Jean François Gandon " Pittore " un percorsu urighjinale
Stallatu in Basterga induve ellu hà e so radiche,Jean-François Gandon hà seguitatu un percorsu scentificu.
Jean-François Gandon (pittore) : un percorsu urighjinale
Stallatu in Basterga induve ellu hà e so radiche, Jean-François Gandon hà seguitatu un percorsu scentificu. Travaglia nantu à l’analisi è u cuntrolu di l’acqua à l’OEHC in Bastia. Ma dapoi a so zitellina, t’hà a passione di a pittura. Scuntremu à un persunaghju particulare…
Quandu si discorre cù Jean-François Gandon, si scopre subbitu un persunaghju ch’ùn hè micca cum’è l’altri. A so manera di parlà, d’analisà a vita, di trattà di u mondu di l’arte, di a so passione, tuttu u franca da ciò chì si pò fà regulamente. È ancu s’ùn si vede micca d’un primu colpu, ghjè a misura chì a discussione si stalla, ch’ellu si scopre u so caratteru, a so manera d’esse. Hè vera, d’altronde, chè u so percorsu hè arrimbatu nantu à stu filu quì.
U pittore di a Corsica
S’ellu hà seguitatu una strada scientifica (basciliè D è un travagliu nantu à l’analisi è u cuntrolu di l’acqua à l’OEHC in Bastia), a passione di u disegnu, hè nata appena nanzu. « Aviu quattordeci anni, spiega l’artistu, è fù M.Rivel, u me prufessore di Disegnu àu culleghju Giraud in Bastia, chì i mettò nantu à stu filu quì… »
Di fattu, l’insignante li permette di piglià cuscenza di e so pussibilità…È l’artistu face e so prime illustrazione nantu à un libracciolu « Promenades à travers l’histoire de la Corse » (1984) cù Charles Castellani (fratellu di u Deputatu) è Ghjacumu Fusina !
A prima tela, ella, vene dui anni dopu. Ma, à dilla franca, Jean-François adopra tutte e techniche (acquarellu, oliu, mina, inchjostru, penna…) è tutti l’appoghji (tela, legnu…). « U fattu artisticu m’hà sempre purtatu à sfruttà tuttu… ». Cù una passione particulare per l’arburi
A so priorità ? Pinghje a Corsica ! « Ci sò talmente arnesi cù a bellezza di l’isula, ci danu l’inflenza per a creazione. »
U so travagliu li permette cusì di fà qualchì mostra in Aiacciu è Bastia. U so stilu saria piuttostu figurativu : torra di Capitellu, Madunuccia, Edmondu Simeoni, a so figliola Lea, Paoli, Saone, Bunifaziu, Claude Cesari, Basterga affissi diversi, hà ancu vintu un cuncorsu per fà u Logò di l’Università di Corsica (1991). U tuttu per una decina di tele à l’annu, fatte ind’a so casa, in Basterga. Bulicà dui percorsi chì si ponu oppone (l’arte è a scenza), ùn disturbà manca appena u pittore, un pocucciu filosofu di tantu in tantu. « A scenza è l’arte s’aduniscenu à un mumentu datu. Hè una questione d’equilibru, cum’è a vita… »
Fratellu di Christophe, chì tene l’albergu « Artemisia » è « A bella scusa » in Basterga, Jean-François hà sceltu l’arte per sprime a so passione di a Corsica. « Ùn ci hè micca abbastanza arnesi quì ! Cù tuttu u talente ch’è noi t’avemu, ci vuleria una scola naziunale… »
Aspettendu, face sempre a so strada artistica cù un ultimu prughjettu da vene : Samperu di Basterga. Una seguita logica…
