• Le doyen de la presse Européenne

Casa Macci in Calvi

A creatività << culurita >> di Maria Gugliemmacci
Casa Macci in Calvi : a creatività « culurita » di Maria Gugliemmacci


Passiunata di tuttu ciò chì tocca à u disegnu, Maria Gugliemmacci hà creatu sei anni fà « a Casa Macci », una marca di vistiti culuriti ch’ella cuncepisce à partesi da tissuti nobili…


Tenute di veranu o d’estate ampie è larghe, culori vivi, tissuti nobili, semu inde l’universu creativu di Maria Gugliemmacci, stallata in Calvi, induve ella t’hà e so radiche, dapoi sei anni. Creà da per ella, vistiti muderni chì ci vole à dilla, piacenu monda, ci vulia à fà lu. Masimu dopu à studii...di cumunicazione. « À dilla franca, spiega a creatrice, m’hè sempre piaciuta a creatività è dinò u disegnu. Zitella, ne facciu tantu. Aghju sempre vulsutu esse stilista è travaglià intornu à a moda, e tenute... Ma sunnià qualcosa, hè un fattu. Campà lu, ghjè altru affare... »

Di fattu, a nascita di u so figliolu, permette, sette anni fà, à Maria Gugliemmacci di scambià u so percorsu è di principià à fà parlà a so creatività. A casa Macci hè in marchja. « Facciu tuttu à modu meiu, ripiglia a creatrice, ogni mudellu hè cuncepitu. Aghju una sartora è femu, inseme e finizione. U reste hè cusgitu à a mascina. » Maria appronta i so mudelli. Sò vistiti di qualità maiò fatti cù tissuti nobili : seta, linu, stofe rasinate... A creatrice mette a so « grinfia » cù disegni stampati, sopratuttu u curallu chì saria a marca di a Casa Macci. « Possu aghjustà dinò disegni cum’è a murza, un’uchjata appena « nustrale » è ancu l’alcolu (murza). I vistiti sò sempre fatti di culori vivi di veranu d’estate : rosulu, verde, giallu. Sò culori chì mi piacenu, ùn portu mai u scuru... »


Quaranta mudelli diversi à l’annu

A creatrice cuncepisce, cusì, quaranta mudelli diversi à l’annu. Sò, per a maiò parte, vistiti o code ma dinò pantaloni è cappe in lana, tissute. A Casa Macci hè spiccata in duie parte. A vendita in a so buttega d’aprile à ottobre eppo a cuncipitura è a fattura durante l’invernu. « Passu monda tempu nantu à u me urdinatore, quandu a buttega è chjusa d’invernu, ùn ci hè mai un ghjornu induve ùn travagliu micca. Quandu scegliu un mudellu, mi tocca à calculà u numaru di pezze ch’aghju da fà, quantu culori...Cercu sempre à creà un stilu chì mi piace... »

In a so buttega, Maria prupone e so cullezzione di qualità à un prezzu abbordevule : Da 150 à 175 e, « Semu à u principiu di i prezzi i più alti cù, s’eu pigliu i tissuti in altrò, una fabricazione 100 % lucale... »

S’è « A Casa Macci » face pian, pianinu a so strada, a creatrice cerca idee nove. « Mi piaceria à travaglià nantu à i detagli di certi mudelli ma tandu, dumandaria di più tempu, di più travagliu è un costu più impurtante. Videremu à longu andà. »

Per avà, Maria Guigliemmacci cerca à accuncià a so marca cù fazzuletti, cinte è bottuli. L’occasione di cuntinuà a so strada nantu à U filu principiatu sei anni fà…


F.P.


Casa Macci
45, quai Adolphe Landry
20260 Calvi

Tel : 06-33-83-56-39
www.maisonmacci.com
Partager :