• Le doyen de la presse Européenne

Sapè fà : Christine Papillon, scultrice

L'innu à a donna
Christine Papillon, scultrice

L’innu à a donna

Scultrice dapoi quindeci anni, Christine Papillon concepisce busti di donne in terra rossa è bronzu. Un travagliu di qualità maiò chì permette à iss’artista d’esse, oghje, assai rinumata…

Ghjucà cù a terra per dà nascita à un arte è rende umaggiu à a donna, eccu u travagliu chì definisce, oghje, Christine Papillon. Una passione nata zitella cù, prima, l’arte di u disegnu. « Mi piacianu l’arti plastichi, spiega a scultrice, mi n’andava vicinu à mare à travaglià, dighjà, a terra è a rena. Ma ùn sò ghjunta à a scultura assai tardi, in l’anni 2000... »

Da u disegnu à a scultura


Zitella è ghjovana, Christine mette dighjà in vale u so talente d’artista. Face disegni diversi, masimu di cavalli o paisaghji. Eppo appena più tardi, decide di piglià corsi cù un’amica prufessore. « Vidia ch’eu m’annuiava un pocu, aghujsta a scultrice, tandu, mi cunsegliò di mettemi à a scultura ch’eu facciu tuttu fora di ciò ch’ellu ci vulia à fà. Fù, per mè, una revelazione ma era un arte ch’eu cunnisciu micca. » Da corsi di disegni, l’artista si mette dunque à amparà un arte novu, a scultura. Un percorsu chì passa per l’attellu di Mariko, scultrice famosa.

« Un scontru chì m’hà permessu di realizà chè travagliu di a terra era per mè. Hè un elemente chì mi currespundia. Un mondu novu... » Christine face i so primi passi in iss’universu quì. È subbitu, l’artista vole rende umaggiu à a donna, ma à modu soiu. « Sò busti o statulette chì t’anu un’anima, ci hè un muvimentu è aghju vulsutu mette in vale, a sensualità di a donna... »

A so prima pezza hè fatta di bronzu, ciò chì li dumanda à travaglià cù un fundidore di Vallauris (ùn ci n’hè in Corsica). « Una creazione particulare chì dumandava un travagliu necessariu. Passà da a terra rossa à u bronzu, ùn era tantu faciule. Masimu cù tuttu un travagliu nantu à a cera è u fattu di pattinà... »

artista rinumata


À pocu à pocu, l’artista face a so strada. U sguardu di a ghjente nantu à a so spressione li permette di piglià cuscenza di e so qualità artistiche. Cusì, è dopu à un travagliu persunale passendu da u so attellu à u fornu, Christine Papillon cummencia à fà si cunnosce cù e so prime mostre. Purtata da i so viaghji in u Mediterraneu, l’artista da nascita à pezze uniche chì parenu sorte da a mitulugia. A donna in tutta a so spressione, appena stravagante ma cù tutta a so sensualità. « Ci hè una nuzione di libertà ! Possu parte nantu à un’idea eppo scambià. Hè u travagliu di a terra chì solca u me travagliu. Ci hè un’evoluzione, ùn ci hè nulla di fissu... »

Di regula, l’artista s’arrimba nantu à ella stessa, senza passà per disegni per cuncepisce e so creazione. « Pò accade secondu à e dumande, ma di regula, a cuncipitura di e pezze si face senza... » L’artista travaglia a terra rossa cotta à 1300 gradii, trasfurmata in bronzu. Oghje, u so travagliu hè ricunnisciutu. Hà participatu à mostre dapoi u 2014 in Corsica è in Cuntinentee. Masimu à u salonu di l’arti Francesi in Parrighji. U so arte si sviluppa intornu à donna, di sicuru, ma micca solu... « Possu travaglià nantu à l’omi o ugetti particulari... »

Un bustu di l’Imperatore, « Napo on the beach » dà, forse, d’altre idee à l’artista...

F.P.

Christine Papillon, scultrice
www.papillonsculpture.com
F...
: papillonsculpture@gmail.com Cuntattu : 06-15-32-17-33
Partager :