• Le doyen de la presse Européenne

L'addunita daretu à " L'ora di u ritornu "

Appena mutu dapoi qualchì tempu aspettendu a pusizione di a ghjustizia per ciò chì tocca à a situazione di Petru Alessandri è Alanu Ferrandi, u cullettivu « L’ora di u ritornu » s’impegna à mezu à l’avucati per fà valè i diritti di i dui omi è assicurà...
L’addunita daretu à « L’ora di u Ritornu »

Appena mutu dapoi qualchì tempu aspettendu a pusizione di a ghjustizia per ciò chì tocca à a situazione di Petru Alessandri è Alanu Ferrandi, u cullettivu « L’ora di u ritornu » s’impegna à mezu à l’avucati per fà valè i diritti di i dui omi è assicurà u so avvicinamentu in Corsica. Un muvimentu di sustegnu principia à sviluppà si…


Più di vinti anni dopu à l’assassiniu di u Prifettu Erignac, u sei di ferraghju di u 1998, trè omi frà tutti quelli chì sò stati cundannati, fermanu sempre in prighjò : Alanu Ferrandi, Petru Alessandri è Yvan Colonna.

Di fattu, vinti anni sò passati è mentre chè a legge permette l’avvicinamentu di i prighjuneri secondu à i so territorii, i Corsi, elli, sò sempre alluntanati da i soi. Sapendu d’altronde, chè dopu à un numaru d’anni precisu (secondu à a sicurezza), a liberazione cundiziunale permette à certi prighjuneri di pudè -dipende di u so cumpurtamentu-rientre in casa soia.


Una legge da fà rispettà

Issa situazione, i prighjuneri corsi cundannati per l’assassiniu di u prifettu, l’anu particularmente. Per prova, Alanu Ferrandi è Petru Alessandri anu fattu vinti anni è pudarianu prufità d’issa legge. Ma a ghjustizia francese, piazzata, ci vole à dilla, sottu à u sguardu di u Guvernu (mentre chè per via di a demucrazia issi puteri devenu esse spiccati), ùn dice micca cusì. Piazzati in u statu di DPS (prighjuneri particularmente survegliati) malgratu un cumpurtamentu bonu, ùn ponu nè sorte (liberazione cundiziunale), nè esse avvicinati da i soi. Di colpu, e so famiglie si sò impegnate. Dendu nascita, qualchì annu fà, à u Cullettivu « L’ora di u Ritornu ». Cù u scopu precisu, à mezu à avucati è a Lega di i Diritti Umani, di fà valè i diritti di i dui prighjuneri. Si pò dì, dinò ch’ella ci era una certa sperenza, masimu chè a ghjustizia ùn era contru l’avvicinamentu di Petru Alessandri è Alanu Ferrandi.

Ma ogni volta, u cartulare hè chjosu, Parrighji pigliendu a decisione di mantene i dui Corsi aldilà d’ind’è elli.

Secondu à e famiglie è guasgi tuttu u mondu in Corsica (micca solu), saria un affare di Statu. Cusì, è dapoi più d’un annu, e famiglie cuntinueghjanu à palisà una situazione ch’ùn si pò micca accettà. Di ghjugnu u 2019, U Cullettivu, a Lega di i Diritti Umani avianu datu una cunferenza di stampa davanti à a Prifettura in Aghjacciu. « Ùn si tratta micca d’annistia, spiegava à l’epica Thierry Casanova, membre di u Cullettivu, ma solu di l’appicazione d’una legge. »

Candidatu à l’elezzione in u 2017, u futuru presidente di a Republica s’era sprimatu in favore di a dumande dii e famiglie. Dui anni, guasgi sò passati è a situazione ùn scambia micca.


Manifestazione stu sabbatu in Aghjacciu

Peghju, a ghjustizia ùn era contru à l’avvicinamentu di Petru Alessandri è Alanu Ferrandi, ma sta volta hè u prima ministru chì hè ghjuntu à mettesi à mezu, ricusendu di caccià u statu di DPS à dui omi. Un culpacciu novu per e famiglie ch’ùn volenu micca accettà a situazione. « Si tratta quì di mantene dui omi durante tutta a so vita ? Quessu, ùn lu vulemu. Per avà, ùn hè ci alcuna perspettiva d’avvicinamentu. Dumandemu solu l’appiicazione di a legge, nulla d’altru... »

Dapoi qualchì tempu, l’eletti di l’Assemblea di Corsica anu seguitatu u muvimentu è s’impegnanu à prò di e famiglie. « Parrighji calpighjeghje e so propii legge di dirittu, hà scrittu Jean-Guy Talamoni, u presidente ind’una lettera, a lotta deve cuntinuà à prò di Petru Alessandri, Alanu Ferrandi, Yvan Colonna è tutti i prighjuneri pulitichi corsi sempre incarcerati... »

U muvimentu piglia forma è si sviluppa. A manifestazione di stu sabbatu ci puderà dà qualchì infurmazione nantu à l’impegnu di i Corsi in sta situazione quì…

F.P.

Pétition : Pour la levée du statut DPS et la réinsertion d'Alain FERRANDI et de Pierre ALESSANDRI
Partager :