U cuncetta di scola immersiva piglia u so volu
Natu da a vulintà di l’associu « Scola corsa », u cuncettu di scola immersiva principierà di settembre prussimu in Bastia è Biguglia. D’altre pudarianu, à più o menu longu andà seguità…
U cuncettu di scola immersiva piglia u so volu
Natu da a vulintà di l’associu « Scola corsa », u cuncettu di scola immersiva principierà di settembre prussimu in Bastia è Biguglia. D’altre pudarianu, à più o menu longu andà seguità…
Arrimbà si à nantu à un cuncettu chì esiste dighjà in altrò è prupone suluzione per a salvezza di a lingua, eccu u scopu di l’associu « Scola Corsa » chì hà ufficializatu, a settimana scorsa, l’apertura di settembre prussimu, di duie scole immersive in Cismonte (Bastia è Biguglia). Una annuncia fatta da Ghjiseppu Turchini, presidente di l’associu accumpagnatu da Francescu Alfonsi deputatu aurupeu, Ghjuvan Carlu Giabiconi, merre di Biguglia, di presidenti d’altre sezzione di « Scola Corsa » è di persunalità impegnate à prò di a lingua dapoi sempre.
Pruduce lucutori pratichi
«Iss’idea quì, spiega Ghjiseppu Turchini, esiste in parechje regione francese. U retale « Escolib » arricoglie i Baschi, l’Uccitani, i Brittoni, l’Alsazziani, i Catalani...Hè un principiu chì hà fattu e so prove. Si sà chè l’insignamentu immersivu pruduce à longu andà lucutori pratichi... »
Si tratta quì, arrimbendusi nantu à l’esempii d’altre regione, di millai di sculari chì ricevenu un insignamentu i a so lingua da a scola materna sin’à u liceu. Cù, à partesi da u CE1, l’intruduzzione di a lingua francese (20%). « Vulemu fà una vera trafila d’insignamentu immersivu, aghjusta u presidente di « Scola Corsa », ci vole à sapè chè dopu à prove fatte da l’Educazione Naziunale, e cumpetenze di zitelli di e scole immersive sò state valutate megliu chè l’altre. A pedagugia, ella, hà fattu, ancu ella, e so prove... »
Una bona, quantunque, masimu chè u corsu hè statu classificatu da l’Unesco cum’è lingua in gran periculu…
Un primu passu
Di manera pratica, l’insignamentu si ferà da a matina à a sera (da 8.30 à 16.30), cumpresu l’attività ludiche, perisculare, a cantina, a ricreazione, l’accuglianza, u manghjà, a siesta, ecc... « Hè un dispusitivu chì spanna veramente a pratica di a lingua. U scopu hè di pruduce tanta ghjente corsofuna ma dinò di furnisce i quadri futuri di l’insignamenti, cumpresu quelli di l’insignamentu publicu ch’è noi semu in cumplementarità cun ellu. Si sà ch’induve ci hè issu genaru d’insignamentu, un’emulazione si face. »
Duie scole anu da apre e so porte dunque in Biguglia è Bastia di settembre cù una quindecina di zitelli dighjà scritti (e scrizzione ùn sò ancu chjose…). Ci seranu, per principià, un’ATSEME è dui insegnanti, l’associu serà, per contu soiu, impegnatu per ciò chì tocca à u perisculare...Per avà, i dui siti ponu quantunque cuntà nantu à lucutori attivi, una bona per mette in vale stu prughjettu. À più o menu longu andà, « Scola Corsa » vuleria apre d’altre scole in tutta a Corsica. « Ùn ci vole micca à fà u passu più grande chè l’infurcatura per via d’una cullata in suchju ch’ellu ci vole à misurà è gestisce ma avemu tante dumande da cumune interessate. Isse duie prime scole sò per noi, u principiu d’un retale chì si vole stende à tutta l’isula... »
Un’imbusca maiò chì speremu, aiuterà à u sviluppu di a lingua corsa. È un primu passu n’aspettendu d’altri…
Ph.P
Natu da a vulintà di l’associu « Scola corsa », u cuncettu di scola immersiva principierà di settembre prussimu in Bastia è Biguglia. D’altre pudarianu, à più o menu longu andà seguità…
Arrimbà si à nantu à un cuncettu chì esiste dighjà in altrò è prupone suluzione per a salvezza di a lingua, eccu u scopu di l’associu « Scola Corsa » chì hà ufficializatu, a settimana scorsa, l’apertura di settembre prussimu, di duie scole immersive in Cismonte (Bastia è Biguglia). Una annuncia fatta da Ghjiseppu Turchini, presidente di l’associu accumpagnatu da Francescu Alfonsi deputatu aurupeu, Ghjuvan Carlu Giabiconi, merre di Biguglia, di presidenti d’altre sezzione di « Scola Corsa » è di persunalità impegnate à prò di a lingua dapoi sempre.
Pruduce lucutori pratichi
«Iss’idea quì, spiega Ghjiseppu Turchini, esiste in parechje regione francese. U retale « Escolib » arricoglie i Baschi, l’Uccitani, i Brittoni, l’Alsazziani, i Catalani...Hè un principiu chì hà fattu e so prove. Si sà chè l’insignamentu immersivu pruduce à longu andà lucutori pratichi... »
Si tratta quì, arrimbendusi nantu à l’esempii d’altre regione, di millai di sculari chì ricevenu un insignamentu i a so lingua da a scola materna sin’à u liceu. Cù, à partesi da u CE1, l’intruduzzione di a lingua francese (20%). « Vulemu fà una vera trafila d’insignamentu immersivu, aghjusta u presidente di « Scola Corsa », ci vole à sapè chè dopu à prove fatte da l’Educazione Naziunale, e cumpetenze di zitelli di e scole immersive sò state valutate megliu chè l’altre. A pedagugia, ella, hà fattu, ancu ella, e so prove... »
Una bona, quantunque, masimu chè u corsu hè statu classificatu da l’Unesco cum’è lingua in gran periculu…
Un primu passu
Di manera pratica, l’insignamentu si ferà da a matina à a sera (da 8.30 à 16.30), cumpresu l’attività ludiche, perisculare, a cantina, a ricreazione, l’accuglianza, u manghjà, a siesta, ecc... « Hè un dispusitivu chì spanna veramente a pratica di a lingua. U scopu hè di pruduce tanta ghjente corsofuna ma dinò di furnisce i quadri futuri di l’insignamenti, cumpresu quelli di l’insignamentu publicu ch’è noi semu in cumplementarità cun ellu. Si sà ch’induve ci hè issu genaru d’insignamentu, un’emulazione si face. »
Duie scole anu da apre e so porte dunque in Biguglia è Bastia di settembre cù una quindecina di zitelli dighjà scritti (e scrizzione ùn sò ancu chjose…). Ci seranu, per principià, un’ATSEME è dui insegnanti, l’associu serà, per contu soiu, impegnatu per ciò chì tocca à u perisculare...Per avà, i dui siti ponu quantunque cuntà nantu à lucutori attivi, una bona per mette in vale stu prughjettu. À più o menu longu andà, « Scola Corsa » vuleria apre d’altre scole in tutta a Corsica. « Ùn ci vole micca à fà u passu più grande chè l’infurcatura per via d’una cullata in suchju ch’ellu ci vole à misurà è gestisce ma avemu tante dumande da cumune interessate. Isse duie prime scole sò per noi, u principiu d’un retale chì si vole stende à tutta l’isula... »
Un’imbusca maiò chì speremu, aiuterà à u sviluppu di a lingua corsa. È un primu passu n’aspettendu d’altri…
Ph.P
