• Le doyen de la presse Européenne

Sapè Fà : " Mare è gustu ", da u mare à u piattu ...

Creata quattru anni fà da Sébastien Rialland, pescadore bastiacciu, issa piccula sucetà prupone caraffoni di sosule di pesci (tonnu rossu è spadonu) à partesi da a pesca lucale trasfurmata in attellu è accunciata da cucinari rinumati…
« Mare è gustu », da u mare à u piattu…

Creata quattru anni fà da Sébastien Rialland, pescadore bastiacciu, issa piccula sucetà prupone caraffoni di sosule di pesci (tonnu rossu è spadonu) à partesi da a pesca lucale trasfurmata in attellu è accunciata da cucinari rinumati…


Sébastien Rialland avaria pussutu fà studii impurtanti chè à l’età di sedeci anni avia un bellu percorsu scularu in tutte e discipline. Ma...A passione di a pesca era troppu forte. « U me missiavu, Petru, era pescadore, spiega u Bastiacciu, hà tramandatu issu filu à Yves, u me babbu. Ed eiu aghju amparatu cun ellu. À dilla franca, sò cresciutu in a pesca. Seguitava sempre à babbu, da zitellu. Eppo, in casa, si parlava sempre di pesca. È cusì, à 16 anni, aghju decisu di lascià a scola per piglià issa strada quì. Hè u me percorsu di vità. »

Oghje, è à l’età di 36 anni, Sébastien pesca dapoi vinti anni. In u 2003, hè marinaru cù u so babbu è dui anni dopu, pescadore prufessiunale nantu à u so battellu « Pépé », in umaggiu à u so missiavu. « Hè un mistieru abbastanza duru, cuncede u pescadore, ma s’è noi ci punimu a questione, arrestemu subbitu. Pensu chè a passione ci porta. Eppo tutti i mistieri anu e so difficultà. »

E difficultà, ùn mancanu micca à u pescadore, chì hà fattu a scelta d’una pesca liata à l’eculugia è l’ambiente, è di pescà u tonnu rossu è u spadonu à l’antica (cù a canna è l’amu). Qualchì tempu fà, cù un sviluppu di u tonnu in periculu, l’Auropa mette in piazza una limita di pesca (5 tonne à l’annu). Tandu, l’attività di Sébastien Rialland hè minaciata. « In u percorsu da a pesca sin’à a cunsumazione, eru quellu chì vincia u menu. Mi tuccava, dinò, à truvà suluzione per mantene a me attività. Tandu, aghju fattu a scelta di creà « Mare è gustu ».


U labellu « pesca durevule »

l’idea face a so strada è u pescadore trova un cuncettu particulare chì porta versu l’eccelenza : parte da a so pesca per ghjunghje à prudutti in caraffoni passendu per un attellu induve u pesciu hè trasfurmatu d’una manera precisa per mantene a so qualità (una tecnica giappunese) è accunciatu in una sosula di qualità maiò cù u travagliu di cucinari rinumati cum’è Julien Duboué o Yan Le Scavarec. « Pigliemu dinò ghjovani chì escenu da l’emissione « Top Chef », anu l’occasione di mette a so zifra nantu à prudutti d’eccelenza. »

Cusì, a cunserveria, chì nasce quattru anni fà, ottene u labellu « Pesca durevule ». U prughjettu, ellu, hè sustenutu da a trafila pesca è suvvenzziunatu da l’Uffiziu di l’Ambiente di a Corsica.

L’impresa hè in Furiani, d’una superficia di 100m2. Hè quì chè tuttu si passa : trasfurmazione in filetti, cundiziunamentu, cunghjelazione. A parte sosula curresponde à una scheda tecnica precisa. « L’inseme hè artisgianale ma cù a ricerca di l’eccelenza di i nostri prudutti. Semu solu quattru à travaglià : un marinaru nantu à u battellu, un in l’attellu, un cummerciale, a me moglia ed eiu. »

E sosule sò di qualità cù pesci (tonnu, spadonu ma dinò raza) è polpu accunciati cù u brocciu, l’oliu d’alivu, agrume, figatellu, senapa, mortula, piveroni... »Avemu una decina di sosule, ne pudemu aghjustà duie o trè à l’annu. «

A sucetà pruduce 10000 caraffoni à l’annu. « «Speremu duppià da quì à dui anni ».

È per ciò chì tocca à a distribuzione, « Mare è gustu » travaglia cù spezierie fine. « U scopu hè, avà, di valurizà u nostru pruduttu... »

Quattru anni dopu à a so creazione, a sfida di Sébastien Rialland hè una riesciuta. Per prova, « Mare è gustu » hè a prima impresa di cunserveria di tonnu rossu à u nivellu naziunale. Senza cuntà natu à prudutti dighjà venduti in Corsica è in altrò (Parrighji, Bordeaux, Sète, Narbonne…) è ancu in Belgica. Segnu chì a sucetà face a so strada...

Ph.P.

Mare è gustu
Villa Marie-Pierre
Chemin Sansonetti, 20600 Furiani
Email : contact@mare-gustu.com
Situ : www.mare-gustu.com : 06-36-36-55-43
Partager :