A messa di Campile restituita in un filmu !
Dopu à trè anni di travagliu, a messa in paghjella di u paese di Campile, hè stata restituita.
A messa di Campile restituita in un filmu !
Dopu à trè anni di travagliu, a messa in paghjella di u paese di Campile, hè stata restituita. Un travagliu di tutti l’attori culturali di u paese chì s’hè arrimbatu nantu à quellu d’Orsu Paulu Giovannoni chì ripigliò tuttu u versu. È un’opera finalizata in filmu cù l’appoghju di a cumuna, l’associu Tavagna Club, a Cdc è u centru d’arte polifonicu di Sartè…
Si sà, per i tercani di a paghjella chè iss’arte quì, benchè prisente altrò, hè quantunque assai cuncentratu in u rughjone di a Castagniccia. Ma u fattu hè chè u riacquistu hà sopratuttu messu in vale, versi buzinchi cum’è quelli di Rusiu è Sermanu. Si pò dinò pensà à Tagliu cù u travaglione di Ghjugliu Bernardini, u babbu di Ghjuvan Francè è Alanu. A mediatisazione di u gruppu « I Muvrini » permettendu, à listessu tempu, un certu interessu per u versu di Tagliu (ma a messa di i morti s’hè persa, cum’è l’introitu è u credo fdi i vivi…). In l’anni ottanta, u discu triplice « Musiques corses de tradition orale » permettia di cunnosce l’opera maiò di l’etnomusicologu Felice Quilice. Qualchì termpu dopu, u travaglu di u gruppu « A Filetta » mettia in vale versi ghjesgiale di Balagna. Un travagliu chì sbuccava nantu à cunniscenza di paesi cum’è Corbara, Ochjatana, Pioggiola, Olmi Cappella, u Mucale cù versi oghje, assai aduprati. Un travagliu chì, d’altronde, si sviluppa dinò in Pumonte. Ghjè arrimbendu nantu à sta dinamica è cù a voglia di fà rinasce versi spariti ch’una squadra di Campile, se messe, trè anni fà, in cerca di u so passatu musicale.
A messa di i vivi è di i morti
« A messa ùn era più cantata dapoi settantacinque anni, spiega Michè Paoli, unu di i cantadori è membre dinò di u gruppu Tavagna, Orsu Paulu Giovannoni, stazzunaghju, diacru, paghjellaghju, impruvisatore è pueta rinumatu fù l’ultimu testimoniu d’issu patrimoniu musicale cantatu sin’à l’anni cinquanta nanzu di sparisce. Ghjè ellu chì fece registramenti di e trè voce è chì ci hà lasciatu un’opera tamanta… »
Trè anni fà, u prughjettu di fà rinasce issa messa principiò. Purtatu da l’associu Tavagna Club, u centru d’arte pulifonicu di Sartè, a CdC, cù u sustegnu di a cumuna di Campile, s’hè messu in vale. A sucetà Pimentò Prod-ci vulia à fà un registramentu u più pulitu pussibile, essendu incaricata di a tecnica (Julien Valli, Léo Martinez, Jean-Baptiste Andreani è Lionel Dumas-Perini…) Manu Gallet (mischiu) è François Desjobert (ritrattu).
D’altri paesi à vene ?
In a cappella d’Antibia-paisolu di Campile- i cantadori (Michè Paoli, Eric Biagetti, Filì Gambotti, Jean-Luc Luciani è Stéphane Morel, anu registratu a messa sana di i vivi è di i morti. Ritruvemu un versu chì s’assumiglia, d’un cantu, à quelli di u Boziu ma dinò à quellu di Tagliu, pocu luntanu. Ma l’essenziale d’issa messa hè particulare è si risente un armunia propria. Una demarchja chì invita tutti quelli chì sò passiunati di pulifunia tradiziunale à andà à sfruttà, in ogni paese di Corsica. A squadra canterina, ella, cerca à trasmetta issu versu, ch’ell’ùn si perdi. È travaglia nantu à un altru prughjettu, a messa di i difunti di a Porta d’Ampugnani
F.P.
photo : François Desjobert