Tradizione di a fine di l'annu

Tradizione di a fine di l’annu : quand’è u paganisimu è a religione sò liati

À l’occasione di a fine di l’annu, e tradizione ùn mancanu micca in Corsica, tutte liate à usi pagani monda anziani, sulcati oghje, à a religione.


Avemu tratta, in d’altre publicazione di u JDC, d’usi antichi, più o menu liati à u paganisimu, masimu quellu di l’ochju. U fattu hè chè tutta issa ghjente, signadori o altri, ùn faccianu micca a diferenza trà un usu religiosu, Cristianu, è un altru paganu, vale à dì, ind’una terminulugia nobile, monda più anziana. I nostri vechji ùn si punianu micca a questione, passendu da unu à l’altru di manera naturale. I dui viaghjanu inseme, manu in manu dapoi anni è anni, per ùn dì micca seculi. In parechji lochi induve s’hè spertutu, u Cristianisimu s’hè arrimbatu nantu à usi anziani. È s’elli sò spariti in certi paesi u regioni, sò sempre prisenti induve l’omu hà mantenutu una leia cù a natura. È a Corsica ne face parte. Isse tradizione, cum’è per indettu, u focu natalescu, chjamatu « maghju » in certi lochi, hà una leia monda impurtante cù a San Ghjuvà detta d’inguernu (San Ghjuvà u Vangelistu chì annunzia u lume). Una festa arrimbata nantu à u sulstiziu d’inguernu (u 21 di dicembre, induve i ghjorni sò i più corti), in opposizione à a San Ghjuvà d’estate, « u Battistu ch`battizeghja d’acqua», à u sulstiziu d’estate (u 21 di ghjugnu) induve i ghjorni sò i più longhi...Secondu à a tradizione, si faccia issu focu davanti à a ghjesgia, una tradizione chì, d’altronde, esiste sempre in parechji lochi di l’isula, è chì era prisente ancu in certi quartieri pupulari di e cità (San Ghjuvà in Aiacciu).


Un ceppu sin’à u capu d’annu

« Issu maghju, spiega un abitante, era un simbolu di lume è faccia a transizione trà dui mondi. Caratterizava, u vultà à pocu à pocu ver di u lume dopu à a San Martinu è a Sant’Andria, chì marcavanu u principiu di l’inguernu è dunque d’una certa bughjura. Si vede quantunque, cù isse duie feste, una leia stretta cù u Cristianisimu... »


À u nivellu di e famiglie, è ind’un sensu menu cullettivu si mettia a sera di u 24, u ceppu u più grossu (castagnu à spessu) in u sciaminè è da a persona a più anziana. Dopu tutte e persone mettianu u so ceppu, più o menu maiò, da u più anzianu à u più ghjovanu. Certe volte, issu ceppu era pigliatu nantu à u maghju chì brusgiava nantu à a piazza à la ghjesgia. È s’ellu tenia sin’à capu d’annu, era bon segnu per a famiglia, l’animali, a caristia è ancu a sicchina. « Tutti issi tradizioni, aghjusta un Taravese, sò liati à u Cristianisimu. Quì, si tratta di a nascita di Ghjesù. Hè à partesi d’issu mumentu quì, chè i ghjorni ani da essa di più in più longhi. Hè l’avenementu di u lumi cù Ghjesù Cristu. »


U ringraziamentu per compie un ciculu

Si pò pensà, chè i Corsi anu adattatu tutti iss’usi à a ghjunta di l’epica cristiana in Corsica. Un’adattazione chì s’hè fatta di manera naturale. Marcata, d’altronde, ind’è noi à l’occasione di u Capu d’Annu, da a messa di u ringraziamentu, u 31 di dicembre. Un mumentu di fede, una settimana dopu à a Natività, induve si face u bilanciu di l’annu scorsu, individuale, cullettivu, induve truvemu una penitenza è si piglia l’acqua benedetta. Hè un mumentu chì marca a fine d’un ciculu. È si principia, per u tempu di l’epifania (di regula a prima dumenica dopu à u capu d’annu), chì, s’ellu simbuzeghja a presentazione di i Rè maghi à u ciucciu Ghjesù, piglia e so radiche inde e saturnale rumane. Un’epica chì s’assumiglia à u Carnavale, induve, per indettu, i schjavi pudianu esse, durante un mumentu, Rè ou Regina. Tutte isse tradizione anu francatu u tempu, è liate à a religione, facenu, sempre oghje, a particularità di e nostre credenze. Credenze è particularità caratterizate dinò in Corsica à l’occasione di u Capu d’annu cù isse duie parolle : « Pace è salute » o « Paci è saluta » secondu à i lochi. Torna una leia cù a ghjesgia : « A pace di u Signore » nanzu à a cumunione. Ciò chè tutta a squadra di u JDC vi prega per l’annu novu.

F.P.
Photo : F.P