<< Amparate mi à cantà >>
L'itinerariu musicale novu di Felì
« Amparate mi à cantà », l’itinerariu musicale novu di Felì
L’artistu isulanu hà esciutu à a fine di marzu, u so ultimu dischettu : « Amparate mi à cantà ». Un viaghju musicale d’ondeci tituli induve ellu canta l’amore di a so terra…
Dapoi ch’ellu hà principiatu u so percorsu musicale in l’anni ottanta, Felì hà sulcatu una traccia particulare. Un chjassu principiatu à mezu à u cantu tradiziunale ma dinò mudernu. Per sbuccà, in tuttu, nantu à ondeci dischetti chì anu fattu a so nuturietà. U percorsu di l’artistu, carcu di delicatezza è armunia s’hè sempre fattu intornu à a spartera di a lingua è a cultura corsa. Cusì, è dopu à « Puppeppu », dedicatu à i zitelli, hà esciutu « Amparate mi à cantà », à a fine di marzu scorsu. « L’universu di u cantu hè particulare, spiega l’artistu, una canzona conta ciò chè tuttu u mondu pensa in core à sè. È quantu à a musica, hè un arte chì permette di creà leie universale. »
24 tituli
Hè in u tempu di u riacquistu chè l’artistu hà principiatu u so travagliu. Un chjassu apertu cù u dischettu « Campà » esciutu in u 1989. Hè dinò a storia d’un’amicizia sincera cù u pueta Ghjuvan Teramu Rocchi, chì scriverà assai cun ellu. Un percorsu cumunu di vinticinque anni. È s’ellu hà scrittu monda per i zitelli (t’hà una scola di cantu), Felì ripiglia, cù issu dischettu novu, u so percorsu canterinu. « Avemu sempre u bisognu d’arradicà ci à issa cultura chì hè nostra. Ci permette di campà. Hè una manera d’esse. »
Cù « Amparate mi à cantà », Felì vole apresi ver d’altri orinzonti. Cusì, in issu dischettu novu, ritruvemu vintiquattru tituli registrati, in una parte, in u studiò « Scola in Festa », è da l’altru, in live à u spaziu à u spaziu Carlu Rocchi d’ottobre scorsu. Cù a tematica di l’apertura. « L’apertura à u mondu permette di scopre d’altre culture mettendu ghjst’appuntu in vale u cullettivu è a musica, ind’una dimensione universale. Ma senze perde e nostre radiche è ciò chì face a nostra identità. »
« Quand’è tù balli » in versione bislingua
In issu dischettu, l’artistu hà dinò vulsutu prupone qualchì nuvità. « Una sera in paese », scritta da Patrick Croce è cumposta da u so figliolu Stefanu, « Amparate mi à cantà », scritta è cumposta da ellu stessu, eppo qualchì tituli chì anu fattu a so nuturietà. « Golu », « Quand’è tù balli », ma in versione bislingua, cantata in live cù l’artistu cubanu Pirru Barrios. Si ritrova dinò canzone più anziane cum’è « S’o era la voce » o « stà torna appena ». Particularità d’issu opus, u qr codeci chì hà da permette à a ghjente di pudè telecaricà i scritti o e traduzzione fatte da Brandon Andreani. « U scopu, l’averete capita, hè d’andà nantu à d’altri chjassi. Di fattu, sò andatu pocu fora di a Corsica. Ma e mo canzone, elle, anu viaghjatu. Aghju dunque, a vulintà di scopre un altru publicu. A musica hè universale è a lingua corsa, ùn hè una barriera... »
Felì è i so musicanti anu da appruntà una girata maiò in u 2024 cù una decina di date in Corsica è trè cuncerti maiò. Nanzu di parte, di vaghjime, in Nizza, Marseglia, Aix è di compie u 19 di nuvembre à u Casino di Parrighji. Nanzu, ci serà, di sicuru, l’occasione di sentelu in Corsica…
Ph.P.
