"Anna" : a terapia "scrivana" di Mathieu Henry
Esciutu di nuvembre scorsu à l’edizione « Les trois colonnes », in Parrighji, stu rumanzu pulizzeru hè u prima di Mathieu Henry.
« Anna » : a terapia « scrivana » di Mathieu Henry
Esciutu di nuvembre scorsu à l’edizione « Les trois colonnes », in Parrighji, stu rumanzu pulizzeru hè u prima di Mathieu Henry. L’autore ci ne conta un’inchiesta in un paese di muntagna –chì pudaria esse u soiu-, dopu à l’assassiniu d’una ghjuvanotta…
A passione, dicenu l’usi, face francà e muntagne. Certe si sviluppanu zitellu o ghjovanottu mentre chì per d’altri, ci vole à aspettà di più. Ma tutti i passiunati « s’aduniscenu », un ghjornu o l’altru in core di u so arte. È riescenu, dopu à tamanti sforzi, à sprimesi.
Per ciò chì chì tocca à Mathieu Henry-chì t’à e so radiche in a Soccia è u Taravu-, ci hè vulsutu à aspettà qualchì tempu dopu à una passione…per a lettura.
Da a lettura à a scrittura
Di fattu, ùn era micca destinatu à scrive, masimu cù u DUT di gestione, una licenza di cummunicazione è un master di turisimu in a stacca. À dilla franca, versu literariu, ci n’era pocu è micca. « A voglia di scrive, spiega l’autore, hè ghjunta da a lettura. In Corti, induve aghju fattu i me studii, aghju principiatu à leghje : Stephen King, Lovecraft, Pierre Lemaître, Harlan Coben…Tandu, è à pocu à pocu, mi sò messu à scrive qualchì nuvella ma nantu à a tematica di u fantasticu. Mittendu, frà tempu in scena, persunaghji di u me circondu… »
Semu tandu in u 2011. Nove anni fà. Eppo, l’idea di scrive un rumanzu nasce. « A lettura m’hà purtatu versu a scrittura. Leghje permette di fà prugressi…Aviu dighjà l’idea di scrive « Anna ». Hè stata cuncretizata à u principiu di u 2019 dopu à un prublema di saluta. Aviu u tempu è aghju scrittu tuttu in trè settimane »
« Anna » conta a storia d’un’inchiesta di pulizza chì si passa in un paese di muntagna induve una donna senza prublemi hè stata tomba. Una pagina dopu à l’altra, si scopre, à pocu à pocu, un universu particulare è u campà di l’abitanti. « Ùn si pò dì di manera precisa chè u paese hè a Soccia ma hè sicura, cù a me zitellina è a me ghjuventù, ch’ella ci hè un’influenza. Niente chè i muri, e case, certi lochi discrivi…Ma i persunaghji, elli, sò tutti fittivi… »
Compiu à a fine di ferraghju di u 2019, « Anna » ùn serà publicatu…ch’un annu è mezu dopu. « Ci hè vulsutu à scambià qualchì passaghju, rileghje, mudificà ch’ogni volta, aviu idee nove. Aghju scambiatu a fine trè o quattru volte ! In fine, ancu assai ch’aghju avutu u sustegnu di a me famiglia è d’uni pochi d’amichi, osinnò u libru surtia da quì à trè anni ! »
Strada facendu, « Anna » esce di nuvembre scorsu. Cù ci vole à dì la, un successu maiò. « Ùn m’aspettava micca. Tuttu u cantone hà compru un rumanzu, tutti i me amichi. Hè un piacè ma, à dilla franca, sò appena timidu è ùn vogliu micca esse in davanti… »
Mathieu cuntinueghja à travaglià « ch’ùn si pò campà di a scrittura », ma a so passione, ella, ùn si spinghjerà micca. « Pocu impreme u tempu, aghju da scrive dinò… »
U scenariu di u so secondu rumanzu saria dighjà scrittu…
F.P.
