• Le doyen de la presse Européenne

"Di mi l'amore" : una canzona corsa per prumove a pace in u mondu

Petru Canon, famosu cantadore è pueta isulana hè statu impegnatu ind'u prughettu maio messu in piazza da a dirett d'un ONG.rice
« Dì mi l’amore » : una canzona corsa per prumove a pace in u mondu
Petru Canon, famosu cantadore è pueta isulanu hè statu impegnatu ind’u prughjettu maiò messu in piazza da a direttrice d’un ONG. Hà scrittu « Dì mi l’amore », una canzona tradutta in inglese è cantata da ellu è Britt Hewitt, un’artista americana…

Prumove a pace in u mondu, luttà contru à l’inegualità, battesi di fronte à e multinaziunale, a so putenza è u so impegnu suldarinu, eccu ciò ch’elle portenu l’ONG dapoi anni è anni. Di fattu, chì ci saria di megliu chè una canzona per purtà messaghji di pace, amore è fraternità. Issa idea quì, Sonya Djivanides, direttrice di l’ONG « European Peace Building Liason Office », l’hà avutu di lugliu scorsu.
Issu prughjettu si sviluppa in u quadru d’una alta urganisazione chjamata « Peace Studiò » chì permette à l’artisti di creà un azzione di pettu à a guerra. Ma ci vulia à truvà un cantadore. Ghjè u so maritu, Dimitri Djivanides, di ceppu aiaccinu, oghje avucatu internaziunale, chì hà avutu l’idea d’impegnà a Corsica à prò di issa idea quì. « A me spusata, spiega l’avucatu, cercava un artistu.
L’idea era di mustrà chè i Corsi di a Diaspora ponu impegnà si elli dinò à prò di a messa in vale di a nostra isula. Ci vulia un artistu di stintu, di core è di talente, impegnatu nantu à issa demarchja umanista. Aghju prupostu à Petru Canon, un amicu caru, persuasu ch’ellu era l’omu chì cunvenia… »


Una canzona corsa tradutta in inglese

L’idea principia. L’artistu isulanu, ellu, decide subbitu d’impegnà si. « Aghju discutatu durante l’estate cù Sonya Djivanides, avanza u cantadore, u fattu di prumove a pace in u mondu hè qualcosa chì mi tocca assai. Avemu travagliatu inseme nantu à stu prughjettu. »
À a fine d’aostu, l’artistu scrive è cumpone una canzona « Dì mi l’amore ». Ma ùn hè solu in u prughjettu. Un’artista americana, Britt Hewitt, esciuta di a famosa scola americana Julliard School (Chì hà vistu nasce Val Kilmer, Miles Davis, Robin Williams…) participeghja dinò. « Aghju fattu parolle è musica, aghjusta u cantadore, eppo avemu pussutu scambià inseme. S’hè incaricata di l’accunciamentu. Una volta scritta, a canzona hè stata registrata à i studiò Monte Gozzi ind’è Michele Tomei. Britt canta dinò in corsu ed eiu, aghju pruvatu à mette qualchì parolla in inglese… »
Per Dimitri Djivanides, issu prughjettu marca qualcosa di novu per a Corsica. « Vi rendite contu chì una canzona corsa si traduce in inglese. Ghjè un fattu maiò. Senza cuntà ch’ella hè stata ascultata in quaranta paesi. A Corsica hà bisognu d’issu generu di prughjettu per esse messa in vale… »

Ver di altri prughjetti ?

« Dì mi l’amore » hè stata prisentata di manera ufficiale u vintottu d’ottobre scorsu nantu à e rete suciale. « Purtà un messaghju di pace universale in lingua corsa hè qualcosa di strasordinariu. Noi altri, Corsu di u Stranieru, vulemu prumove l’artisti isulani per mustrà a leia ch’è no t’avemu cù e nostre radiche è fà valè u talente d’artisti ch’ùn ne anu micca troppu l’occasione. »

U fattu di mette in vale à Petru Canon, ind’un universu culturale corsu induve sò sempre li stessi chì sò messi in davanti, hè una bona chì hà da permette, forse, di sviluppà un’altra idea di u cantu, a puesia o a musica. Masimu intornu à u prughjettu universale di a pace in u mondu. Un prughjettu chì, forse, serà seguitatu d’altri sempre nantu à tematiche chì permettenu à i Corsi di fà si valè…
Partager :