Sapè Fà : Confraternita di u Fiadone
L'usu di e sosule nustrale
Cunfraternita di u Fiadone
L’usu di e sosule nustrale
Nata in u 2012 da qualchì amicu, issa cunfraternità t’hà a particularità di vulè mette in vale e sosule corse purtate da e nostre minnane è, di sicuru, tramandà le…
U fiadone, u tianu di vitellu, a pulenta, a suppa corsa, i lintichji, i panzarotti, u pastizzu...Eccu unepoche di sosule corse salvate è ghjunte sin’à noi per via di i nostri anziani. Ma à tempu à a lingua, a cultura è tanti usi, si perdenu à pocu à pocu cù a cunsumazione oghjinca. Hè ghjust’à puntu per mantene issa tradizione chè qualchì amicu anu decisu, in u 2012 d’aduniscesi per creà a cunfraternita di u fiadone. Noëlle è Jean-Do Casabianca è Jean-Luc Pietri.
Più di 360 sosule racolte
« U scopu, spiega a prima, era nanzu à tuttu di salvà tutte isse sosule. N’aghju racoltu, per contu meiu, 360 di tutti i rughjoni di l’isula. Dopu ci hè vulsutu à pruvà le è fà le tastà... » Cusì, quella chì hè a capimachja di a squadra, face à spessu, tutte isse sosule, aghjustendu, di tantu in tantu, u modu soiu. In quantu à a tenuta, anu sceltu u rossu è l’oru. « U rossu per u vinu è l’oru-giallu, culore di u fiadone, aghjusta a respunsevule di a cunfraternità, sò culori chì si sò imposte di manera naturale.» A squadra, chì adunisce, oghje dodeci persone, s’hè messa à travaglià subbitu à racoglie e sosule in tutti i lochi di Corsica : i panzarotti di Centuri, u pastizzu di Vicu, u castagnacciu (biscottu à a farina castagnina di issi lochi...A cunfraternita sceglie u fiadone cum’è nome. Dolce corsu, issu biscottu fattu cù u limò, brocciu, zuccheru è ovi. « Hè quellu chì ci caratterizeghja u più, aghjusta Noëlle Casabianca, tempi fà, era fattu cù u latte caprunu o pecurinu. »
Ci vole à vultà sin’à u XVu seculu per truvà a traccia d’issu dolce in certi lochi d’Italia. È ghjunghjerà, d’una manera logica, in Corsica passendu per u Nordu (Bastia) è falendu sin’à Corti... « Esisteria dinò in Pumonte ma appena diversu, preciseghja dinò Noëlle, masimu in Aiacciu cù i famosi imbrucciati. » Di fattu, a cunfraternita hà adupratu issa terminulugia quì ma senza alcuna leia religiosa. S’agisce d’une struttura dedicata à a gastrunumia. «Semu membri di a Federazione Francese di a gastrunumia chì adunisce centenie di strutture in tuttu u paese. Hè impurtante, per noi, di fà valè issu sapè tramandatu da e nostre minnane…
U cuncorsu di u fiadone u più bonu
Per mette in vale u so travagliu, a squadra di u fiadone participeghja à assai manifestazione : u mercatu di Bastia, i scontri paisani ogni mercuri in Aiacciu, a festa di a natura, Cavalli in festa o qualchì fiera. Tutti l’anni, u cuncorsu di u fiadone u più bonu permette à quelli chì ammaitreghjenu issa sosula di fà si valè. À iss’ occasione, è dopu à un arrestu di trè anni per via di u Covid, più di vinti persone s’anu da ritruvà in Lumiu per a cinquesima edizione di un cuncorsu chì face a so strada. « Nanzu di tastà fiadone, è ghjè listessu per ciò chì tocca à e sosule, l’impurtanza è u piacè di l’ochji. Dopu ci hè gustu chì deve rispettà quellu di i nostri anziani... »
Cusì, a cunfraternita cuntinueghja u so percorsu circhendu à fà valè tuttu un sapè fà chì sparisce, ellu dinò. Si tratta, tandu, d’un « riacquistu » gastronomicu.
F.P.
Cunfraternita di u fiadone
Résidence d’Ajaccio, bat B, Rue Nicolas Peraldi, 20000 Ajaccio
Cuntattu : 06-14-80-12-91
Pagina facebook
