• Le doyen de la presse Européenne

16a fiera di u ficu

17 è 18 di settembre / Peri capitale regiunale di a fica
16a fiera di u ficu : I Peri capitale regiunale di a fica


Issi 17 è 18 di settembre, Ghjaseppu Bisgambiglia è tutta a squadra di u so associu pruponenu a sedicesima edizione di a fiera di u ficu in a piaghja di a Peraccia. Un ritornu mondu aspettatu dopu à un arrestu di dui anni per via di a crisa sanitaria…


In Corsica, ogni fiera hè, à tempu, un spechju per un paese o una regione, è per una trafila o un pruduttu. U ficu, fruttu impurtante ind’a nostra cultura, hà pussutu esse messu in vale durante quindeci anni per via di u travaglione di « Jojo » (Ghjaseppu) Bisgambiglia è tutta a squadra di u so associu. « A manifestazioni hè nata dopu à discussioni guasgi trenta anni fà, spiega u capimachja di a fiera, ci era dinò un custattu. A Peraccia hè sempri stata una tarra di festa induva si mettianu in vali, prudutti. Pensu sopratuttu à a vigna. Semi pertuti nantu à a fica. Nanzi, erami cunnisciuti per a vigna è u vinu, oghji hè per a festa di u ficu... »


12000 pedi di fichi venduti

Durante tutte iss’annate, a fiera hà permessu a vendita di 12000 pedi di fiche. « Più in Cismonti ch’in Pumonti, aghjusta u capimachja di l’associu, morri ghjenti ani piantatu, hè stata una bona. Oghji, ci sò parsoni chì campani cù u sviluppu di u ficu... »

Cusì, è cù issa dinamica quì, a ghjente di u rughjone s’impegna assai à prò di a fiera, cusciente di a so impurtanza. Malgratu una situazione sanitaria chì hà custrettu à un arrestu di dui anni, sò sempre quaranta intornu à Ghjaseppu Bisgambiglia. « A crisa sanitaria ci hà fattu mali, aghjusta quellu, ci hè vulsutu à chjamà à tuttu u mondu, ripiddà u filu è riparta dapoi qualchì mesi per metta in piazza iss’edizioni quì. Ma ci serà tuttu u mondu, da i vechji à i ghjovani è ognunu voli dà un colpu di manu... »

Un’edizione monda aspettata questu annu chè a fiera hè diventata un spechju impurtante per l’associu, u pruduttu è dinò tutta a populazione di a Peraccia è ancu sin’à u paese.


Sessanta artisgiani

Questu annu, per a sedicesima edizione, sessanta artisgiani seranu prisente in campu di fiera. Da i legnaghjoli à pruduttori, bancu à vinu, vendita di pedi di fica, attellu « Cucina Corsa », passendu per un pastore chì hà da fà ghjacci à u ficu à partesi di u so latte pecurinu o caprunu, ci ne serà per tutti i gusti. « U scopu di a fiera hè di permetta ghjust’à puntu a prumuzioni di u sapè fà isulanu. A nostra idea, à l’iniziu era di metta in vali, u ficu seccu è micca frescu per rilancià lu. In i tempi, a ghjenti facia i vindemii è subbitu dopu, andavani à coglia i fichi pà fà i fichi secchi è pudè tena tutta l’annata. U nostru scopu era di mantena issa tradizioni quì. Ma hè vera, chì par via di a sicchina, sarà più difficiuli custannu... »

Unu di i mumenti maiò di a fiera serà, di sicuru, una paella tamanta, priparata da « I Pescadori in festa » invitati da l’edizione. Si tratta, à tempu, di u cantu. L’occasione, per una quindicena di cantadori, di u rughjone è d’altrò, forse micca tutti cunnisciuti, di vene à fà valè voce è strumenti. Nanzu à una cantatrice libanese chì ghjunghjerà à cantà « À l’altru mondu... » In fine, un vitellu « Abbatucci » arrustitu, venerà compie iss’edizione quì. « Par noi, sò dui ghjorni di festa, finisce Ghjaseppu Bisgambiglia. L’occasione, per tutti, di fà una spassighjata sin’à a Peraccia…


Ph.P.
Partager :