« Village harmony » : quandu l’Americani amparanu u cantu corsu
Una vintena di membri di a struttura « Village Harmony », chì ghjunghjenu da parechji paesi di u mondu eranu in Corsica à u principiu di lugliu per amparà u cantu in paghjella.
« Village harmony » : quandu l’Americani amparanu u cantu corsu
Una vintena di membri di a struttura « Village Harmony », chì ghjunghjenu da parechji paesi di u mondu eranu in Corsica à u principiu di lugliu per amparà u cantu in paghjella. Un appuntamentu annuale dapoi qualchì tempu.
Ghjunghjenu da i Stati Uniti, l’Inghliterra, l’Africa suttana, a Germania, a Ollanda, Israele è d’altri paesi, sò ghjovani o anziani, omi è donne, cantadori cunfirmati o amatori è spartenu tutti a listessa passione per u cantu polifonicu tradiziunale. Praticheghjanu, cusì i canti di u mondu sanu ma anu una particularità : sò innamurati di a Corsica è i so canti tradiziunali. « Village Harmony » hè una struttura monda cunnisciuta in i Stati Uniti, spiega Frédéric Vesperini, capimachja di u gruppu Spartimu è unu di i furmatori d’issa squadra, giranu in u mondu sanu per amparà i canti di i paesi visitati. A struttura hè basata in u statu di u Vermont. »
Attelli d’amparera : i « teenage camps »
A struttura hè nata in u 1989 da Larry Gordon. À l’iniziu, eranu liceani chì cantavanu inseme è prisentavanu un prugramma di dece ghjorni. Oghje, « Village Harmony » hà parechji gruppi per chjuchi è maiò, corsi è attelli in linea, bibbiotteca cù musiche di u mondu. A struttura hà a particularità di spiazzà si in u mondu sanu. Urganizeghja attelli dedicati à l’amparera di i canti di tutti i paesi, i « teenage camp », induve tutti, ghjovani è anziani, ponu travaglià meludie sacre è prufane di u mondu sanu. A Corsica ? « Ci anu cuntattatu in u 2008, ripiglia u respunsevule, l’aviamu ricivuti in Aiacciu. Aviamu amparatu da elli, un cantu geurgianu ed elli, un primu cantu in paghjella. Avà, ghjunghjenu tutti i dui anni à passà duie settimane. »
Dece ghjorni in Corsica tutti i dui anni
A squadra di « Village Harmony » hà pigliatu radiche in Corsica dapoi parechji anni per amparà u cantu in paghjella. Anu principiatu, tempi fà cù Jackie Micaelli, a prima, à tramandà li a pulifunia. Questu annu, l’attellu era in Canari cù Cathy Graziani, Jean-Etienne Langiani, di u gruppu Tavagna è Frédéric Vesperini accumpagnatu da dui cantadori di Spartimu. « Hè un’urganisazione maiò per elli. Piglianu di u so tempu per vene à passà dece ghjorni in Corsica. Ma tuttu hè strutturatu. Ognunu t’hà u so rolu. Da u manghjà sin’à l’alloghju. È ci hè un costu. Per contu nostru, l’amparemu u cantu in paghjella ma canti speficifichi cum’è i canti sacri di u Nebbiu a Balagna, Sartè o versi di paghjella pochi cunnisciuti. Cusì, avemu travagliatu questu annu u sanctus di u Mucale, a paghjella di Tagliu o di Canale di Verde o l’agnus dei d’Olmi Cappella. Anu circatu à entre in u spiritu di a paghjella cù un travagliu nantu à e rivucate, a prununzia, ciò ch’ùn hè tantu faciule. »
Dopu à una decina di ghjorni passati in Canari, i cantadori, gestiti da a so capimachja Patty Cuiler, anu presentatu un cuncertu cù u gruppu Spartimu in a ghjesgia di Bastelicaccia. Un bellu spettaculu d’un’ora è mezu induve anu ripigliatu canti corsi è d’altrò. A seguita ?
« Sò stati in Corsica duie settimane nanzu di cuntinuà à viaghjà. Ma issu metodu piglia face a so strada. Piace assai à una squadra canadiana chì travaglia nantu à e radiche di u cantu tradiziunale... »
L’occasione, forse, di fà una residenza tutti l’anni è di cuntinuà à tramandà u cantu in paghjella.
F.P.
Crédit photo : Philippe Peraut