Sapè fà : Jean Luc Alfonsi, Da u pianu à u rilevu, l'arte << luminariu >>

Da u pianu à u rilevu, l’arte « luminariu » di Jean-Luc Alfonsi


Stallatu in u so attellu vicinu à a via Noël Franchini, in Aiacciu, Jean-Luc Alfonsi cuncepisce luminarii fatti cù fogli di legnu. Un’idea nata in u ciarbellu d’issu omu carcu d’imaginazione…


Cumu fà per passà da u mistieru d’ingenieru à a fattura di luminarii di legnu ? U destinu di Jean-Luc Alfonsi hè cusì stranu per avè lu permessu d’arrimbà si nantu à u primu per mette in piazza u secondu. Di fattu, hà trovu u so « paradisu » travagliendu cù u Fablab di Corti. Passatu da l’INSA di Liò è furmatu à ciò chì tocca à u design in Parrighji, scopre a fabricazione numerica in Corti. « Vediu passà prughjetti tutti i ghjorni, spiega l’artisgianu, vuliu dà vita à ciò ch’eu t’aviu in capu. Ghjè cusì ch’ella m’hè ghjunta l’idea di lascià tuttu què per diventà l’artisgianu di i me creazione. Aghju avutu, subbitu, l’impressione di mette u dittu nantu à una tecnica di fabricazione particulare.»

Jean-Luc Alfonsi trova un attellu stretta Davin, in Aiacciu è cumencia à travaglià. « Un me percorsu d’ingenieru meccanicu m’hà aiutatu assai, aghjusta l’omu, aghju imaginatu ed eu imagineghju sempre, un mondu pianu induve possu truvà a me libertà. Hè un spaziu naturale induve vuliu scartulà da u pianu à u rilevu... »


Un sistema d’avvuglimentu senza vita nè chjodu

A filusufia di « Piatoni » hè in piazza. « U nome m’hè ghjuntu cusì, passendu da u piattu induve si manghja à un spaziu pianu. »

Cusì, e prime creazione di l’artisgianu nascenu. Cuncepite nantu à un urdinatore, escenu nantu à fogliu di legnu di 3 mm di spessore (essenza di leccia è violu) è u travagliu di precisione principia. S’agisce di passà à u rilevu cù un sistema d’avvuglimentu senza vita nè chjodu. Si mettenu duie rote per abbuglià u fogliu è l’avvuglimentu si face cù incrichje è intacche. Una volta compia, s’aghjusta un’ampolla (u sistema elettricu hè in piazza) è a lampera hè pronta. Sia da pone, sia appiccata in suspensione.

Ma ciò chì face a magia di l’ugettu hè a presentazione. « Mettu tuttu in u quadru, face appena stranu ma piace à la ghjente. Nentru, anu da scopre i trè elementi è cù l’aiutu d’una piccula nota chì porta sin’à una leia video, amparà à fà, da per elli, a lampera. Prima, cercavanu à capisce. Eppo dopu, anu vistu chè l’affare hè abbastanza simplice. Basta à seguità a nota... »

S’è ogni pezza hà da esse rifatta, ci sò ugetti di « seria » è d’altri secondu à dumanda di a ghjente. A forma scambia pocu ma a dimensione hè diversa. Si passa di vintidui centimetri di diametru à un metru è quaranta.

« L’artistu » cuncepisce trè cullezzione : violu, leccia o culurita.

D’altre materie ? « Mi ne possu ghjuvà per ugetti chì devenu stà fora o per indettu davanti à a casa. Tandu, possu aduprà u plasticu... »

L’idea di Jean-Luc Alfonsi hè stata valutata da l’Institutu Naziunale di Prupietà industriale (INPI) ciò chì cuntribuisce à mette in vale u so prughjettu. E lampere si vendenu in qualchì buttega o dopu una dumanda particulare. L’artisgianu, ellu, cerca à fà valè u so travagliu è a so tecnica. À tempu, cuntinueghja à imaginà…

Ph.P.


Piatoni
Jean-Luc Alfonsi
4 rue Davin, 20000 Aiacciu
tel : 06-22-62-14-85

www.piatoni.com