• Le doyen de la presse Européenne

Terminator 2 duppiatu in corsu !

Per marcà u so decesimu anniversariu, l'associu " Fiura Mossa " , specializatu in i duppiami di disegni vivi , hà vulsutu riesce un culpone.
Terminator 2 duppiatu in corsu !

Per marcà u so decesimu anniversariu, l’ associu « Fiura Mossa », specializatu in i duppiami di disegni vivi, hà vulsutu riesce un culpone. I so respunsevule anu travagliatu nantu à u duppiame di u filmu Terminator 2. Principiatu in u 2019, u prughjettu hè statu finalizatu d’aostu scorsu. Un travaglione di tutta a squadra…

Fà parlà in corsu u famosu Terminator, Sarah, John Connor è tutti i persunaghji di « Terminator 2 », un filmu esciutu à u principiu di l’anni novanta, eccu u scopu maiò di a squadra di l’associu « Fiura Mossa ». Un prughjettu impurtante principiatu in u 2019.

Cù i Brittoni è l’Uccitani

« L’idea, spiega Ghjuvan Iviu Casalta, unu di i so respunsevuli, era di marcà i dece anni di l’associu è traduce un filmu assai cunnisciutu in a so epica. A scelta s’hè fatta nantu à Terminator 2, filmone di u 1991. Ma ci vulia, nanzu à tuttu, cunvince a sucetà di pruduzzione « Studio Canal » è dinù a sucetà di i Stati Uniti chì era à l’origine di u filmu. Tandu, è per avè di più pesu, avemu fattu una dumanda cumuna cù dui altri associ : Dizale (Brittagna) è Conta’n (Uccitania). »

Dopu avè studiatu u cartulare, Studio Canal da u so accunsentu à e trè squadre. Eppo a dumanda parte in America, per un accordu finale. L’inseme sbocca nantu à diritti è cuntrattu.

« Dopu à u cuntrattu, aghjusta Ghjuvan Iviu Casalta, u studiu ci hà mandatu u materiale necessariu per fà i duppiami. Prima di tuttu, a versione internaziuale, vale à dì solu cù i rimori è a musica, senza i cuntrasti per permette ghjust’appuntu di registrà e voce. Ci anu mandatu dinù a versione originale. »


Cinquanta cinque participanti

Durante l’estate di u 2019, Ghjuvan Iviu Casalta principia l’adattazione in corsu. « Ci vulia à fà curresponde e parolle cù u muvimentu di a bocca è per quessu, girà, certe volte l’infrasate. Un travagliu chì hà pigliatu appena di tempu. »

Ind’un terzu tempu, a squadra di Fiura Mossa metterà in piazza à u principiu di l’annu 2020, duie audizione per sceglie e persone incaricate di i duppiami. « U prughjettu hè statu attempatu per via di u cunfinamentu. Ma avemu cercatu in u frà tempu, à avanzà, cusì avemu accunciatu un studiu specificu pè i duppiami di filmi. »

In fine, l’audizione si facenu. Cinquanta cinque persone seranu scelte. Certi sò cumedienti prufessiunali cum’è Filippu Ambrosini, d’altri amatori (Letizia Damiani chì ghjoca Sarah Connor), d’altri dinù ghjunghjenu da u mondu di u cantu (cum’è Andria Dominici, cantadore di Barbara Furtuna, chì doppia Arnold Schwarzenegger)... Andria Casalta (figliolu di Ghjuvan Iviu) impresta a so voce à John Connor. In tutti seranu cinquanta cinque à participà à stu bellu prughjettu. Un prughjettu purtatu cù l’aiutu di a CdC è di l’ADEC.
In fine, è dopu à quindeci ghjorni di registramenti durante l’estate scorsu, Terminator 2 in lingua nustrale hè guasgi prontu. Fermanu solu i mischji in stereò è in 5.1 (per e sale di sinemà). « Vuliamu fà esce u filmu durante a festa di a nazione pè l’ottu di dicembre cù diffusione pè i sculari ma u prughjettu hè statu attempatu. Speremu ch’ellu si puderà fà di veranu. »

In u frà tempu, Via Stella hà compru u filmu è Terminator 2 hè passatu durante e feste. « I ritorni sò boni. Assai persone eranu surprese ma tutte sò state subbitu pigliate da u filmu, era quessu quì u nostru scopu. »

A squadra di Fiura Mossa, purtata da u so presidente Silviu Giannecchini è una decina di membri ripiglianu u so filu. Dopu à una cunvenzione zifrata cù a Cdc (200 m di prugramazione in corsu à l’annu durante trè anni), travaglianu nantu à un filmu d’animazione per i zitelli. Aspettanu dinù di finalizà un prughjettu di duppiami d’un filmu per a famiglia…I prughjetti ùn mancanu micca. S’aspetta, avà a seguita di u travagliu...

F.P.
Partager :