• Le doyen de la presse Européenne

Ghjuvan Carlu Papi canta u so << Sperà >>

L'artistu isulanu hà principiatu u so giru 2021 u 14 di lugliu in Portu.
Ghjuvan Carlu Papi canta u so « Sperà »


L’artistu isulanu hà principiatu u so giru 2021 u 14 di lugliu in Portu. Ci prisenta u so ultimu dischettu esciutu di dicembre. Parechje date anu da seguità sin’à u nove di settembre è ancu aldilà. L’occasione di misurà u percorsu d’un cantadore è cumpositore chè a carriera hè nata in tempi di u riacquistu…


Quelli chì cunnoscenu à Ghjuvan Carlu Papi dapoi qualchì annu, sanu pocu, à dilla franca, di u so percorsu canterinu è militante. Per l’altri, forse più anziani, averà pochi sicreti…

È s’ellu batte, oghje, solu cù i so musicanti, hà seguitatu, da i Surghjenti inde l’anni settanta sin’à Canta u Populu corsu, passendu per u gruppu studientinu « A Palatina », « Novi » o « Arapà » cù u so amiccu Don Matteu Santini, l’evoluzione di u cantu corsu « U cantu era par mè una passioni, spiega l’artistu, cù parenti militanti chì ascultavani à Carlu Rocchi o Canta u Populu Corsu, ci era un filu ch’eu seguitu sempri... »


Da « I Surghjenti » à « Arapà »

Principiatu à l’età di quindeci anni cù « A grana di a vita » (I Surghjenti), issu filu hà seguitatu l’evoluzione di u cantu corsu, arrimbatu nantu à quella di a sucetà. Hè cusì, ch’in ottantanove, Natale Luciani vene à circà lu per fà lu entre in a squadra di Canta u Populu Corsu. E so voce nantu à « Sintineddi » « Ti vurria dì » o « Lettera d’Argentina » u facenu cunnosce…

È s’ellu scambia appena di versu, dopu, ùn hè chè per ripiglià un filu zitellinu, quellu cù « Novi » di versi à modu folk, pop. « Di fattu, aghju avutu sempri a vodda di fà canzoni ritimati pocu impremi i strumenti. »

Dopu à « Arapà » cù i so amichi Don Matteu Santini è Ghjacumu Culioli, li vene a scelta di parte solu. « Arapà hè una bedda sperienza, trè dischetti eppo l’Olympia ! »

« Aviu assai affari parsunali à dì è dinò scelti musicali particulari cù testi forsa più umanisti... »

« d’Umani », « Essenziali » è l’ultimu esciutu di dicembre scorsu « Sperà », eccu a discugraffia di l’artistu dapoi u 2011. Un tritticu chì mette l’omu cù tuttu ciò ch’ellu hà di più nobile nentru à ellu, à u centru d’interrugazione umaniste è spirituale. Cù « Sperà », Ghjuvan Carlu Papi ripiglià qualchì cantu dighjà cunnisciuti cum’è « Sintineddi », « Essenziali », « Ella » è à tempu canzone nove « Mari » adattazione d’Otello di Shakespeare. È, di sicuru, « Sperà » scritta in pienu cunfinamentu. « Ci erani l’arnesi par pudè travaddà in casa è in distanza... »

Ghjuvan Carlu Papi scrive è cumpone a maiò parte di e canzone ma Ghjuvan Federicu Terrazzoni è Don Matteu Santini anu dinò purtatu a so petra à issu dischettu novu. U giru 2021 metterà in vale l’inseme di a so discugraffia cù una parte maiò dedicata à « Sperà »...Nantu à a scena, l’artistu hè accumpagnatu da Greg Gambarelli (pianò è urganettu), Francescu Zito (ghitarra è voce), Chris Colombier (ghitarra elettrica), Jean-Marc Gianelli (ghitarra bassa), Julien Orscheck (batteria)...À tempu, si travaglia nantu à un secondu prughjettu di « Mezu mezu ». Ma... « Acqua in bocca ».

Ph.P.


Date
17-07 : Lurettu di Casinca
19-07 : Sartè
21-07 : Aiacciu (Casone)
03-08 : Purticciolu
06-08 : Petralba
07-08 : Pitretu
09-08 : Purtivechju
11-08 : Prupià
13-08 : Isula Rossa
18-08 : Carbini
03-09 : Pinarellu
11-09 : Prunelli di Fium’Orbu
Partager :