli di cantu tradiziunale !
Dopu à un annu di travagliu, l’attelli messi in piazza da u centru d’arte pulifonicu di Sartè, gestiti da Ghjuvan Francè Luciani, si sò ritruvati in Lama u 4 di lugliu
Restituzione « in paghjella » per l’attelli di cantu tradiziunale !
Dopu à un annu di travagliu, l’attelli messi in piazza da u centru d’arte pulifonicu di Sartè, gestiti da Ghjuvan Francè Luciani, si sò ritruvati in Lama u 4 di lugliu. L’occasione, davanti à un publicu numarosu assai, di mette in vale i canti amparati tuttu l’annu.
Sò avà parechji anni chè u Centru d’Arte di Sartè mette in piazza, cù a Cullettività, attelli dedicati à l’amparera di u cantu in paghjella. In tuttu, ci hè guasgi trè centu stanziati chì travaglianu tuttu l’annu intornu à stu genaru. Hè ghjunghjenu da tutti i lochi di Corsica : Aiacciu, Bastia, Purtivechju, Patrimoniu è Nebbiu, Prunelli di Fium’Orbu, Tiuccia, Tagliu, Tavagna, Lama, U Ponte à a leccia, u Taravu è ancu Marseglia ancu s’è questu annu, ùn avianu pussutu vene.
Mantene una leia suciale in tutti i territorii
« U scopu hè di sparghje l’idea in tutti i lochi di l’isula, spiega Ghjuvan Francè Luciani, capimachja di a struttura, si tratta, di sicuru, di l’amparera di u cantu in paghjella, chì ghjè un arte ma sopratuttu di mantene una leia suciale in tutti i territorii. »
Cusì, è dopu à qualchì annu in Corti, tutte e squadre si ritrovanu in Lama ogni primu sabbatu di lugliu. « Una data fissa nanzu à e vacanze, aghjusta Ghjuvan Francè Luciani, permette à ognunu d’appruntà si. »
Cusì, stu quattru di lugliu, eranu una bella centenaia à piglià a strada di Lama, paese alzatu nantu à l’anziana pieve di Canale. L’occasione, per quelli ch’ùn eranu mai ghjunti, di scopre a cappella San Lurenzu, a ghjesgia è tanti lochi sputichi…
Un travagliu d’un annu
Ma s’hè trattatu sopratuttu, per ogni squadra, di restituisce, dopu à un bellu pranzu nustrale, u travagliu d’un annu. Durante trè ore, e squadre, gestite da furmatori monda cunnisciuti per a maiò parte (Cristianu Andreani, Michè Paoli di Tavagna, Laurent Bruschini, Michè Solinas) anu prisentatu u fruttu di u so travagliu. Paghjelle è altre pulifunie sacre è prufane, ma dinò tradizione di u Taravu, munudie, canti di a tradizione aiaccina (canti di pescadori cù mandulina è urganettu), ognu à modu soiu è secondu à u so nivellu. In fine di dopu meziornu, tutti si sò ritruvatu per cantà u Diu è dopu, qualchì paghjella à u frescu di platani...U tuttu nanzu à un cuncertu di u gruppu l’attrachju, sempre intornu à a pulifunia. « Una bella ghjurnata, aghjusta u capimachja di a struttura, ognunu hè ghjuntu à purtà a so petra ma fù dinò l’occasione di scambià trà stazianti è furmatori è sopratuttu di cantà, ciò chì hè u più impurtante. »
Scrive a manifestazione à longu andà
Frà e squadre, certi sò stati sopra piazza da scopre issu magnificu paese, d’altri anu impaghjellatu « sin’à ghjornu », l’occasione d’esse in cuntattu strettu cù a tradizione. È ghjè dinò ciò ch’ellu s’aspetta d’iss’attelli. E strutture piantanu durante l’estate. « Avemu da circà à allargà e squadre è apre d’altri attelli, aghjusta Ghjuvan Francè Luciani, hè una struttura chì si scrive à longu andà cù u travagliu è l’impegnu di tutti, stazianti è furmatori. A pedagugia hè necessaria hè, in issu sensu quì, ognunu hè capace di fà passà un filu. »
E squadre anu da ripiglià di vaghjime è travaglià un annu per una prussima restituzione privista u trè di lugliu di u 2027.
F.P.
crédit photo : Ph.P