S’hè spentu Antone Ciosi

S’hè spentu Antone Ciosi

Tercanu di u cantu corsu, Antone Ciosi s’hè spentu a settimana scorsa in u so paese di Curzu (paisolu di Corbara in Balagna), à l’età di novantaquattru anni. Cù sessanta anni di carriera è quaranta dischetti esciuti, a so lascita hè tamanta. Un omu chì hè statu unu di i primi à francà u passu musicale d’una Corsica appena « fulclorica » ver di l’identità marcata da u riacquistu...

« Le prisonnier », « Casa antica », « le dernier des bandits », « Tragulinu »...Quale hè ch’ùn hà micca, fora di i più ghjovani, cantichjatu una di ste canzone una sera in caffè o ancu in casa cù una ghitarra...Tutte ste canzone, l’averete capita sò liate à Antone Ciosi, Balaninu chè a voce averà « viculatu » parechje generazione di Corsi. A so sparizione, a settimana scorsa in u so paisolu di Curzu (Corbara), hà toccu tutta l’isula. Hè quant’è s’aviamu persu un parente. Ci vole à ricunnosce chè cantà durante guasgi sessanta anni da « Cervioni » (aprile 1960) à « Corsu Mezu mezu » (2020) è « Babbu è figliolu » (2023 cù ghjust’à puntu u so figliolu Ghjilormu), hè quantunque un fattu abbastanza scarsu in Corsica è ancu altrò.

Da u focloru à u riacquistu
Natu trà e duie guerre (1931) in Sorbu Ocagnanu, Antone Ciosi fù unu di i setti figliolu d’una famiglia allivata da a mamma dopu à a sparizione di u so maritu. Ghjè u cantu « paese spentu » esciutu in u 1963 chì li vale u premiu di u primu festivale di a canzona corsa à l’Olympia à un’epica induve i Corsi eranu una triscia in Parrighji, Marseglia, Liò o Nizza. Stu premiu marca un primu passu di sessanta anni di carriera. Antone Ciosi serà in l’anni nanzu è ancu dopu à u Riacquistu (à partesi di l’evenimenti d’Aleria), un artistu, forse unu di i primi, à trattà di a realità di a Corsica. `ùn si tratta più di e « cartuline » dedicate à i turisti. Ellu canta l’esiliu, u paese, a partenza, a nostalgia, a vita paisana...Una Corsica chì scambia, chì rivindicheghja è chì vole mustrà nanzu à « Canta u populu corsu » in l’anni settanta, un’isula in perdita di a so cuscenza, a so anima è a so identità. S’ellu hà cantatu i fratelli Vincenti, averà dinò è sopratuttu travagliatu cù Filippu Marfisi, cumpunitore. Da « Ritornu » à « I canti di a libertà », Antone Ciosi hà accumpagnatu tante generazione di cantadori. Sin’à participà à u primu « Mezu à mezu », in u 2020, cantendu « O Corse île d’amour » à fiancu à Patrick Fiori. Quellu dicerà qualchì tempu fà chè «u primu mezu mezu, hè Antone Ciosi chì u fece. Sò statu viculatu cù e so canzone. S’è « Corsu Mezu, mezu » hè esciutu, hè perchè ci hà sulcatu a strada, cantendu in corsu è in francese, è certe volte, ancu i dui à tempu (Le prisonnier per indettu).

Una memoria cullettiva tramandata
Averemu capitu, tandu, l’impurtenza di a lascita d’Antone Ciosi chì hà datu un filu sputicu à tanti cantadori. Era dinò capace d’impaghjellà cù i so amichi...Certe di e so canzone, fermanu oghje in a memoria cullettiva di i Corsi è serà quessa a lascita à più sputica ch’ellu ci hà tramandatu. Anu fattu a leia trà eri, oghje è dumane ( titulu di u primu dischettu di Canta) cù una spressione identitaria, dighjà à quella epica. Spressione ripigliata da Canta, i Muvrini, i Chjami Aghjalesi è tanti altri... Senza sminticà una carriera chì francò u tempu. Hè cusì chè Antone Ciosi fece stu ponte musicale. Hè pertutu ma hà tramandatu à traversu i so canti, è masimu à Ghjilormu u so figliolu, issu qualcusellu di sputicu ch’ùn si perde micca : l’anima corsa.

F.P.
crédit photo : Philippe Peraut