<< Stella >> : una canzona per dì << mai più >>

« Stella » : una canzona per dì « mai più »

Prisentata à l’occasione di a manifestazione « L’orange days », dedicata à a lotta contru à e viulenze fatte à e donne, « Stella » hè una canzona scritta è cumposta da Ghjuvan Carlu Papi chì tratta d’issa tematica sensibile…


Una sala carca cù, à mezu, sculari, eletti, respunsevuli di l’Educazione Naziunale è d’associ di difesa di e donne, un silenziu di catedrale, è ci vole à dilla dinò, un’emuzione particulare, ci vulia à esse à u Spaziu Diamante u 25 di nuvembre per l’apertura di l’edizione 2021 di « L’orange Days », una manifestazione chì si scrive in u quadru di a ghjurnata internaziunale di e viulenze fatte à e donne è chì si sviluppa, in u mondu sanu, sin’à u 10 di dicembre à traversu parechje azzione. In Corsica è masimu in Aiacciu, i respunsevuli avianu sceltu à Ghjuvan Carlu Papi in tantu chè cumpare d’isse ghjurnate. Cù u talente è a sensibilità ch’è noi li cunniscemu, u cantadore hà accettatu di purtà a so petra à issa manifestazione. « Sò statu unuratu d’esse sceltu cum’è cumpare, spiega l’autore, ciò chì era privistu à l’iniziu, era solu un ritrattu cù un messaghju « Mai più » per esse publicatu in Aiacciu è aldilà nantu à e rete suciale. Eppo ci semu detti cù Michel Pozzo di Borgo ch’è noi pudiamu fà megliu. Avemu sceltu, tandu, di fà una canzona. »


« Liberà a parolla »

U cantadore sceglierà « Stella », una canzona chì conta u percorsu d’una ghjuvanotta chì pò esse una mamma, una surella, un’amica, una moglia, una cumpagna…. « Era prima una canzona, aghjusta l’artistu, eppo n’avemu fattu un clip. Ma per mè, trattà d’un sughjettu cusì sensibile, era assai cumplicatu. Aghju vulsutu prisentà una ghjovana chè tuttu u mondu pò cunnosce, cù un nome : « Stella ». Ma ci era idea precisa daretu à issu nome... »

Per cuncepisce u so prughjettu, l’artistu s’hè arrimbatu nantu à i so zitelli. « Aghju un masciu è trè femine. Ùn sappiu micca comu fà per cumpone. Fighjulendu a me ultima chì t’hà sette mesi è chì mi fighjulava, a musica è e parolle sò cascate subbitu. »

Fighjulendu u filmettu è ascultendu a canzona, si scopre un persunaghju chì piatta e so suffrenze sottu à u « mantellu » di a so vita. Eppo, amparemu à a fine, ch’in fattu, a ghjuvanotta hè morta. « Hè una stella chì luccicheghja in u celu è porta u messaghju à l’altre donne per dumandà un sustegnu, una manu, a pruttezzione... »

Impegnatu à prò d’issu prughjettu, Ghjuvan Carlu Papi hà scupertu, à tempu, di manera più precisa, una tematica chì u tocca assai. « Mi sò resu contu di issu spaventu. Avemu più di 600 lagnanze in Corsica, in un annu solu. Ùn hè, in più chè ciò chì si cunnosce, ci sò donne ch’anu a paura, ch’ùn parlanu micca, ci hè un travaglione da fà. Aghju solu vulsutu, à modu meiu, purtà a me petra per permette, à longu andà, di liberà a parolla. U scopu hè di sensiblizà a ghjente, hè per quessu chè a canzona si puderà sente à a radiu, nantu à e rete suciale o You Tube... »

« Stella », canzona particulare, ferà dinò parte di l’ultimu dischettu di l’artistu.