Sò ella : l'umagiu di i Campagnoli à e donne
Natu in u 1989, issu gruppu isulanu hà francatu l'anni, viaghjendu sempre à prò di a cultura corsa.
Sò ella : l’umagiu di i Campagnoli à e donne
Natu in u 1989, issu gruppu isulanu hà francatu l’anni, viaghjendu sempre à prò di a cultura corsa. Cù un gustu particulare per a pulifunia. U so dischettu novu « Sò ella » hè in umaggiu à e viulenze fatte à e donne...
Semu in u 1989, è dopu à una prima participazione à l’occasione di a festa di a musica, Ange Orati, Guidu Calvelli è Manu Saveris s’aduniscenu per a creazione d’un gruppu novu : i Campagnoli. U scopu hè u piacè ma, à tempu, di prumove a cultura corsa è masimu a pulifunia sacra è prufana. Subbitu, « I Campagnoli » piglianu u so slanciu. Affaccanu d’altri cantadori, (Pierre-Jean Marchetti, Jean-Guy Santamaria, « Tittù » Cordoleani è, più tardi, Jimmy Ronchi).
A pulifunia ? « L’avemu tutti amparata, spiega Guidu Calvelli, unu di i capimachja di u gruppu, issu cantu hè sculpitu ind’a nostre memoria, hè impurtante di tramandà lu. »
1995 : a strada di u successu
In u 1991, à l’iniziu di a so storia, u gruppu participeghja à un primu cuncertu pulifonicu cù strutture è cantadori rinumati (Felì, A Filetta, i Chjami Aghjalesi, Eric Mattei, I Mantini…). Una sperienza ch’ùn li cunvene micca. Tandu, si decide di piantà tuttu. Ci vuleria u drama di Furiani è una magnifica canzona scritta da Ange Orati « Di biancu è di turchinu » per rilancià l’inseme. À partesi di u 1995, u gruppu piglia una strada nova. Quella di u successu. Dopu à un cuncorsu naziunale in Laas (Pyrénées Atlantiques), i Campagnoli escenu u so primu dischettu in publicu. D’altri anu da seguità. Frà elli « Vinti anni » , « Odisseu », « Versi di vita », cù u famosu « U lione hè mortu sta sera... ». Arrimbati nantu à a tradizione, e creazione « o ripresa » facenu a particularità di u gruppu. Ma a pulifunia, ùn hè u so arnese di i Campagnoli. I membri anu sceltu dinò d’aduprà strumenti è di fà creazione musicale arrimbate nantu à un certu imegnu nustrale. Ritruvemu dunque, d’una manera logica, canti cum’è « Terra Nostra »…
Sò ella : sustegnu à e donne vittime di viulenze
Strada facendu, u gruppu hè cresciutu. Senza scambià u so impegnu culturale, mette in vale, oghje, creazione più mudernu. Eppo, di dicembre scorsu, hè esciutu u so ultimu dischettu : Sò ella induve ritruvemu a canzona dedicata à e viulenze fatte à e donne. « Tuttu u mondu hè cummossu da ciò chì s’hè passatu ind’è noi iss’ultimi anni, ci ricunniscimu in tutte ste donne chì soffrenu. »
Guy Calvelli hà cumpostu a musica di u dischettu nantu à un scrittu magnificu di Ghjacumu Fusina. Un dischettu induve a ripresa di a famosa canzona di Canta u Populu Corsu « Un paisanu », una creazione sacra « Stabat Mater », « Tendone Rossu » (sempre scritta da Fusina) o « Serinatu à Maria » scrittu da Alanu di Meglio, custituiscenu u solcu d’un inseme chì mette dinò in vale u cantu tradiziunale « Muresca di Moïta », « Agnus Dei d’Olmi Cappella », « Veni o Bella »...Ritruvemu, à tempu, «U moi babbu », adattazione di « Mon Vieux » (D.Guichard) è « Millesimu » (Obispo-Calogero) adattatu da Ghjuvan Federicu Terrazzoni…
Ph.P.
I Campagnoli
Guy Calvelli
Isabelle Gianelli
Louis Crispi
Alexis Vitello
Ange Orati
