A Suarina, l'estru di u cantu corsu feminile

A Suarina, l’estru di u cantu corsu feminile

Natu qualchì annu fà, issu gruppu cumpostu di quattru studiente di l’Università di Corsica, cumencia, pian’, pianinu à fà a so strada in l’universu di u cantu corsu.

Gruppi corsi, ch’elli sianu di musica o solu pulifunia, ci n’hè à pocu presu duicentu in Corsica. Appena menu per ciò chì tocca à e femine. Ultima struttura nata nantu à i banchi di l’Università di Corsica, u gruppu a Suarina cumpostu di quattru ghjovane studiente : Sylvia Gensollen, Elisa Tramoni, Marina Branca è Angélique Degiovanni. « Semi tutti stati allivati à mezu à u cantu, spiega una di quelle, ci semi scuntrati à l’Università ed avemi fatti i nostri primi passi quallà. »

L’influenza di u Riacquistu
À l’usu di tanti è tanti gruppi corsi nati in Corti, a struttura hà amparatu u cantu tradiziunale, masimu a pulifunia, ch’ù hè oghje, micca sola dedicata à l’omi, è dinò di sicuru, e canzone di u repertoriu isulanu più « mudernu ». Di fattu, a Suarina piglia e so radiche in l’attellu di u centru culturale universitariu. Subbitu, per quelli chì sò « ingrandati » in u filu di u riacquistu, u parangone cù e famose « duie patrizie » (Patrizia Poli è Patrizia Gattaceca) in l’anni settanta è novanta, hè sulcatu. Ancu s’elle sò quattru, si sente iss’influenza di e duie voce feminile di l’epica. Un’armunia schietta, voce linde è duie ghitarre, a struttura ùn tarde micca à fà si cunnosce. « L’influenza hè nata di manera naturali, aghjusta una di e ghjovane, iss’universu musicali ch’è noi speremu à modu nostru da quì à pocu, hè natu arradicatu in u cantu tradiziunali mischiatu cù influenzi varii, di u cantu corsu è d’altrò. Ci hè sempri una ricerca d’armunia è di qualità. »

Ver di creazione
E quattre donne ghjunghjenu d’orizonti diversi, ciò chì face dighjà a particularità di l’inseme. Cum’è tanti gruppi principianti, Marina, Sylvia, Elisa è Angélique, anu cummenciatu u so percorsdu cù e riprese d’altri gruppi : Vitalba, Canta u Populu Corsu, I Chjami, Voce Ventu, circhendu sempre à purtà qualcosa in più. S’elle cantanu tutte e quattru, Elisa Tramoni, viculata ind’un’ambianza appena rock’n folk è Angélique Degiovanni sonanu di ghitarra. Marina Branca, prufessore di Corsu, porta a so voce è Sylvia Gensollen, porta qualcosa in più cù a so voce è certe volte u so pianò. Di furmazione classica, hà dighjà cumpostu qualchì pezzu. In puchissimi tempi, a Suarina hà dighjà fattu una decina di prime parte di strutture rinumate. Autori rinumati cum’è Alanu di Meglio, d’altronde presidente di u centru culturale universitariu, Patrizia Gattaceca, Ghjuvan Federicu Terrazzoni o Ceccè Lanfranchi anu datu unepochi di i so scritti à issa nova struttura. E quattru studiente eranu di marzu, nantu à a scena di l’Aghja per fà a prima parte di Contraversu...Avà, s’aspetta forse, un primu dischettu. « Par avà, ripitimu è travaddemi. Forsa, sbuccarà qualcosa. »

A struttura s’adunisce in Corti, Sartè è à spessu in Aiacciu (studio 20). Unepochi di date sò dighjà priviste iss’estatina. Aspettendu un primu opus, ch’ùn tarderà micca troppu…

• Ph.P.