Doria Ousset à u liet internaziunale !

Doria Ousset à u liet internaziunale !

L’artista isulana riprisenterà a Corsica à u Liet Internaziunale in Tonder (danemarcu) u tre-deci di maghju prussimu. L’occasione, quindeci anni dopu à Ghjacumu Culioli, di chjappà si, perchè micca, un premiu…

U Liet Internaziunale, una manifestazione culturale dedicata à e lingue minuritarie, hè liatu dapoi parechji anni à a Corsica. Natu in u 2002, issu cuncorsu mette ghjust’appuntu in vale i paesi o rughjoni auropei. Tuttu u mondu si ramenta di a vittoria di Ghjacumu Culioli in u 2008 in Lulea (Sueda) cù a famosa canzona « Hosanna in Excelsis ». È quattru anni dopu, funu i membri di « Dopu Cena » à chjappà si u premiu di finalistu cù « Trasmetta ». Un cuncorsu chì permette di valurizà u travagliu è sopratuttu di prumove isse lingue minacciate. À tempu, hè l’occasione, postu chè a manifestazione si sviluppa abbastanza, di favurizà tutte isse spressione è masimu l’artisti. Un spechju impurtante. In u 2010, fù Stefanu Casalta à participà.


Sei musicanti

Quartu artistu à pruvà à fà valè u travagliu è, à tempu, a lingua corsa dapoi u principiu, Doria Ousset, assai rinumata in Corsica è altrò cù u so rock « nustrale ». Un’idea vechja di quindeci anni.

« À l’epica di Ghjacumu Culioli, spiega a cantatrice, mi sò dettu ch’un ghjornu ci vulia à participà à stu cuncorsu. L’idea hà fattu a so strada. Pochi tempi fà, ci aghju pensatu di manera più regulare. »

Strada facendu è trà dui dischetti è dui cuncerti, l’artista piglia u tempu di pensà à issu prughjettu. « Aghju fighjulatu nantu à u situ è aspettatu l’apertura di u cuncorsu per pone a mo candidatura... » Ma li tuccava, nanzu à tuttu, à sceglie una canzona. « Aghju sceltu « Roma », hè quella chì piace u più à la ghjente. Pensu ch’ella cunvene bè cù a so storia intornu à a Corsica, a Francia è l’Italia. È una musica universale. »

Tandu Doria cuncepisce un « clip
», traduce a canzone in inglese è a manda à l’urga-nisazione per cunfermà a so candidatura. « Roma » cù a so pulifunia à l’iniziu, u sonu di a cetera è i so « accenti » chì mischianu l’Oriente è u rock, hè adattata, ci vole à dilla, à issu genaru di manifestazione. « A ghju travagliatu cù i musicanti chì m’anu da accumpagnà : Jean Alexandre Oliva, chì hà fattu a musica, Bernardu Ferrari à a ghitarra elettrica, Antone Leonelli (ghitarra classica), Jean-Marie Gianelli (ghitarra bassa), Marina Luciani (pianò) è Jean-Paul Maurizi (batteria)... »

Vennari u tredeci di maghju, Doria Ousset è a so squadra seranu i ripresintenti di a Corsica in u nordu di l’Auropa. Cù u scopu d’ùn vultà vioti. « Per noi, ciò chì pare impurtante hè di sparte a nostra lingua è u nostru paese à l’internaziunale, postu chè issa manifestazione accoglie monda ghjente. Fora di què, hè dinò a ricunniscenza d’une travagiu è d’un percorsu. Ci seranu dui premii, quellu di a ghjuria è quellu di u publicu. S’è noi pudemu chjappà ne unu, serà una bona... »

Cù a voce è a qualità musicale ch’è noi li cunniscemu, pudemu fà dighjà a scummessa chè Doria puderà cunvice i dui…


•
F.P.